Argus News - ମୁଖ୍ୟମନ୍ତ୍ରୀ ପଦ ଛାଡ଼ିଲେ ନୀତିଶ କୁମାର, ସମ୍ରାଟ ଚୌଧୁରୀ ହୋଇପାରନ୍ତି ବିହାରର ନୂଆ CM

ପାଟନା: ବିହାରର ନୂଆ ମୁଖ୍ୟମନ୍ତ୍ରୀ ନାଁ ଘୋଷଣାକୁ ଆଉ ମାତ୍ର କେଇ ଘଣ୍ଟାର ଅପେକ୍ଷା । ତା' ପୂର୍ବରୁ ନୀତିଶ କୁମାର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି । ପାଟନା ସ୍ଥିତ ଲୋକଭବନ ପହଞ୍ଚି ରାଜ୍ୟପାଳ ଲେଫ୍ଟନାଣ୍ଟ ଜେନରାଲ ଅତା ହସନୈନଙ୍କୁ ଇସ୍ତଫା ପତ୍ର ଦେଇଛନ୍ତି ନୀତିଶ କୁମାର ।

ମଙ୍ଗଳବାର ଅପରାହ୍ଣ ୪ଟାରେ NDAର ବିଧାୟକ ଦଳ ବୈଠକ ବସିବ । ପରବର୍ତ୍ତୀ ମୁଖ୍ୟମନ୍ତ୍ରୀ ଚୟନ ପାଇଁ ଶିବରାଜ ସିଂହ ଚୌହାନ ପର୍ଯ୍ୟବେକ୍ଷକ ଥିବାବେଳେ ପାଟନାରେ ପହଞ୍ଚି ସାରିଛନ୍ତି । ଶିବରାଜହ୍କ ସହ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନ, ରାଷ୍ଟ୍ରୀୟ ମହାସଚିବ ବିଏଲ୍ ସନ୍ତୋଷ ମଧ୍ୟ ପହଞ୍ଚିଛନ୍ତି ।

ଏଥିସହ ପଢ଼ନ୍ତୁ: ପାଟନା ଛାଡ଼ି ଦିଲ୍ଲୀ ଯିବେ ନୀତିଶ; କିଏ ହେବେ ପରବର୍ତ୍ତୀ CM?

ସିଏମ୍ ରେସ୍‌ରେ ସମ୍ରାଟ ଆଗରେ

ବିହାରର ପରବର୍ତ୍ତୀ ମୁଖ୍ୟମନ୍ତ୍ରୀ ରେସ୍‌ରେ ବିଜେପିର ସମ୍ରାଟ ଚୌଧୁରୀ ସବୁଠୁ ଆଗରେ ଅଛନ୍ତି । କିନ୍ତୁ ନିଷ୍ପତ୍ତି ଏନଡିଏର ବିଧାୟକ ଦଳ ବୈଠକରେ ନିଆଯିବ । ମୁଖ୍ୟମନ୍ତ୍ରୀ ନାଁ ଘୋଷଣା ପରେ ଶପଥଗ୍ରହଣ ବୁଧବାର ହେବ ।

ନୀତିଶଙ୍କ ରାଜନୈତିକ ଯାତ୍ରା

ପ୍ରଥମଥର ୨୪ ନଭେମ୍ବର ୨୪ରେ ନୀତିଶ କୁମାର ବିହାର ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ବିଜେପି-ଜେଡିୟୁ ମେଣ୍ଟରେ ନୀତିଶ ନେଇଥିଲେ ମୁଖ୍ୟମନ୍ତ୍ରୀ ପଦର ଶପଥ । ଶପଥର ଠିକ୍ ଦିନକ ପରେ ନୀତିଶ ପ୍ରଥମ କ୍ୟାବିନେଟ୍ ବୈଠକ ଡାକିଥିଲେ ।

ସୁଶାସନ ପ୍ରତିଶ୍ରୁତି ଦେଇ କ୍ଷମତାକୁ ଆସିଥିଲେ ନୀତିଶ କୁମାର । ଯେତେବେଳେ ବିହାରରେ ଅପରାଧ ଚରମରେ ପହଞ୍ଚିଥିଲା... ସେତେବେଳେ ନୀତିଶ କହିଥିଲେ- "ଅଧିକାଂଶ ଅପରାଧ ଓ ଅରାଜକାର କାରଣ ଜମି ଝଗଡ଼ା ।" ସେ ସମସ୍ତ ଜିଲ୍ଲାପାଳଙ୍କୁ ରାଜସ୍ଵ ବିଭାଗର କ୍ୟାମ୍ପ କରି ମାମଲାର ତ୍ଵରିତ ସମଧାନ କରିବାକୁ ଗୁରୁତ୍ଵ ଦେଇଥିଲେ ।

ଏଥିସହ ପଢ଼ନ୍ତୁ: ୪୭ ବର୍ଷରେ ପହଞ୍ଚିଲା ବିଜେପି; ଜାଣନ୍ତୁ ଦଳ ସହ ଜଡ଼ିତ କିଛି ରୋଚକ ପୂର୍ଣ୍ଣ ତଥ୍ୟ

୨୦ ବର୍ଷ ଧରି ବିହାର ମୁଖ୍ୟମନ୍ତ୍ରୀ ରହିଥିବା ନୀତିଶ ନିଜକୁ ସୁଶାସନ ବାବୁ ଭାବେ ପ୍ରତିଷ୍ଠିତ କରିଛନ୍ତି । କ୍ଷମତା ପାଇଁ ବାରମ୍ବାର ବିଜେପି-ଆରଜେଡି ସହ ନୀତିଶ ହାତ ମିଳାଇଛନ୍ତି ।

ନୀତିଶଙ୍କ ଶେଷ କ୍ୟାବିନେଟ୍ ବୈଠକ

ଇସ୍ତଫା ପୂର୍ବରୁ ଆଜି ମଙ୍ଗଳବାର ୨୦୨୬ ଏପ୍ରିଲ୍ ୧୪ରେ ନୀତିଶ କୁମାର ଶେଷ କ୍ୟାବିନେଟ୍ ବୈଠକ କରିଛନ୍ତି । ଯେଉଁ ବୈଠକରେ କୌଣସି ବିକାଶମୂଳକ ଯୋଜନାର ଘୋଷଣା ହୋଇନି । ବରଂ ସରକାର ଭାଙ୍ଗିବା ଏବଂ ଇସ୍ତଫାର ଔପଚାରିକତା ପ୍ରକ୍ରିୟାକୁ ମଞ୍ଜୁରୀ ଦିଆଯାଇଛି । କ୍ୟାବିନେଟ୍‌ରେ ସର୍ବସମ୍ମତି କ୍ରମେ ସରକାର ଭଙ୍ଗ କରିବା ପ୍ରସ୍ତାବ ଗୃହିତ ହୋଇଛି ।