ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ (TMC)ର ୨୦ ବିଦ୍ରୋହୀ ସାଂସଦ ଏକ ଅଜଣା ରାଜନୈତିକ ଦଳ ‘ନ୍ୟାସନାଲିଷ୍ଟ ସିଟିଜେନ୍ସ ପାର୍ଟି ଅଫ୍ ଇଣ୍ଡିଆ’ (NCPI) ସହ ମିଶ୍ରଣ କରିବା ପରେ ଦିଲ୍ଲୀରୁ କୋଲକାତା ହଲଚଲ । ହେଲେ ଏହି ବଡ଼ ରାଜନୈତିକ ମହାମିଶ୍ରଣ ଭିତରେ NCPI ଦଳ ଭିତରେ ହିଁ ମହାଭାରତ ଆରମ୍ଭ ହୋଇଯାଇଛି । ଦଳର ଦୁଇ ପ୍ରମୁଖ ନେତା ଶାନ୍ତନୁ ଦେ ଏବଂ ଶେଉଳି କୁଣ୍ଡୁଙ୍କ ପରସ୍ପର ବିରୋଧୀ ବୟାନ ଏବେ ଚର୍ଚ୍ଚାକୁ ଦ୍ୱିଗୁଣିତ କରିଦେଇଛି ।

• କାହିଁକି NCPIରେ ଅନ୍ତଃକନ୍ଦଳ ?

ନିଜକୁ ଦଳର ସଂସ୍ଥାପକ ଓ ରାଷ୍ଟ୍ରୀୟ ସଂଗଠନ ସମ୍ପାଦକ ଦାବି କରୁଥିବା ଶାନ୍ତନୁ ଦେ ଗଣମାଧ୍ୟମ ସାମ୍ନାରେ ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ, ସୋସିଆଲ ମିଡିଆ ଏବଂ ଟିଭି ନ୍ୟୁଜ୍ ଦେଖି ସେ ଏହି ମିଶ୍ରଣ ବାବଦରେ ଜାଣିବାକୁ ପାଇଲେ । କାକୋଲି ଘୋଷ ଦସ୍ତିଦାରଙ୍କ ଭଳି ବଡ଼ ନେତା ଯଦି ଆଲୋଚନା ପାଇଁ ଡାକିବେ, ତେବେ ସେ ଦିଲ୍ଲୀ ଯିବାକୁ ପ୍ରସ୍ତୁତ । ସେ ସ୍ପଷ୍ଟ କରିଛନ୍ତି ଯେ ଦଳ ବଢ଼ିଲେ ସେ ଖୁସି ଏବଂ ସେମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତଥା NDA ସହ ମିଶି ଦେଶ ପାଇଁ କାମ କରିବାକୁ ଚାହାନ୍ତି । ହେଲେ ଦଳର ସଭାପତି ତାଙ୍କୁ ଏଯାଏଁ କୌଣସି ଫୋନ୍ କରିନାହାନ୍ତି ।

ଶାନ୍ତନୁ ଦେ’ଙ୍କ ଏହି ବୟାନ ପରେ ପାଲଟା ଜବାବ ରଖିଛନ୍ତି ଶେଉଳି କୁଣ୍ଡୁ । ସେ ଶାନ୍ତନୁଙ୍କ ସମସ୍ତ ଦାବିକୁ ସିଧାସଳଖ ପ୍ରତ୍ୟାଖ୍ୟାନ କରିଛନ୍ତି । ଶେଉଳି କହିଛନ୍ତି ଯେ, ଶାନ୍ତନୁ ଦେ ଦଳର ପ୍ରତିଷ୍ଠାତା କିମ୍ବା ସାଧାରଣ ସମ୍ପାଦକ ନୁହନ୍ତି, ବରଂ ୨୦୨୩ ପରଠାରୁ ସେ ଦଳର ସଦସ୍ୟ ମଧ୍ୟ ନାହାନ୍ତି । ଶେଉଳି ନିଜେ ଦଳର ପ୍ରତିଷ୍ଠାତା ସଭାପତି ଥିଲେ, କିନ୍ତୁ ହାଇକୋର୍ଟରେ ଓକିଲାତି ଯୋଗୁଁ ସମୟ ଦେଇ ନପାରିବାରୁ ସେ ସଭାପତି ପଦରୁ ଇସ୍ତଫା ଦେଇ ସାରିଛନ୍ତି । ଏବେର ନୂଆ ସଭାପତି ହିଁ ଏହି ମିଶ୍ରଣ ବାବଦରେ ସବୁ ତଥ୍ୟ ଦେଇପାରିବେ ।

ପଢନ୍ତୁ ଏହି ଖବର: କାହିଁକି NCPIରେ ମିଶିଲେ TMC ବିଦ୍ରୋହୀ ସାଂସଦ ? କଣ ଏହି ପାର୍ଟିର କାହାଣୀ..

ଏହାରି ଭିତରେ ସବୁଠାରୁ ବଡ଼ କଥା ହେଉଛି, NCPI ଦଳର ପଞ୍ଜୀକୃତ କାର୍ଯ୍ୟାଳୟ ହାୱଡ଼ାର ‘ଜାଗୋ ବିଶ୍ୱ’ ବିଲ୍ଡିଂରେ ରହିଛି, ଯାହା ଉତ୍ତୀୟ କୁଣ୍ଡୁଙ୍କ ସହ ଜଡ଼ିତ । ଗୋଟିଏ ପଟେ ଦଳ ଭିତରେ ପଦବୀ ଓ ସଦସ୍ୟତାକୁ ନେଇ କଳହ ଚାଲିଥିବା ବେଳେ, ଅନ୍ୟପଟେ ୨୦ ଟିଏମସି ସାଂସଦଙ୍କ ଏହି ମିଶ୍ରଣ ବେଙ୍ଗଲ ରାଜନୀତିକୁ ସମ୍ପୂର୍ଣ୍ଣ ଉଷ୍ମ କରିଦେଇଛି ।

• ୨୦୨୩ରେ NCPIର ଗଠନ

ଏନପିସିଆଇ ୨୦୨୩ରେ ଗଠିତ ହୋଇଥିଲା ଏବଂ ତ୍ରିପୁରା ବିଧାନସଭା ନିର୍ବାଚନରେ ​​ପ୍ରାର୍ଥୀ ଦେଇଥିଲା । ଏହି ଦଳ NCPI ଭାବେ ନିର୍ବାଚନ କମିଶନଙ୍କ ନିକଟରେ ପଞ୍ଜୀକୃତ ଥିବା ଜଣାପଡ଼ିଛି । ନିର୍ବାଚନ କମିଶନଙ୍କ ଅଡିଟ୍ ରିପୋର୍ଟ ଅନୁଯାୟୀ ଏହି ଦଳ ନିର୍ବାଚନ କମିଶନଙ୍କ ନିକଟରେ ଏହାର ଆର୍ଥିକ ଦସ୍ତାବିଜ ଦାଖଲ କରିଥିଲା । ୨୦୨୩ ନିର୍ବାଚନ ପାଇଁ ଦଳକୁ '୭-ପଏଣ୍ଟେଡ୍ ପେନ'ର ନିର୍ବାଚନ ଚିହ୍ନ ଦିଆଯାଇଥିଲା । NCPIର ଜାତୀୟ ସଭାପତି ହେଉଛନ୍ତି ଉତ୍ତିଆ କୁଣ୍ଡୁ, ଯିଏକି ମୂଳତଃ ପଶ୍ଚିମବଙ୍ଗର ଅଧିବାସୀ ।