ପଶ୍ଚିମବଙ୍ଗରେ ୧୫ ବର୍ଷ ଧରି ଶାସନ କରିଥିବା ମମତା ବାନାର୍ଜୀ ଏବଂ ତାଙ୍କ ତୃଣମୂଳ କଂଗ୍ରେସ ଏବେ ସମସ୍ୟାରେ ପଡ଼ିଛନ୍ତି । ଟିଏମସିର ଜଣକ ପରେ ଜଣେ ନେତା ଦଳ ଛାଡ଼ିବାରେ ଲାଗିଛନ୍ତି । ୬୦ରୁ ଅଧିକ ବିଧାୟକ ବିଦ୍ରୋହ କରିଛନ୍ତି । ସେପଟେ ଦିଲ୍ଲୀରେ ଲୋକସଭା ସଦସ୍ୟମାନେ ମଧ୍ୟ ଦଳ ଭିତରେ ବିଦ୍ରୋହର ବିଗୁଲ୍ ଫୁଙ୍କିଛନ୍ତି । ଏପରି ସ୍ଥିତିରେ ମମତା ବାନାର୍ଜୀ ଏବଂ ତାଙ୍କ ଦଳ ପାଇଁ ସବୁଠାରୁ ବଡ଼ ଝଟକା ସାଜିଛନ୍ତି ଦଳର ଅନ୍ୟତମ ବରିଷ୍ଠ ସାଂସଦ କଲ୍ୟାଣ ବାନାର୍ଜୀ ।

ଦିନେ ମମତା ବାନାର୍ଜୀ ତାଙ୍କର ୪୦ ବର୍ଷୀୟ ସହଯୋଗୀ କାକୋଲି ଘୋଷଙ୍କୁ ପଦରୁ ହଟାଇ କଲ୍ୟାଣ ବାନାର୍ଜୀଙ୍କୁ ବଡ଼ ଦାୟିତ୍ଵ ଦେଇଥିଲେ । ଏବେ ସେହି ନେତା ବିଦ୍ରୋହ କରିଛନ୍ତି । ସେ ଟିଏମସି ମୁଖ୍ୟ ମମତା ବାନାର୍ଜୀଙ୍କୁ ଏକ ଚରମବାଣୀ ଶୁଣାଇଛନ୍ତି । ମମତା ତାଙ୍କ ପୁତୁରା ଅଭିଷେକ ବାନାର୍ଜୀଙ୍କୁ ବାଛନ୍ତୁ ନଚେତ ତାଙ୍କ (କଲ୍ୟାଣ) ପରି ଜଣେ ବିଶ୍ୱସ୍ତ ନେତାଙ୍କୁ ବାଛନ୍ତୁ ।

ଦିଦି ଦଳର ବିଶ୍ଵସ୍ତ ନେତାଙ୍କ ତୁଳନାରେ ନିଜ ପୁତୁରା ଅଭିଷେକ ବାନାର୍ଜୀକୁ ବେଶ ଗୁରୁତ୍ଵ ଦେଉଥିବାରୁ ଦଳୀୟ ନେତା ଅସନ୍ତୁଷ୍ଟ ଥିଲେ । ଏବେ କଲ୍ୟାଣ ବାନାର୍ଜୀ ଦିଦିଙ୍କୁ ପୁତୁରା ଅଭିଷେକଙ୍କୁ ହଟାଇବାକୁ ଦାବି କରିଛନ୍ତି । ନଚେତ୍ ସେ ଦଳରେ ରହିପାରିବେ ନାହିଁ ବୋଲି କହିଛନ୍ତି । ଏହାସହିତ ସେ ଅଭିଷେକ ବାନାର୍ଜୀଙ୍କ ବିରୋଧରେ ଜାଲ ଦସ୍ତଖତ ମାମଲାରୁ ଅଲଗା ହେବାର ଘୋଷଣା ମଧ୍ୟ କରି କହିଛନ୍ତି ଯେ ଅଭିଷେକ ବାନାର୍ଜୀ ତାଙ୍କୁ କେବେ ବିଶ୍ୱାସ କରିନଥିଲେ ଏବଂ ଆଉ କେବେ କରିବେ ନାହିଁ ମଧ୍ୟ ।

• 'ଅଭିଷେକ ଜଣେ ଅହଂକାରୀ ବ୍ୟକ୍ତି'

କଲ୍ୟାଣ ବାନାର୍ଜୀ କହିଛନ୍ତି, "ଆମେ ଗତକାଲି ଅଭିଷେକଙ୍କ ମାମଲା ପାଇଁ ପ୍ରସ୍ତୁତି କରୁଥିଲୁ ଏବଂ ମଧ୍ୟରାତ୍ରିରେ ମୋତେ ସୂଚନା ଦିଆଯାଇଥିଲା ଯେ ଓକିଲଙ୍କୁ ପରିବର୍ତ୍ତନ କରାଯାଇଛି ।" ସେ କହିଥିଲେ ଯେ ଏହା ଅତ୍ୟନ୍ତ ଅପମାନଜନକ । ଅଭିଷେକ ବାନାର୍ଜୀ ତାଙ୍କ ଉପରିସ୍ଥ ଅଧିକାରୀମାନଙ୍କୁ କିପରି ସମ୍ମାନ କରିବେ ତାହା ଜାଣନ୍ତି ନାହିଁ । କଲ୍ୟାଣ ବାନାର୍ଜୀ ଅଭିଷେକଙ୍କୁ ଜଣେ ଅହଂକାରୀ ବ୍ୟକ୍ତି ଏବଂ ଦଳକୁ କ୍ଷତି ପହଞ୍ଚାଇଛନ୍ତି କଲ୍ୟାଣ କହିଛନ୍ତି । ସେ ଆହୁରି କହିଛନ୍ତି, ମୁଁ ମମତା ବାନାର୍ଜୀଙ୍କ ସହିତ ଠିଆ ହୋଇଛି । କିନ୍ତୁ ଦିଦିଙ୍କୁ ଏବେ ନିଷ୍ପତ୍ତି ନେବାକୁ ପଡ଼ିବ ଯେ ସେ ଗୋଟିଏ ଦଳ ଏବଂ ବିଶ୍ୱସ୍ତ ନେତା ଚାହୁଁଛନ୍ତି କି ନିଜ ପୁତୁରା ଏବଂ ପରିବାରକୁ ଚାହୁଁଛନ୍ତି ।"

• କିଏ କଲ୍ୟାଣ ବାନାର୍ଜୀ ?

କଲ୍ୟାଣ ବାନାର୍ଜୀଙ୍କୁ ମମତା ବାନାର୍ଜୀଙ୍କ ବିଶ୍ୱସ୍ତ ନେତାମାନଙ୍କ ମଧ୍ୟରୁ ଜଣେ ବୋଲି ବିବେଚନା କରାଯାଏ। ପଶ୍ଚିମବଙ୍ଗ ନିର୍ବାଚନ ପରାଜୟ ପରେ ବାନାର୍ଜୀ ଅନେକ ଗୁରୁତ୍ୱପୂର୍ଣ୍ଣ ମାମଲାରେ କୋର୍ଟରେ ଟିଏମସି ସଦସ୍ୟଙ୍କ ପ୍ରତିନିଧିତ୍ୱ କରୁଥିବାର ଦେଖାଯାଇଛି । ସେ ଜାଲ ଦସ୍ତଖତ ମାମଲାରେ ମଧ୍ୟ ଓକିଲ ଥିଲେ, ଯେଉଁଥିରେ ଅଭିଷେକ ବାନାର୍ଜୀ ମଧ୍ୟ ଜଣେ ଅଭିଯୁକ୍ତ ।

ପଢନ୍ତୁ ଏହି ଖବର: ସାମ୍ନାକୁ ଆସିଲା TMC ୧୯ ବିଦ୍ରୋହୀ ସାଂସଦଙ୍କ ତାଲିକା, ଜାଣନ୍ତୁ ଏଥିରେ କିଏ କିଏ ଅଛନ୍ତି...

• ପାଳି କରି ଦିଦିଙ୍କୁ ହାତ ଛାଡୁଛନ୍ତି ଦଳୀୟ ନେତା

ଟିଏମସିର ସାଂସଦ, ବିଧାୟକ ଏବଂ ନେତାମାନେ ଜଣକ ପରେ ଜଣେ ମମତା ବାନାର୍ଜୀ ଏବଂ ତାଙ୍କ ଦଳ ଛାଡିବାରେ ଲାଗିଛନ୍ତି । କଲ୍ୟାଣ ବାନାର୍ଜୀଙ୍କ ବିଦ୍ରୋହୀ ଆଭିମୁଖ୍ୟର କିଛି ଘଣ୍ଟା ପୂର୍ବରୁ, ମମତା ବାନାର୍ଜୀ ଦୁଇଟି ବଡ଼ ବିପର୍ଯ୍ୟୟର ସମ୍ମୁଖୀନ ହୋଇଥିଲେ । ପ୍ରଥମତଃ, ପ୍ରକାଶ ଚିକ୍ ବରାଇକ ତାଙ୍କ ରାଜ୍ୟସଭା ସଦସ୍ୟତାରୁ ଇସ୍ତଫା ଦେଇଥିଲେ । ଏହି ସମୟରେ ଗତକାଲି ପର୍ଯ୍ୟନ୍ତ ମମତା ବାନାର୍ଜୀଙ୍କ ସହିତ ଠିଆ ହୋଇଥିବା ପ୍ରସୁନ ବାନାର୍ଜୀ ମଧ୍ୟ ବିଦ୍ରୋହୀ କାକୋଲି ଗୋଷ୍ଠୀରେ ସାମିଲ ହୋଇଛନ୍ତି । ଲୋକସଭାରେ କାକୋଲି ଗୋଷ୍ଠୀକୁ ଏକ ପୃଥକ ଗୋଷ୍ଠୀ ଭାବରେ ମାନ୍ୟତା ଦାବି କରି ବାନାର୍ଜୀ ଏକ ଚିଠିରେ ସ୍ୱାକ୍ଷର କରିଛନ୍ତି ।