Supreme Court To Mahua / TMC ନେତ୍ରୀ ମହୁଆଙ୍କୁ ସୁପ୍ରିମକୋର୍ଟଙ୍କ କଡ଼ା ସମାଲୋଚନା; 'ଅଣ୍ଡାକୁ କାହିଁକି ଆପଣଙ୍କର ଏତେ ଭୟ ?'

ନୂଆଦିଲ୍ଲୀ: ତୃଣମୂଳ କଂଗ୍ରେସ (TMC) ସାଂସଦ ମହୁଆ ମୋଇତ୍ରାଙ୍କ ବିରୁଦ୍ଧରେ ଫେସବୁକରେ ଉତ୍ତେଜନାମୂଳକ ପୋଷ୍ଟ ଅପଲୋଡ୍ କରିବା ମାମଲା । ପୋଲିସ ସମ୍ମୁଖରେ ଭର୍ଚୁଆଲ୍ ଭାବରେ ହାଜର ହେବା ପାଇଁ ଅନୁମତି ପାଇଁ ମହୁଆ ମୋଇତ୍ରାଙ୍କ ଆବେଦନକୁ ସୁପ୍ରିମକୋର୍ଟ ଶୁକ୍ରବାର ଖାରଜ କରିଦେଇଛନ୍ତି । ସୁପ୍ରିମକୋର୍ଟ ଜଷ୍ଟିସ ଦୀପଙ୍କର ଦତ୍ତା ଶୁଣାଣି ସମୟରେ ତାଙ୍କୁ ଓ ଅନ୍ୟ ନେତା ସାଂସଦଙ୍କୁ ପ୍ରଶ୍ନ କରିଛନ୍ତି ଯେ "ଆପଣଙ୍କୁ ଅଣ୍ଡାକୁ ଏତେ ଭୟ କାହିଁକି ?"

ସାଂସଦ ମହୁଆ ମୋଇତ୍ରା ନିଜ ଆବେଦନରେ ଯୁକ୍ତି ବାଢ଼ିଥିଲେ ଯେ ଯଦି ସେ ବ୍ୟକ୍ତିଗତ ଭାବରେ ସେଠାକୁ ଯାଆନ୍ତି ତେବେ ତାଙ୍କ ଉପରେ ଭିଡ଼ ଆକ୍ରମଣ କରିବ ଏବଂ ତାଙ୍କ ଉପରକୁ ଅଣ୍ଡା ଫିଙ୍ଗାଯାଇପାରେ । ଏହାପରେ ବିଚାରପତି ଦୀପଙ୍କର ଦତ୍ତା ଏବଂ ଶୀଲ୍ ନାଗୁଙ୍କ ଖଣ୍ଡପୀଠ କହିଥିଲେ, "ଆପଣ ଜଣେ ସାଂସଦ? ରାଜନୀତିରେ ପ୍ରବେଶ କରିବା ପରେ, ଆପଣ ଅଣ୍ଡାକୁ ଭୟ କରୁଛନ୍ତି..ଯେତେବେଳେ କି ଆମର ସ୍ୱାଧୀନତା ସଂଗ୍ରାମୀମାନେ ନିଜ ଛାତିରେ ଗୁଳି ଖାଇଛନ୍ତି ? ଏଗୁଡ଼ିକ ଏପରି ଆବେଦନ ଯାହା ଏହି କୋର୍ଟରେ ଆଦୌ ଆସିବା ଉଚିତ ନୁହେଁ। "

• ମହୁଆଙ୍କୁ ସୁପ୍ରିମକୋର୍ଟଙ୍କ କଡ଼ା ପ୍ରଶ୍ନ

ସାଂସଦଙ୍କ ପକ୍ଷରୁ ଉପସ୍ଥିତ ଥିବା ବରିଷ୍ଠ ଓକିଲ ଗୋପାଳ ଶଙ୍କରନାରାୟଣନ୍ ଖଣ୍ଡପୀଠ ସମ୍ମୁଖରେ ଯୁକ୍ତି ଦର୍ଶାଇଥିଲେ ଯେ ତାଙ୍କୁ ଭିଡିଓ କନଫରେନ୍ସିଂ ମାଧ୍ୟମରେ ତଦନ୍ତ ଅଧିକାରୀଙ୍କ ସମ୍ମୁଖରେ ହାଜର ହେବାକୁ ଅନୁମତି ଦିଆଯାଉ । ଏହାପରେ ସୁପ୍ରିମକୋର୍ଟ ପଚାରିଥିଲେ, "ଭର୍ଚୁଆଲରେ କାହିଁକି ? କାରଣ ଆପଣ ଜଣେ ସାଂସଦ ?" ଏହାସହିତ ସୁପ୍ରିମକୋର୍ଟ ତାଙ୍କ ଆବେଦନକୁ ଖାରଜ କରିଛନ୍ତି, ଯେଉଁଥିରେ ଧାର୍ମିକ ଭାବନାକୁ ଆଘାତ ପହଞ୍ଚାଇବା ଏବଂ ପୋଲିସ ସାମ୍ନାରେ ଭର୍ଚୁଆଲରେ ହାଜର ହେବାକୁ ଅନୁମତି ମଗାଯାଇଥିଲା ।

• କଣ ପୂରା ଘଟଣା ?

ମହୁଆ ମୋଇତ୍ରାଙ୍କ ବିରୁଦ୍ଧରେ ବିବାଦୀୟ ଓ ଉତ୍ତେଜନାମୂଳକ ସୋସିଆଲ ମିଡିଆ ପୋଷ୍ଟକୁ ନେଇ ମାମଲା ରୁଜୁ ହୋଇଥିଲା । କୋଲକାତା ହାଇକୋର୍ଟ ତାଙ୍କୁ ଅଗଷ୍ଟ ୧୪ରେ ପୋଲିସ ସାମ୍ନାରେ ବ୍ୟକ୍ତିଗତ ଭାବେ ହାଜର ହେବାକୁ ଆଦେଶ ଦେଇଥିଲେ । ଏହାପରେ ମହୁଆ ସୁପ୍ରିମକୋର୍ଟଙ୍କ ନିକଟରେ ଆଉ ଏକ ଆବେଦନ କରି କହିଥିଲେ ଯେ ଯେତେବେଳେ ଗତଥର ଯେତେବେଳେ ସେ ନିଜ ନିର୍ବାଚନ ମଣ୍ଡଳୀର ଏକ ଥାନାକୁ ଯାଇଥିଲେ, ସେତେବେଳେ ତାଙ୍କୁ ବିରୋଧ କରାଯାଇଥିଲା ଓ ତାଙ୍କ ଉପରେ ଅଣ୍ଡାମାଡ଼ ହୋଇଥିଲା ।

ପଢନ୍ତୁ ଏହି ଖବର: ଶୁଭେନ୍ଦୁ ଅଧିକାରୀଙ୍କ PA ହତ୍ୟାକାଣ୍ଡର ପର୍ଦ୍ଦାଫାଶ; ମାଷ୍ଟରମାଇଣ୍ଡ କିଏ ଜଣାପଡ଼ିଲା..

• ଆବେଦନ ଫେରାଇନେଲେ ମହୁଆଙ୍କ ଓକିଲ

ସୁପ୍ରିମକୋର୍ଟଙ୍କ କଡ଼ା ଜବାବ ପରେ ମହୁଆ ମୋଇତ୍ରାଙ୍କ ଓକିଲ ଏହି ଆବେଦନକୁ ପ୍ରତ୍ୟାହାର କରିବା ଲାଗି ସର୍ବୋଚ୍ଚ ଅଦାଲତଙ୍କୁ ଅନୁମତି ମାଗିଥିଲେ । ଏହାପରେ ସୁପ୍ରିମକୋର୍ଟ ଏହାକୁ ସ୍ଵୀକାର କରି ଆବେଦନକୁ ଖାରଜ କରିଛନ୍ତି । ଏବେ ହାଇକୋର୍ଟଙ୍କ ପୁରୁଣା ଆଦେଶ ବଳବତ୍ତର ରହିବ, ଯାହାପରେ ସାଂସଦ ମହୁଆ ମୋଇତ୍ରାଙ୍କୁ ଆସନ୍ତା ଅଗଷ୍ଟ ୧୪ ତାରିଖରେ ତଦନ୍ତ ଅଧିକାରୀଙ୍କ ସାମ୍ନାରେ ବ୍ୟକ୍ତିଗତ ଭାବେ ହାଜର ହେବାକୁ ପଡ଼ିବ ।