Mamata Banerjee Attacked / ମମତା ବାନାର୍ଜୀଙ୍କୁ ଆକ୍ରମଣ; ପଥର ଫିଙ୍ଗାଯାଇଥିବା ଆଣିଲେ ଅଭିଯୋଗ

କୋଲକାତା: ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (TMC) ସୁପ୍ରିମୋ ମମତା ବାନାର୍ଜୀଙ୍କ ଉପରେ ଆକ୍ରମଣ । ବିରୋଧ ପ୍ରଦର୍ଶନକାରୀ ତାଙ୍କ କାର ଉପରକୁ ପଥରମାଡ଼ ଓ କାଦୁଅ ଫିଙ୍ଗିଥିବା ମମତା ଅଭିଯୋଗ ଆଣିଛନ୍ତି । ଦଳର ଦିବଙ୍ଗତ କାର୍ଯ୍ୟକର୍ତ୍ତା ବିରଜୁ କେଓଟଙ୍କ ଘରକୁ ଯିବା ସମୟରେ ତାଙ୍କ ଉପରେ ଏହି ଆକ୍ରମଣ ହୋଇଛି ଓ ବିରୋଧ ପ୍ରଦର୍ଶନକାରୀ ତାଙ୍କ କାରକୁ ରୋକିବାକୁ ଚେଷ୍ଟା କରିଥିବା ସେ ଅଭିଯୋଗ କରିଛନ୍ତି ।

ଉତ୍ତର ୨୪ ପ୍ରଗଣା ଜିଲ୍ଲାର ହଲିସହରରେ ଏହି ଘଟଣା ଘଟିଛି । ଯେତେବେଳେ ମମତା ଗାଁରେ ପହଞ୍ଚିଥିଲେ ସେତେବେଳେ ପ୍ରଦର୍ଶନକାରୀ ତାଙ୍କ ଗାଡ଼ିକୁ ଘେରିଯାଇଥିଲେ । କାର ଉପରକୁ ଚପଲ ଓ ଜୋତା ଫିଙ୍ଗିଥିବାବେଳେ 'ଚୋର ଚୋର' ନାରା ଦେଇଥିଲେ । ଏପରିକି ବିକ୍ଷୋଭକାରୀମାନେ ତାଙ୍କ କାର ଉପରକୁ କାଦୁଅ, ପାଣି ବୋତଲ ଫିଙ୍ଗିଥିଲେ । ମମତାଙ୍କୁ 'ଡାକୁମାନଙ୍କ ରାଣୀ' ବୋଲି ମଧ୍ୟ ସମ୍ବୋଧନ କରିଥିଲେ ।

• କଣ ଅଭିଯୋଗ କଲେ ମମତା ?

ଆକ୍ରମଣକୁ ନେଇ ମମତା ଅଭିଯୋଗ କରିଛନ୍ତି, "କିଛି ଅସାମାଜିକ ଲୋକ ମୋ କାର ଉପରକୁ ପଥରମାଡ଼ କରିଥିଲେ । ଯଦି ମୋ କାର ଝରକା ବନ୍ଦ ହୋଇନଥାନ୍ତା, ତେବେ ମୋତେ ଆଘାତ ଲାଗିଥାନ୍ତା । ମୁଁ ପୂର୍ବରୁ ଏପରି ଆକ୍ରମଣର କେବେ ହେଲେ ସାମ୍ନା କରିନାହିଁ । ପୋଲିସ ମୋତେ ସୁରକ୍ଷା ଦେବାଲାଗି କିଛି ପଦକ୍ଷେପ ଗ୍ରହଣ କରିନାହିଁ ।" ମମତାଙ୍କ ସହିତ ଲୋକସଭା ସାଂସଦ କଲ୍ୟାଣ ବାନାର୍ଜୀ ଓ ରାଜ୍ୟସଭା ସାଂସଦ ଦୋଳା ସେନ୍ ମଧ୍ୟ ରହିଥିଲେ ।

• ଆସିଲା ଶାସକ ଦଳର ପ୍ରତିକ୍ରିୟା

ମମତାଙ୍କ ଉପରେ ଆକ୍ରମଣକୁ ନେଇ ପଶ୍ଚିମବଙ୍ଗ ରାଜ୍ଯ ବିଜେପି ମୁଖ୍ୟ ସମିକ ଭଟ୍ଟାଚାର୍ଯ୍ୟ ପ୍ରତିକ୍ରିୟା ରଖିଛନ୍ତି । ରାଜ୍ୟ ସରକାର କେବେହେଲେ କୌଣସି ହିଂସାକୁ ପ୍ରଶୟ ଦେଇନାହାନ୍ତି । ଯେଉଁମାନେ ମମତାଙ୍କ ଉପରେ ଆକ୍ରମଣ କରିଛନ୍ତି, ସେହି ବିକ୍ଷୋଭକାରୀମାନଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ସରକାର ପୋଲିସକୁ ନିର୍ଦ୍ଦେଶ ଦେଇଛନ୍ତି । ଟିଏମସି ସରକାରରେ ହୋଇଥିବା ଦୁର୍ନୀତିକୁ ନେଇ ଏହା ପୂର୍ବରୁ ମମତାଙ୍କ ପୁତୁରା ତଥା ଟିଏମସି ସାଂସଦ ଅଭିଷେକ ବାନାର୍ଜୀଙ୍କ ଉପରେ ମଧ୍ୟ ଆକ୍ରମଣ ହୋଇଥିଲା । ଏତେ ବର୍ଷ ଟିଏମସି ଶାସନ କରିବାପରେ ମଧ୍ୟ ପକ୍କା ରାସ୍ତା ଖଣ୍ଡିଏ ନଥିବାରୁ ଅଭିଷେକଙ୍କୁ ବିରୋଧ କରାଯାଇଥିଲା।

ପଢନ୍ତୁ ଏହି ଖବର: ଡ୍ରେସ ଚିରିଲେ, ଅଣ୍ଡା ଫିଙ୍ଗିଲେ...ଶେଷରେ ହେଲମେଟ୍ ପିନ୍ଧି ବାହାରିଲେ ଅଭିଷେକ ବାନାର୍ଜୀ

ଅନ୍ୟପଟେ ମମତାଙ୍କ କାର ଉପରେ ଆକ୍ରମଣ ହେଉଥିବାର ଭିଡିଓ ସାମ୍ନାକୁ ଆସିଛି । ଯେଉଁଥିରେ ପୋଲିସ ବିକ୍ଷୋଭକାରୀଙ୍କୁ ଘଉଡ଼ାଉଥିବା ଦେଖିବାକୁ ମିଳିଛି । ଭିଡିଓରୁ ପ୍ରଦର୍ଶନକାରୀଙ୍କୁ ଚିହ୍ନଟ କରାଯାଇ କାର୍ଯ୍ଯାନୁଷ୍ଠାନ ଗ୍ରହଣ କରାଯିବ ବୋଲି ପଶ୍ଚିମବଙ୍ଗ ରାଜ୍ୟ ବିଜେପି ମୁଖ୍ୟ କହିଛନ୍ତି । ଆଜି ସକାଳେ ମମତା ଉତ୍ତର ୨୪ ପ୍ରଗଣା ଯାଇଥିବାବେଳେ ତାଙ୍କୁ ବିକ୍ଷୋଭକାରୀଙ୍କ ସାମ୍ନା କରିବାକୁ ପଡ଼ିଥିଲା ।