Mamata Banerjee / କୋର୍ଟରୁ ଦିଦିଙ୍କୁ ବଡ଼ ରାଜନୈତିକ ଝଟକା; ବିରୋଧୀ ଦଳ ନେତାକୁ ନେଇ ଆସିଲା ବଡ଼ ରାୟ

ପଶ୍ଚିମବଙ୍ଗରେ କ୍ଷମତା ପରିବର୍ତ୍ତନ ପରେ ବିରୋଧୀ ଦଳ ନେତାଙ୍କୁ ନେଇ ଉତ୍ତେଜନା ବୃଦ୍ଧି ପାଇଛି । ଏହି ସମୟରେ ଆସିଛି କଲିକତା ହାଇକୋର୍ଟଙ୍କ ଏକ ଗୁରୁତ୍ୱପୂର୍ଣ୍ଣ ରାୟ । ବାଚସ୍ପତିଙ୍କ ନିଷ୍ପତ୍ତି ଉପରେ ମଧ୍ୟବର୍ତ୍ତୀକାଳୀନ ସ୍ଥଗିତାଦେଶ ଦେବାକୁ ମନା କରିଦେଇଛନ୍ତି ହାଇକୋର୍ଟ । ଏଣୁ ରୀତବ୍ରତ ବାନାର୍ଜୀ ବିରୋଧୀ ଦଳ ନେତା ରହିବେ । ବର୍ତ୍ତମାନ ପାଇଁ ବାଚସ୍ପତିଙ୍କ ନିଷ୍ପତ୍ତିରେ ​​କୌଣସି ହସ୍ତକ୍ଷେପ କରାଯିବାକୁ ଦିଆଯିବ ନାହିଁ ବୋଲି ବିଚାରପତି କୃଷ୍ଣ ରାଓ କହିଛନ୍ତି । ପରବର୍ତ୍ତୀ ଶୁଣାଣି ୧୮ ଜୁଲାଇରେ ପୁଣି ଆରମ୍ଭ ହେବ।

ଏପଟେ ବିଧାନସଭା ବାଚସ୍ପତିଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରି ମମତା ବାନାର୍ଜୀ କୋଲକାତା ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲେ । ଟିଏମସି ବିଧାୟକ ଓ ମମତା ବାନାର୍ଜୀଙ୍କ ଘନିଷ୍ଠ ଶୋଭନଦେବ ଚଟ୍ଟୋପାଧ୍ୟାୟ, ବାଚସ୍ପତିଙ୍କ ନିଷ୍ପତ୍ତି ଉପରେ ରୋକ ଲଗାଇବା ପାଇଁ ହାଇକୋର୍ଟଙ୍କୁ ଆବେଦନ କରିଥିଲେ । କିନ୍ତୁ କୋଲକାତା ହାଇକୋର୍ଟ ବାଚସ୍ପତିଙ୍କ ନିଷ୍ପତ୍ତିକୁ ବଳବତ୍ତର ରଖିବା ପରେ ଦିଦିଙ୍କୁ ଲାଗିଛି ଆଉ ଏକ ଝଟକା ।

• ବଜେଟ ଅଧିବେଶନ ପୂର୍ବରୁ ଆସିଲା ରାୟ

ଗୁରୁବାର କଲିକତା ହାଇକୋର୍ଟ ଶୋଭନଦେବଙ୍କ ଦ୍ୱାରା ଦାୟର ମାମଲାର ଶୁଣାଣି କରି ବାଚସ୍ପତିଙ୍କ ନିଷ୍ପତ୍ତିକୁ ବଳବତ୍ତର ରଖିଥିଲେ । କଲିକତା ହାଇକୋର୍ଟର ଜଷ୍ଟିସ୍ କୃଷ୍ଣ ରାଓ ବିରୋଧୀ ଦଳ ନେତା ରୀତବ୍ରତ ବାନାର୍ଜୀଙ୍କୁ ଆଶ୍ୱସ୍ତି ପ୍ରଦାନ କରି ତାଙ୍କୁ ପଦବୀରେ ରହିବାକୁ ନିର୍ଦ୍ଦେଶ ଦେଇଥିଲେ । ସେପଟେ ପଶ୍ଚିମବଙ୍ଗ ବିଧାନସଭାର ବଜେଟ୍ ଅଧିବେଶନ ଆଜି ପୁଣି ଆରମ୍ଭ ହୋଇଛି । ଅଧିବେଶନ ଆରମ୍ଭ ହେବାର ମାତ୍ର କିଛି ଘଣ୍ଟା ପୂର୍ବରୁ ଆସିଥିବା ଏହି ନିର୍ଦ୍ଦେଶ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।

• ପୂରା ଘଟଣା କଣ ଜାଣନ୍ତୁ

ବାଲିଗଞ୍ଜ ବିଧାୟକ ଶୋଭନଦେବ ଚାଟାର୍ଜୀଙ୍କୁ ବିରୋଧୀ ଦଳ ନେତା କରିବା ପାଇଁ ଅଲ୍ ଇଣ୍ଡିଆ ତୃଣମୂଳ କଂଗ୍ରେସ (AITC)ର ସମ୍ପାଦକ ଅଭିଷେକ ବାନାର୍ଜୀ ପ୍ରସ୍ତାବ ଦେଇଥିଲେ । ଏହି ସମୟରେ, ଏଣ୍ଟାଲି ବିଧାୟକ ସନ୍ଦିପନ ସାହା ୫୮ ଜଣ ବିଧାୟକଙ୍କ ସମର୍ଥନ ସହିତ ପୂର୍ବ ଉଲୁବେରିଆର ବିଧାୟକ ରୀତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବରେ ନିଯୁକ୍ତ କରାଯିବା ପାଇଁ ପ୍ରସ୍ତାବ ଦେଇଥିଲେ । ଏହାପୂର୍ବରୁ ଜୁନ ୧ ତାରିଖରେ ଟିଏମସି ଦଳ ବିରୋଧୀ କାର୍ଯ୍ୟକଳାପ ପାଇଁ ଋତବ୍ରତଙ୍କୁ ଦଳରୁ ବିଦା କରିଥିଲା । ସେପଟେ ବିଧାନସଭା ବାଚସ୍ପତି ରଥିନ୍ଦ୍ରନାଥ ବସୁ ରୀତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବରେ ଚୟନ କରିଛନ୍ତି । ସେପଟେ ହାଇକୋର୍ଟ କହିଛନ୍ତି ଯେ ବାଚସ୍ପତିଙ୍କ ନିଷ୍ପତ୍ତିରେ ​​ବର୍ତ୍ତମାନ କୌଣସି ହସ୍ତକ୍ଷେପ ନାହିଁ। ତଥାପି ଏହି ମାମଲାର ଶୁଣାଣି ୨୮ ଜୁଲାଇରେ ପୁଣି ଥରେ ହେବ ।

ପଢନ୍ତୁ ଏହି ଖବର: NCPI ଦଳ ଭିତରେ ମହାଭାରତ; ଅଜଣା ରାଜନୈତିକ ଦଳରେ ମିଶ୍ରଣ ୨୦ TMC ସାଂସଦଙ୍କୁ ପଡ଼ିବ କି ଭାରି ?

• ଦୁଇ ଗୋଷ୍ଠୀରେ ବିଭାଜିତ TMC

୨୦୨୬ ବିଧାନସଭା ନିର୍ବାଚନରେ ତୃଣମୂଳ କଂଗ୍ରେସର ଶୋଚନୀୟ ପରାଜୟ ପରେ ଦଳ ସମ୍ପୂର୍ଣ୍ଣ ଦୁର୍ବଳ ହୋଇଯାଇଛି । ମମତା ବାନାର୍ଜୀଙ୍କ ଟିଏମସି ଏବେ ଦୁଇଟି ଗୋଷ୍ଠୀରେ ବିଭକ୍ତ । ଗୋଟିଏ ଗୋଷ୍ଠୀ ମମତା ବାନାର୍ଜୀଙ୍କୁ ସମର୍ଥନ କରୁଥିବା ବେଳେ ଅନ୍ୟଟି ରୀତବ୍ରତ ବାନାର୍ଜୀଙ୍କ "ବିଦ୍ରୋହୀ ଗୋଷ୍ଠୀ"କୁ ସମର୍ଥନ କରେ ।