ଆର ମାସରେ ଓଡ଼ିଶା ଆସୁଛନ୍ତି ଅମିତ ଶାହା । ଆଉ ତା ପୂର୍ବରୁ ପୁଣି ତେଜିଛି ବିଜେଡି ଭାଙ୍ଗିବା ଚର୍ଚ୍ଚା । ବିଜେଡିର ବିଧାୟକ ଗୋଷ୍ଠୀ ବିଜେପିରେ ମିଶିବା ନେଇ ସାଂସଦ ପ୍ରଦୀପ ପୁରୋହିତଙ୍କ ବିସ୍ଫୋରକ ବୟାନ ପରେ ରାଜ୍ୟ ସଭାପତିଙ୍କ ପ୍ରତିକ୍ରିୟା ନିଆଁରେ ଘିଅ ଢାଳିଛି । ମନମୋହନ କହିଛନ୍ତି ଅନେକ ବିଜେଡି ଏବଂ କଂଗ୍ରେସ ନେତା ଯୋଗାଯୋଗ କରୁଛନ୍ତି, ରାଜନୈତିକ ସ୍ଥିତି ଦେଖି ନିଷ୍ପତ୍ତି ନେବ ସଂସଦୀୟ ବୋର୍ଡ ।

ସାଂସଦ ପ୍ରଦୀପ ପୁରୋହିତ ଏବଂ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ବୟାନକୁ ନେଇ ତେଜିଲା ଚର୍ଚ୍ଚା । ବିଜେଡିର ଏକ ବଡ଼ ଗୋଷ୍ଠୀ ଏନଡିଏରେ ମିଶି ପାରନ୍ତି । ୪୨ ବିଧାୟକମାନଙ୍କ ମଧ୍ୟରୁ ୫ରୁ ୬ ଜଣଙ୍କୁ ଛାଡିଦେଲେ ଅନ୍ୟ ବିଧାୟକମାନେ ଏନଡିଏ ଆଡ଼କୁ ଆକର୍ଷିତ ବୋଲି କହିଥିଲେ ସାଂସଦ ପ୍ରଦୀପ ପୁରୋହିତ । ଆଉ ତାଙ୍କ ସହ ସ୍ଵର ମିଳାଇ ରାଜ୍ୟ ସଭାପତି ମନମୋହନ ସାମଲ କହିଛନ୍ତି, ବିଜେଡି ଏବଂ କଂଗ୍ରେସର ଅନେକ ନେତା ମିଶିବା ପାଇଁ ଯୋଗ ଯୋଗ କରୁଛନ୍ତି । କିନ୍ତୁ ବର୍ତ୍ତମାନ ପର୍ଯ୍ୟନ୍ତ କୌଣସି ନୀତିଗତ ନିଷ୍ପତ୍ତି ହୋଇନାହିଁ । ରାଜନୈତିକ ସ୍ଥିତି ଦେଖି ସଂସଦୀୟ ବୋର୍ଡ ନିଷ୍ପତ୍ତି ନେବ । ଅନ୍ୟପଟେ ବିଜେଡି କହିଛି, ଏହା କେବଳ ରାଜନୈତିକ ବୟାନବାଜି ।

ଅଧିକ ପଢ଼ନ୍ତୁ: କାହା ହାତରେ ରହିବ TMCର କ୍ଷମତା ? ମମତା କଲେ ବଡ଼ ପରିବର୍ତ୍ତନ

ଯଦିଓ ନିର୍ବାଚନ ପରେ ନେତା ବିଜେଡି ଛାଡ଼ି ବିଜେପି ଯିବା ଏକ ଟ୍ରେଣ୍ଡ ହୋଇଯାଇଛି । ବ୍ଲକ ଏବଂ ପୌର ଅଧ୍ୟକ୍ଷଙ୍କଠାରୁ ରାଜ୍ୟସଭା ସାଂସଦଙ୍କ ପର୍ଯ୍ୟନ୍ତ । ଯଦିଓ ବିଜେଡି ସୁପ୍ରିମୋ ଏହାକୁ ମ୍ୟାନେଜ କରିବାକୁ ଚେଷ୍ଟା କରିଛନ୍ତି କିନ୍ତୁ ବିଫଳ ହୋଇଛନ୍ତି । ଦଳରେ ଏବେ ବି ପାଣ୍ଡିଆନଙ୍କୁ ନେଇ ଅସନ୍ତୋଷ ରହିଥିବା ବେଳେ ନିଆଁରେ ଘିଅ ଢାଳିଛି ସୂଜାତାଙ୍କ ଏଣ୍ଟ୍ରି ଚର୍ଚ୍ଚା । ଜୁଲାଇରେ ସୁଜାତାଙ୍କ ଏଣ୍ଟ୍ରି ସମ୍ଭାବନାକୁ ନେଇ ଏକ ବଡ଼ ଗୋଷ୍ଠୀ ଅସନ୍ତୋଷ ଥିବା କୁହାଯାଉଛି । ଯାହା ବିଧାୟକ ଦଳ ଭାଙ୍ଗିବାର ଏକ ପ୍ରମୁଖ କାରଣ ହୋଇପାରେ ରାଜନୈତିକ ସମୀକ୍ଷକ କହିଛନ୍ତି ।

ଅନ୍ୟପଟେ ବିଧାୟକ ଦଳ ଭାଙ୍ଗିଲେ କ'ଣ ହେବ ସମୀକରଣ ତାକୁ ନେଇ ଚର୍ଚ୍ଚା । ଦୁଇ ତୃତୀୟାଂଶ ବିଧାୟକ ଦଳ ଛାଡ଼ିଲେ ଦଳ ବଦଳ ଆଇନ ଲାଗୁ ହେବ ନାହିଁ । ଅର୍ଥାତ ବିଜେଡିର ୫୦ ବିଧାୟକଙ୍କ ଭିତରୁ ଏକାଥରକେ ଯଦି ୩୪ ଜଣ ଛାଡ଼ି ବିଜେପିରେ ମିଶିବେ ତେବେ ସେମାନଙ୍କ ପାଇଁ ଦଳ ବଦଳ ଆଇନ ଲାଗୁ ହେବ ନାହିଁ । ଆଉ ଯଦି ଏମିତି ହୁଏ ତେବେ ସରକାରରେ ସେମାନଙ୍କୁ କେମିତି ଆଡଜଷ୍ଟ କରାଯିବ ତାହା ବି ବେଶ ରୋଚକ ହୋଇପାରେ ।