ଆଞ୍ଚଳିକ ଦଳର ଅଧୋଗତି ପାଇଁ ଉତ୍ତରାଧିକାରୀ କଣ୍ଟା । ପଶ୍ଚିମବଙ୍ଗରେ ଅଭିଷେକ, ତାମିଲନାଡୁରେ ଉଦୟନାଥ ଆଉ ଓଡ଼ିଶାରେ ଭିକେ ପାଣ୍ଡିଆନ । ଅଘୋଷିତ ଉତ୍ତରାଧିକାରୀ ଭାବେ କ୍ଷମତା ଦଖଲର ନିଶା ତିନି ରାଜ୍ୟରେ ତିନି ଆଞ୍ଚଳିକ ଦଳକୁ କରିଛି ତଳିତଳାନ୍ତ । ତୃତୀୟ ପୀଢିର କ୍ଷମତା ଲୋଭ କେମିତି ଆଞ୍ଚଳିକ ଦଳକୁ ବିଲୟ ପଥକୁ ନେଉଛି ଜାଣନ୍ତୁ...

ଅଘୋଷିତ ଉତ୍ତରାଧିକାରୀ ଭାବେ କ୍ଷମତା ଦଖଲ କରିବା କିଛି ଆଞ୍ଚଳିକ ଦଳ ପାଇଁ ମହଙ୍ଗା ପଡିଛି । ମମତା, ନବୀନ ଏବଂ ଷ୍ଟାଲିନଙ୍କ କ୍ଷେତ୍ରରେ ସମାନ ଦଶା ଦେଖିବାକୁ ମିଳିଛି । ରାଜ୍ୟରେ ବିଜେଡିରେ ଆଘୋଷିତ ମୁଖ୍ୟ ଭାବେ ପାଣ୍ଡିଆନଙ୍କ ଅଭ୍ୟୁଦୟ ରାଜ୍ୟ ରାଜନୀତିକୁ ଦେଇଥିଲା ନୂଆ ମୋଡ । ଦୁର୍ନୀତି, ପିସି, ଅପରାଧଠାରୁ ୨୪ ନିର୍ବାଚନରେ ବଡ଼ ପ୍ରସଙ୍ଗ ସାଜିଥିଲା ତାମିଲ ଉତ୍ତରାଧିକାରୀ । ଯେଉଁଥିପାଇଁ ୨୪ ବର୍ଷ ଶାସନ କରିଥିବା ବିଜେଡି ଚାଖିଥିଲା ପରାଜୟର ସ୍ଵାଦ । ଆଉ ନିର୍ବାଚନ ପଟ ପରିବର୍ତ୍ତନ ପରେ ନିଇତି ନେତା ବିଜେଡି ଛାଡୁଛନ୍ତି ।

ଅଧିକ ପଢ଼ନ୍ତୁ: ମମତା ଡାକିଥିବା ବୈଠକକୁ ଆସିଲେ ମାତ୍ର ୮ ବିଧାୟକ, ୬ ସାଂସଦ; କ'ଣ କହିଲା TMC ?

ସମାନ ଟ୍ରେଣ୍ଡ ଦେଖିବାକୁ ମିଳିଛି ପଶ୍ଚିମବଙ୍ଗରେ । ମମତାଙ୍କ ପୁତୁରା ଅଭିଷେକଙ୍କ ପାଇ ଦଳ ଏଠି ଖାଲି କ୍ଷମତାରୁ ଯାଇଛି ତାହା ନୁହେଁ ବରଂ ଦଳ ୩ ଭାଗ ହୋଇଯାଇଛି । ୬୦ ବିଧାୟକଙ୍କ ସମର୍ଥନ ସହ ଦଳରେ ମଙ୍ଗ ଧରିବାକୁ ଅନ୍ୟ ନେତା ସାମ୍ନାକୁ ଆସିଛନ୍ତି । ତାମିଲନାଡୁ ନିର୍ବାଚନରେ ମଧ୍ୟ ଏମକେ ଷ୍ଟାଲିନଙ୍କ ପରାଜୟ ପଛରେ ପୁଅ ଉଦୟ ଏକ ବଡ଼ ଫ୍ୟାକ୍ଟର ଥିବା କୁହାଯାଉଛି ।

ଏଠି ପ୍ରଶ୍ନ ଉଠୁଛି ଲମ୍ବା ସମୟ ଧରି ରାଜନୀତି ଆଉ ଶାସନ ଅଭିଜ୍ଞତା ପରେ ବି ଉତ୍ତରାଧିକାରୀ ନିଷ୍ପତ୍ତି ନେବାରେ କାହିଁକି ଭୁଲ କରୁଛନ୍ତି ଆଞ୍ଚଳିକ ଦଳ । ଗ୍ରହଣୀୟତା ନଥିବା ନେତାଙ୍କୁ କାହିଁକି ଧରାଉଛନ୍ତି ମଙ୍ଗ । ଉତ୍ତରାଧିକାରୀ ନିଷ୍ପତ୍ତି ବେଳେ ଜନମତକୁ ଜାଣି ପାରୁ ନାହାନ୍ତି, ନା କ୍ଷମତା ଅନ୍ଧରେ ନିଜ ନିଷ୍ପତ୍ତିକୁ ଅନ୍ୟ ଉପରେ ଲଦି ଦେଉଛନ୍ତି । କିନ୍ତୁ ଆଞ୍ଚଳିକ ଦଳ ଭାଙ୍ଗିବା ପଛରେ ବିଜେପିକୁ ଦାୟୀ କରିଛନ୍ତି ବିଜଡେ ନେତା । ଯାହାର ଜବାବ ରଖିଛି ବିଜେପି । ଆଞ୍ଚଳିକ ଦଳ ମାନଙ୍କ ପାଇଁ ଏ ଟ୍ରେଣ୍ଡ ନୂଆ କ୍ରାଇସିସ ତିଆରି କରିଛି ।