ଆଜି ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ସମାରୋହ ମଞ୍ଚରୁ ଏକ ଫଟୋ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି । ପ୍ରଧାନମନ୍ତ୍ରୀ ମୋଦି ଜଣେ ବୃଦ୍ଧ ବ୍ୟକ୍ତିଙ୍କୁ ସମ୍ବର୍ଦ୍ଧିତ କରିବା ସହ ତାଙ୍କ ପାଦ ଛୁଇଁଲେ ଏବଂ ତାଙ୍କୁ ଆଲିଙ୍ଗନ କଲେ । ଏହାସହିତ ମଞ୍ଚ ଉପରେ ପ୍ରଧାନମନ୍ତ୍ରୀ ବୃଦ୍ଧ ବ୍ୟକ୍ତିଙ୍କ ସହିତ ଦୀର୍ଘ ସମୟ ଧରି କଥାବାର୍ତ୍ତା ମଧ୍ୟ ହୋଇଥିଲେ । ଏହାପରେ ସମସ୍ତଙ୍କ ମନରେ ଏକ ପ୍ରଶ୍ନ ଉଠାଇଲା: ଏହି ବୃଦ୍ଧ ବ୍ୟକ୍ତି ଜଣକ ପ୍ରକୃତରେ କିଏ ? ତାଙ୍କୁ କାହିଁକି ପ୍ରଧାନମନ୍ତ୍ରୀ ମୋଦି ମୁଣ୍ଡ ନୁଆଇଁ ଏପରି ଭାବେ ସମ୍ମାନ ଜଣାଇଲେ ।

• କିଏ ସେହି ବୃଦ୍ଧ ବ୍ୟକ୍ତି ?

ଏହି ବୃଦ୍ଧ ବ୍ୟକ୍ତି ଜଣକ ହେଉଛନ୍ତି ପଶ୍ଚିମବଙ୍ଗ ବିଜେପିର ସବୁଠାରୁ ବରିଷ୍ଠ କର୍ମୀଙ୍କ ମଧ୍ୟରୁ ଜଣେ ମାଖନଲାଲ ସରକାର । ସେ ବିଜେପିର ପିତାମହ କୁହାଯାଉଥିବା ଶ୍ୟାମାପ୍ରସାଦଙ୍କ ସମୟରୁ ବିଜେପି ସହ ଜଡ଼ିତ । ୧୯୫୨ରେ, ମାଖନଲାଲ ସରକାର କାଶ୍ମୀରରେ ଭାରତୀୟ ତ୍ରିରଙ୍ଗା ଉତ୍ତୋଳନ ପାଇଁ ଏକ ଆନ୍ଦୋଳନ ସମୟରେ ଶ୍ୟାମା ପ୍ରସାଦ ମୁଖାର୍ଜୀଙ୍କ ସହିତ ଯାଉଥିବା ସମୟରେ ଗିରଫ ହୋଇଥିଲେ । ୯୮ ବର୍ଷୀୟ ମାଖନଲାଲ ସରକାର ସ୍ଵାଧୀନ ପରବର୍ତ୍ତୀ ଭାରତରେ ଜାତୀୟତାବାଦୀ ଆନ୍ଦୋଳନ ସହିତ ଜଡିତ ତୃଣମୂଳ ସ୍ତରର ବ୍ୟକ୍ତିତ୍ୱଙ୍କ ମଧ୍ୟରୁ ଜଣେ ଅଟନ୍ତି ।

• ଶ୍ୟାମା ପ୍ରସାଦ ମୁଖାର୍ଜୀଙ୍କ ବନ୍ଧୁ ହେଉଛନ୍ତି ମାଖନଲାଲ

୯୮ ବର୍ଷୀୟ ମାଖନଲାଲ ସରକାର ସିଲିଗୁଡିର ବାସିନ୍ଦା । ସେ ଶ୍ୟାମା ପ୍ରସାଦ ମୁଖାର୍ଜୀଙ୍କ ସହଯୋଗୀ ଥିଲେ ଏବଂ ତାଙ୍କ ଶବଦାହ ଶୋଭାଯାତ୍ରାରେ ସାମିଲ ଥିଲେ । ଏକଦା ଏକ ଜାତୀୟତାବାଦୀ ଗୀତ ଗାଇବା ପାଇଁ କଂଗ୍ରେସ ନେତୃତ୍ୱାଧୀନ ଦିଲ୍ଲୀ ପୋଲିସ ତାଙ୍କୁ ଗିରଫ କରିଥିଲା । ସେ କୋର୍ଟରେ କ୍ଷମା ମାଗିବାକୁ ମନା କରିଥିଲେ । ସେ କୋର୍ଟରେ ସମାନ ଗୀତ ଗାଇଥିଲେ ଏବଂ ବିଚାରପତି ତାଙ୍କୁ ପ୍ରଥମ ଶ୍ରେଣୀ ଟିକେଟ୍ ଏବଂ ଘରକୁ ଫେରିବା ପାଇଁ ୧୦୦ ଟଙ୍କା ଦେବାକୁ ନିର୍ଦ୍ଦେଶ ଦେଇଥିଲେ ।

ପଢନ୍ତୁ ଏହି ଖବର: ବଙ୍ଗରେ ଆରମ୍ଭ ହେଲା ଶୁଭେନ୍ଦୁ ରାଜ୍; ଭବ୍ୟ ସମାରୋହରେ ନେଲେ ଶପଥ

୧୯୮୦ ମସିହାରେ ବିଜେପି ଗଠନ ପରେ ସେ ପଶ୍ଚିମ ଦିନାଜପୁର, ଜଳପାଇଗୁଡ଼ି ଏବଂ ଦାର୍ଜିଲିଂ ଜିଲ୍ଲା ପାଇଁ ସଂଗଠନ ସଂଯୋଜକ ହୋଇଥିଲେ । ମାତ୍ର ଗୋଟିଏ ବର୍ଷ ମଧ୍ୟରେ ସେ ପ୍ରାୟ ୧୦,୦୦୦ ସଦସ୍ୟଙ୍କୁ ଦଳ ସହିତ ଯୋଡ଼ିଥିଲେ । ୧୯୮୧ ମସିହାରୁ ସେ ଲଗାତାର ୭ ବର୍ଷ ପାଇଁ ଜିଲ୍ଲା ସଭାପତି ଭାବରେ କାର୍ଯ୍ୟ କରିଥିଲେ, ଏହା ଏକ ଅସାଧାରଣ ସଫଳତା ଥିଲା ଯେତେବେଳେ ବିଜେପି ନେତାମାନେ ସାଧାରଣତଃ ଦୁଇ ବର୍ଷରୁ ଅଧିକ ସମୟ ପାଇଁ ସମାନ ସଂଗଠନ ପଦରେ ରହିପାରୁ ନଥିଲେ । ଆଜି ପ୍ରଧାନମନ୍ତ୍ରୀ ମୋଦି ତାଙ୍କ ପାଦ ଧୂଳି ନେବା ପରେ ସେ ପୁଣି ଚର୍ଚ୍ଚାକୁ ଆସିଛନ୍ତି ।