Jual Oram Warning / ‘ମୋତେ ଯିଏ ଅପଦସ୍ଥ କରିବାକୁ ଚେଷ୍ଟା କରୁଛି ତାକୁ ଜାଳି ଶେଷ କରିଦେବି’

ରାଉରକେଲା ଭାଜପା ରାଜନୀତିରେ ଏବେ ହଲଚଲ ସୃଷ୍ଟି ହୋଇଛି । କେନ୍ଦ୍ରମନ୍ତ୍ରୀ ଜୁଏଲ ଓରାମ ନିଜର ବିରୋଧୀ ତଥା ଅପପ୍ରଚାର କରୁଥିବା ଗୋଷ୍ଠୀଙ୍କୁ ଖୋଲା ଚ୍ୟାଲେଞ୍ଜ ଦେଇ କଡ଼ା ଚେତାବନୀ ଶୁଣାଇଛନ୍ତି । ଜୁଏଲ ଓରାମ କହିଛନ୍ତି ଯେ, ଅନ୍ୟ ଦଳରୁ ଆସିଥିବା କିଛି ଲୋକ ଟଙ୍କା ଖର୍ଚ୍ଚ କରି ତାଙ୍କୁ ବଦନାମ କରିବାକୁ ଚେଷ୍ଟା କରୁଛନ୍ତି । "ସେମାନେ ଭାବୁଛନ୍ତି ମୁଁ ହଟିଗଲେ ବୋଧହୁଏ ସେମାନେ କେନ୍ଦ୍ରମନ୍ତ୍ରୀ ହୋଇଯିବେ । କିନ୍ତୁ ମୋତେ ଅପଦସ୍ତ କରିବାକୁ ଚେଷ୍ଟା କଲେ ଜାଳି କି ସଫା କରିଦେବି," ବୋଲି ସେ ପ୍ରକାଶ କରିଛନ୍ତି ।

ଅଧିକ ପଢ଼ନ୍ତୁ: ବିଜେପିର ପଞ୍ଚାୟତ ପାଗଭିଡା, ସେପ୍ଟେମ୍ବର ୧୭ରୁ ମାସିକିଆ ସେବା ସଙ୍କଳ୍ପ ଅଭିଯାନ

ନିଜର ସଂଘର୍ଷ ବିଷୟରେ ଉଲ୍ଲେଖ କରି ସେ କହିଛନ୍ତି, "ମୁଁ ଏହି ଦଳକୁ ନିଜ ରକ୍ତ ମାଂସ ଦେଇ ଠିଆ କରିଛି । ଦଳ ମୋତେ ଯେତିକି ସମ୍ମାନ ଓ ସ୍ଥାନ ଦେଇଛି, ତାହା ଯଥେଷ୍ଟ । କିନ୍ତୁ ମୋ ସମ୍ମାନରେ କିଏ ହାତ ଲଗାଇଲେ, ସେ ହାତକୁ କାଟି ଫିଙ୍ଗିଦେବାର ତାକତ୍ ମୋର ଅଛି । ପୂର୍ବରୁ ନିର୍ବାଚନ ଲଢ଼ିବେ ନାହିଁ ବୋଲି କହିଥିବା ଜୁଏଲ ଏବେ ନିଜ ନିଷ୍ପତ୍ତି ବଦଳାଇଛନ୍ତି । ସେ ଚ୍ୟାଲେଞ୍ଜ ଦେଇ କହିଛନ୍ତି ଯେ, ସେ ପୁଣି ନିର୍ବାଚନ ଲଢ଼ିବେ ଏବଂ ତାଙ୍କ ବିରୋଧରେ କିଏ କାମ କରୁଛନ୍ତି ଓ ସେମାନଙ୍କର କ’ଣ ଅବସ୍ଥା ହେଉଛି, ସେ ସବୁ ଦେଖିବେ । ଏହି ବିଷୟରେ ସେ ଦଳର ସାଧାରଣ ସମ୍ପାଦକ ମାନସ ମହାନ୍ତିଙ୍କ ସହ ଆଲୋଚନା କରିସାରିଛନ୍ତି । ଆଗାମୀ ଦିନରେ ଏ ନେଇ କେନ୍ଦ୍ରୀୟ ନେତୃତ୍ୱଙ୍କୁ ମଧ୍ୟ ବିସ୍ତୃତ ଭାବେ ଜଣାଇବେ ବୋଲି କହିଛନ୍ତି ।