TMC Crisis / କାହିଁକି NCPIରେ ମିଶିଲେ TMC ବିଦ୍ରୋହୀ ସାଂସଦ ? କଣ ଏହି ପାର୍ଟିର କାହାଣୀ..

ମମତା ବାନାର୍ଜୀଙ୍କ ଟିଏମସି ଦଳର ୨୦ ବିଦ୍ରୋହୀ ସାଂସଦ ନ୍ୟାସନାଲିଷ୍ଟ ସିଟିଜେନ୍ସ ପାର୍ଟି ଅଫ୍ ଇଣ୍ଡିଆ(NCPI) ସହିତ ବିଲୟ ହୋଇଛନ୍ତି । ଏହି ବଡ଼ ରାଜନୈତିକ ଅସ୍ଥିରତା ପରେ NCPI ହଠାତ୍ ଜାତୀୟ ରାଜନୈତିକରେ ଚର୍ଚ୍ଚାର ବିଷୟ ପାଲଟିଛି । ସମସ୍ତେ ବୁଝିବାକୁ ଚେଷ୍ଟା କରୁଛନ୍ତି ଯେ NCPI ଦଳ କେଉଁ ରାଜ୍ୟରୁ ଏବଂ ବିଦ୍ରୋହୀ ଟିଏମସି ସାଂସଦମାନେ କାହିଁକି ଏଥିରେ ଯୋଗ ଦେଉଛନ୍ତି । ଏହି ରାଜନୈତିକ ଦଳ ନିର୍ବାଚନ କମିଶନରେ ପଞ୍ଜୀକୃତ ଥିବା ଜଣାପଡ଼ିଛି ।

ଏନପିସିଆଇ ୨୦୨୩ରେ ଗଠିତ ହୋଇଥିଲା ଏବଂ ତ୍ରିପୁରା ବିଧାନସଭା ନିର୍ବାଚନରେ ​​ପ୍ରାର୍ଥୀ ଦେଇଥିଲା । ଏହି ଦଳ NCPI ଭାବେ ନିର୍ବାଚନ କମିଶନଙ୍କ ନିକଟରେ ପଞ୍ଜୀକୃତ ଥିବା ଜଣାପଡ଼ିଛି । ନିର୍ବାଚନ କମିଶନଙ୍କ ଅଡିଟ୍ ରିପୋର୍ଟ ଅନୁଯାୟୀ ଏହି ଦଳ ନିର୍ବାଚନ କମିଶନଙ୍କ ନିକଟରେ ଏହାର ଆର୍ଥିକ ଦସ୍ତାବିଜ ଦାଖଲ କରିଥିଲା । ୨୦୨୩ ନିର୍ବାଚନ ପାଇଁ ଦଳକୁ '୭-ପଏଣ୍ଟେଡ୍ ପେନ'ର ନିର୍ବାଚନ ଚିହ୍ନ ଦିଆଯାଇଥିଲା ।

• ତ୍ରିପୁରାର ୩ଟି ଆସନରେ ପ୍ରାର୍ଥୀ ଦେଇଥିଲା NCPI

୨୦୨୩ ତ୍ରିପୁରା ବିଧାନସଭା ନିର୍ବାଚନରେ ​​NCPI ଦଳ ୩ଟି ଆସନରେ ପ୍ରାର୍ଥୀ ଦେଇଥିଲା । ଦଳ ଚାୱମାନୁ, କୈଳାଶହର ଏବଂ ଅମ୍ବାସାରେ ପ୍ରତିଦ୍ୱନ୍ଦ୍ୱିତା କରିଥିଲା । କିନ୍ତୁ ଦଳକୁ ନିରାଶ ହେବାକୁ ପଡ଼ିଥିଲା, କାରଣ କୌଣସି ପ୍ରାର୍ଥୀଙ୍କୁ ୫୫୦ ଭୋଟ ବି ମିଳିନଥିଲା । ଚାୱମାନୁରେ, ଦଳ ୫୩୬ ଭୋଟ ପାଇଥିଲା, କୈଳାଶହରରେ ୨୮୬ ଭୋଟ ଏବଂ ଅମ୍ବାସାରେ ୩୭୬ ଭୋଟ ପାଇଥିଲା । ଏହାର ଅର୍ଥ ହେଉଛି ଦଳର ଭୋଟ ଆଧାର ସୀମିତ ରହିଥିଲା । ସମସ୍ତ ପ୍ରାର୍ଥୀ ମୋଟ ୧୧୯୮ ଭୋଟ ପାଇଥିଲେ ।

• ଦଳର ସଭାପତି ଉତ୍ତିଆ କୁଣ୍ଡୁ କିଏ ?

NCPIର ଜାତୀୟ ସଭାପତି ହେଉଛନ୍ତି ଉତ୍ତିଆ କୁଣ୍ଡୁ, ଯିଏକି ମୂଳତଃ ପଶ୍ଚିମବଙ୍ଗର ଅଧିବାସୀ । ୨୦୨୬ ମେ ୧୦ ତାରିଖରେ ତାଙ୍କର ଏକ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା, ଯେଉଁଥିରେ ସେ ବର୍ତ୍ତମାନର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତତ୍କାଳୀନ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀଙ୍କ ସହ ଦେଖାଯାଉଥିଲେ । ଉତ୍ତିଆ କୁଣ୍ଡୁ ତାଙ୍କର ସୋସିଆଲ ମିଡିଆ ପୃଷ୍ଠାଗୁଡ଼ିକୁ ଟିଏମସି ମୁଖ୍ୟ ମମତା ବାନାର୍ଜୀ ଏବଂ ଅଭିଷେକ ବାନାର୍ଜୀଙ୍କୁ ରାଜନୈତିକ ଭାବରେ ଟାର୍ଗେଟ କରିବା ପାଇଁ ମଧ୍ୟ ବ୍ୟବହାର କରିଥିଲେ ।

• ନିର୍ବାଚନ ପାଇଁ NCPIକୁ ମିଳିଥିଲା ପାଣ୍ଠି

ଉତ୍ତିଆ କୁଣ୍ଡୁଙ୍କ ପତ୍ନୀ ଶେଭାଲି କୁଣ୍ଡୁଙ୍କ ନାମ ବି ଦଳରେ ସାମିଲ । ସେ ଦଳର କୋଷାଧ୍ୟକ୍ଷ । ଶେଭାଲି କୁଣ୍ଡୁ ଦୁଇଟି ସଂଗଠନ ବିଶ୍ୱବଜାର ପ୍ରାଇଭେଟ୍ ଲିମିଟେଡ୍ ଏବଂ ମହିଳା କର୍ମୀ ଆସୋସିଏସନର ନିର୍ଦ୍ଦେଶିକା, ଯାହା ମଧ୍ୟରୁ ଗୋଟିଏ ସାମାଜିକ କାର୍ଯ୍ୟରେ ଜଡ଼ିତ । ତ୍ରିପୁରା ବିଧାନସଭା ନିର୍ବାଚନ ସମୟରେ, NCPI ମୋଟ ₹୧,୧୩,୦୦୦ ଦାନ ପାଇଥିଲା ବୋଲି ନିର୍ବାଚନ କମିଶନ ରେକର୍ଡରୁ ମିଳିଛି ।

ପଢନ୍ତୁ ଏହି ଖବର: ଦିଦିଙ୍କ 'ଏପାଙ୍ଗ ଓପାଙ୍ଗ ଝପାଙ୍ଗ' କଣ ? ରୋକ୍ ଲଗାଇଲେ ଶୁଭେନ୍ଦୁ

ଏକ ଜାତୀୟ ଗଣମାଧ୍ୟମ ସଂସ୍ଥାକୁ ପ୍ରତିକ୍ରିୟା ଦେଇ NCPI ଦଳର ପୂର୍ବତନ ସାଧାରଣ ସମ୍ପାଦକ ଶାନ୍ତନୁ ଦେ କହିଛନ୍ତି, "ତ୍ରିପୁରା ଆଦିବାସୀ ଅଞ୍ଚଳ ସ୍ୱୟଂଶାସିତ ଜିଲ୍ଲା ପରିଷଦ କ୍ଷେତ୍ରରେ ଆଦିବାସୀ ସମ୍ପ୍ରଦାୟର ଅଧିକାର ପାଇଁ ଦଳ ୨୦୨୩ ତ୍ରିପୁରା ବିଧାନସଭା ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିଥିଲା । ଦଳ ୭ଟି ଆସନରେ ପ୍ରାର୍ଥୀ ଦେବାକୁ ଯୋଜନା କରିଥିଲା, କିନ୍ତୁ ଶେଷରେ କେବଳ ୩ଟିରେ ପ୍ରତିଦ୍ୱନ୍ଦ୍ୱିତା କରିଥିଲା ।"

• ପଶ୍ଚିମବଙ୍ଗ ପଞ୍ଚାୟତ ନିର୍ବାଚନରେ ​ଲଢିବ NCPI​

ଶାନ୍ତନୁ ଦେ କହିଛନ୍ତି ଯେ NCPI ୨୦୨୩ରେ ପଶ୍ଚିମବଙ୍ଗରେ ପଞ୍ଚାୟତ ନିର୍ବାଚନ ଲଢ଼ିବାକୁ ଯୋଜନା କରିଥିଲା । କିନ୍ତୁ ପାଣ୍ଠିକୁ ନେଇ ଦଳ ଭିତରେ ଆଭ୍ୟନ୍ତରୀଣ ଦ୍ୱନ୍ଦ୍ୱ ନେତାମାନଙ୍କ ମଧ୍ୟରେ ମତଭେଦ ସୃଷ୍ଟି କରିଥିଲା, ଯାହା ଫଳରେ କାମ ସ୍ଥଗିତ ରହିଥିଲା । ଶାନ୍ତନୁ ଦେଙ୍କ ଅନୁଯାୟୀ, ଦଳ ତାଙ୍କୁ ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନ ପାଇଁ ପ୍ରସ୍ତୁତ ହେବାକୁ ମଧ୍ୟ କହିଥିଲା । କିନ୍ତୁ ଏହି ପ୍ରସ୍ତାବ ଆଗକୁ ବଢ଼ିପାରିଲା ନାହିଁ । ଏବେ ହଠାତ୍ ପ୍ରାୟ ୨୦ ଟିଏମସି ସାଂସଦ ଦଳରେ ଯୋଗଦ ଦେବା ପରେ ଦଳ ଆହୁରି ସୁଦୃଢ ହୋଇଛି ।

• ଲୋକସଭାରେ NCPIକୁ ସ୍ୱୀକୃତି ମିଳିବ କି ?

ବିଦ୍ରୋହୀ ଟିଏମସି ସାଂସଦମାନେ ରବିବାର ଲୋକସଭା ବାଚସ୍ପତି ଓମ ବିର୍ଲାଙ୍କୁ ଭେଟି ସଂସଦରେ ଅଲଗା ଆସନ ବ୍ୟବସ୍ଥା ଦାବି କରିଥିଲେ । ବିଦ୍ରୋହୀ ସାଂସଦ କାକୋଲି ଘୋଷ ଏବଂ ସୁଦୀପ ବନ୍ଦୋପାଧ୍ୟାୟ କହିଥିଲେ ଯେ ସେମାନେ ଏକ ଅଲଗା ସଂସଦୀୟ ଗୋଷ୍ଠୀ ଭାବରେ ମାନ୍ୟତା ପାଇଁ ଅନୁରୋଧ କରି ଏକ ପତ୍ର ଦାଖଲ କରିଥିଲେ । ଓମ ବିର୍ଲାଙ୍କ ସହ ସେମାନଙ୍କର ସାକ୍ଷାତର ଏକ ଫଟୋ ମଧ୍ୟ ସାମ୍ନାକୁ ଆସିଛି ।

ପଢନ୍ତୁ ଏହି ଖବର: ମମତାଙ୍କ ସାୟନି ସାଜିଲେ ବିଦ୍ରୋହୀ, ୧୭ବର୍ଷରେ ସାଜିଥିଲେ ହିରୋଇନ୍‌; ପାଖରେ ରଖିଛନ୍ତି କେତେ ସମ୍ପତ୍ତି ?

ସୁଦୀପ ବନ୍ଦୋପାଧ୍ୟାୟ କହିଛନ୍ତି ଯେ ଏକ ଦଳ ଭାବରେ NPCI ଏବେ ଲୋକସଭାରେ ଅଲଗା ଭାବରେ ବସିବ ଏବଂ NDAକୁ ସମର୍ଥନ କରିବ । ଏବେ ପ୍ରଶ୍ନ ହେଉଛି ଯେ NCPI ଲୋକସଭାରେ ପୃଥକ ଆସନ ବ୍ୟବସ୍ଥା ପାଇବ କି ? ଏହି ପ୍ରସଙ୍ଗରେ ଲୋକସଭା ବାଚସ୍ପତି ଓମ ବିର୍ଲାଙ୍କ ଠାରୁ ଉତ୍ତର ଅପେକ୍ଷା କରାଯାଇଛି।