ପଶ୍ଚିମବଙ୍ଗ ରାଜନୀତିରେ ଲେଖା ହୋଇଛି ନୂଆ ଇତିହାସ । ହୁଗୁଳିର ଢେଉଠାରୁ ଦାର୍ଜିଂଲିର ପାହାଡ଼ ପର୍ଯ୍ୟନ୍ତ ଶୁଭୁଛି 'ଜୟ ଶ୍ରୀରାମ' ନାରା, ଯାହା କହୁଛି ପଶ୍ଚିମବଙ୍ଗରେ ବଦଳିଛି ରାଜନୈତିକ ପାଗର ମିଜାଜ୍ । ଶେଷରେ ପୂରଣ ହୋଇଛି ବିଜେପିର 'ପିତାମହ' ଶ୍ୟାମାପ୍ରସାଦ ମୁଖାର୍ଜୀଙ୍କ ଦୀର୍ଘ ଦିନର ସ୍ଵପ୍ନ । ପଶ୍ଚିମବଙ୍ଗରେ ପ୍ରଥମ ଥର କ୍ଷମତାକୁ ଆସିଛି ବିଜେପି । ଭବ୍ୟ ସମାରୋହରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ଶୁଭେନ୍ଦୁ ଅଧିକାରୀ । ପଦ ଓ ଗୋପନୀୟତାର ଶପଥ ପାଠ କରାଇଲେ ରାଜ୍ୟପାଳ । ଶପଥ ଗ୍ରହଣ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାମିଲ ।

Kolkata | BJP leader Suvendu Adhikari took oath as the first BJP Chief Minister of West Bengal since independence pic.twitter.com/ZoMOINT6RX

— ANI (@ANI) May 9, 2026

• ଶୁଭେନ୍ଦୁଙ୍କ ସହ ଏମାନେ ନେଲେ ଶପଥ

ଶୁଭେନ୍ଦୁ ଅଧିକାରୀଙ୍କ ପରେ ଦିଲ୍ଲୀପ ଘୋଷ ମନ୍ତ୍ରୀ ପଦ ପାଇଁ ଶପଥ ଗ୍ରହଣ କରିଛନ୍ତି । ସେହିପରି ଅଗ୍ନିମିତ୍ର ପଲ୍ ମଧ୍ୟ ବରିଷ୍ଠ ବିଜେପି ନେତ୍ରୀଙ୍କ ଉପସ୍ଥିତିରେ ମନ୍ତ୍ରୀ ପଦ ପାଇଁ ଶପଥ ନେଇଛନ୍ତି । ଫ୍ୟାସନ ଡିଜାଇନରରୁ ନେତ୍ରୀ ସାଜିଥିବା ଅଗ୍ନିମିତ୍ର ଆସନସୋଲ ଦକ୍ଷିଣରୁ ନବନିର୍ବାଚିତ ବିଧାୟିକା । ସେ ବେଙ୍ଗଲରେ ଜଣେ ପରିଚିତ ଚେହେରା । ଖିଦୁରିମା ଟୁଡୁ ବି ମନ୍ତ୍ରୀ ପଦ ପାଇଁ ଶପଥ ନେଇଛନ୍ତି । ସେହିପରି ନିଶିଥ ପରମାଣିକ ଓ ଅଶୋକ କୀର୍ତ୍ତନିଆ ବି ମନ୍ତ୍ରୀ ଭାବେ ଶପଥ ନେଇଛନ୍ତି ।

• ବଙ୍ଗରେ ପ୍ରଥମ ଥର ସରକାର ଗଢିଛି ବିଜେପି

ଏଥର ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପିକୁ ଐତିହାସିକ ବିଜୟ ମିଳିଥିଲା । ଆଉ ବେଙ୍ଗଲରେ ଦଳର ଏହି ଲ୍ୟାଣ୍ଡ ସ୍ଲାଇଡ୍‌ ବିଜୟ ପରେ ଚର୍ଚ୍ଚାକୁ ଆସିଥିଲେ ପଶ୍ଚିମବଙ୍ଗ ବିଜେପିର ପୁରୁଖା ଚେହେରା ଶୁଭେନ୍ଦୁ ଅଧିକାରୀ । ଯାହାଙ୍କୁ ଗତ ୨୦୨୧ ବିଧାନସଭା ନିର୍ବାଚନ ପରେ ଦଳ ବିରୋଧି ଦଳ ନେତା ଆସନରେ ବସାଇଥିଲା । ବିରୋଧି ଦଳ ନେତା ଭାବେ ଦାୟିତ୍ଵ ଗ୍ରହଣ କରିସାରିବା ପରେ ଶୁଭେନ୍ଦୁ ଅଧିକାରୀ ଟିଏମସି ସରକାରକୁ ସନ୍ଦେଶଖାଲି, ଦୁର୍ଗାପୂଜା ସମୟରେ ହାୱଡ଼ା-ଉଲୁବେରିଆ ଅଞ୍ଚଳରେ ହୋଇଥିବା ହିଂସାକାଣ୍ଡ, ଆର.ଜି କର ହସ୍ପିଟାଲ ଘଟଣା ପ୍ରଭୃତି ପ୍ରସଙ୍ଗରେ ଶାଣିତ ସ୍ୱରରେ ଆକ୍ରମଣ କରିଥିଲେ । ନନ୍ଦିଗ୍ରାମରେ ଯେତେବେଳେ ମମତା ବାନାର୍ଜୀଙ୍କୁ ଶୁଭେନ୍ଦୁ ପରାସ୍ତ କରିଥିଲେ, ସେତେବେଳେ ପଶ୍ଚିମବଙ୍ଗ ବିଜେପିର ସବୁଠୁ ବଡ଼ ଚେହେରା ପାଲଟିଥିଲେ । 

ପଢନ୍ତୁ ଏହି ଖବର: କେତେ ପାଠ ପଢିଛନ୍ତି ପଶ୍ଚିମବଙ୍ଗର ନୂଆ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ?

• ପୂରଣ ହେଲା ଶ୍ୟାମାପ୍ରସାଦଙ୍କ ସ୍ଵପ୍ନ

୧୯୮୦ରେ ଶ୍ୟାମା ପ୍ରସାଦ ମୁଖାର୍ଜୀଙ୍କ ଚିନ୍ତାଧାରାରେ ବିଜେପି ପ୍ରତିଷ୍ଠିତ ହୋଇଥିଲା । ଏହି କାରଣରୁ ମୁଖାର୍ଜୀଙ୍କୁ ବିଜେପିର ପିତାମହ କୁହାଯାଏ, ଯାହାଙ୍କ ସ୍ୱପ୍ନ ଏବେ ଶେଷରେ ସାକାର ହୋଇଛି । ଶ୍ୟାମା ପ୍ରସାଦ ମୁଖାର୍ଜୀ ୧୯୦୧ରେ କୋଲକାତାର ଏକ ବଙ୍ଗାଳୀ ବ୍ରାହ୍ମଣ ପରିବାରରେ ଜନ୍ମଗ୍ରହଣ କରିଥିଲେ । ଭାରତର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁଙ୍କ କ୍ୟାବିନେଟରେ ଶ୍ୟାମାପ୍ରସାଦ ଶିଳ୍ପ ଏବଂ ଯୋଗାଣ ମନ୍ତ୍ରୀ ଥିଲେ, କିନ୍ତୁ ପରେ ସେ ନେହେରୁ କ୍ୟାବିନେଟରୁ ଇସ୍ତଫା ଦେଇ ଶ୍ୟାମା ପ୍ରସାଦ ମୁଖାର୍ଜୀ ୧୯୫୧ରେ ଭାରତୀୟ ଜନସଂଘ ଗଠନ କରିଥିଲେ । ସେହି ଭାରତୀୟ ଜନସଂଘ ଯାହାର ଆଦର୍ଶଗତ ଏଜେଣ୍ଡା ବିଜେପି ଗଠନକୁ ପ୍ରେରଣା ଦେଇଥିଲା । ଇତିହାସ ସାକ୍ଷୀ ଅଛି ଯେ ଜନସଂଘ (ବର୍ତ୍ତମାନ ବିଜେପି) ବଙ୍ଗଳାରେ ଜନ୍ମ ହୋଇଥିଲା, କିନ୍ତୁ ରାଜନୈତିକ ବିଡ଼ମ୍ବନା ହେଉଛି ଯେ ବିଜେପି ଦୀର୍ଘ ଦିନ ଧରି ବଙ୍ଗରେ ଶାସନ ଭାର ସମ୍ଭାଳି ପାରିନଥିଲା । ଏଥର ନିର୍ବାଚନ ଜିତି ପ୍ରଥମ ଥର ଲାଗି ପଶ୍ଚିମବଙ୍ଗରେ ସରକାର ଗଢିଛି ବିଜେପି ।

ଅଧିକ ଖବର ପଢନ୍ତୁ...