କାହାର ହେବ ରାଜ୍ୟସଭାର ଚତୁର୍ଥ ସିଟ୍ । ବିଜେପି କହୁଛି ଏହି ଆସନ ସହ ଦଳ ହାତେଇବ ୩ଟି । କଂଗ୍ରେସ ପାଖରେ ସଂଖ୍ୟା ନାହିଁ କିନ୍ତୁ ନାମାଙ୍କନ ଫର୍ମ କିଣି ଦଳ ୫ଟି ନାଁ ସାମ୍ନାକୁ ଆଣିଛି । ତେବେ ରାଜ୍ୟସଭା ସିଟକୁ ନେଇ ବେଶୀ ଛକାପଞ୍ଝା ଲାଗିଛି ବିଜୁ ଜନତା ଦଳରେ । ଆଜି ଦଳର ବଡ଼ ବୈଠକ ବସିଥିଲା । ଏହି ବୈଠକରେ ସଂତୃପ୍ତ ମିଶ୍ରଙ୍କ ନାଁରେ ମୋହର ବାଜିଥିବା ଚର୍ଚ୍ଚା ହେଉଛି । କିନ୍ତୁ ୟା ଭିତରେ ଖବର ଆସୁଛି ଏହାକୁ ନେଇ ବଢ଼ିପାରେ ଦଳର ବରିଷ୍ଠଙ୍କ ଭିତରେ ଅସନ୍ତୋଷ ।

ସମୟ ଗଡୁଛି ସସପେନ୍ସ ବଢୁଛି । ସରଗରମ ହେଉଛି ରାଜ୍ୟ ରାଜନୀତି । ଚତୁର୍ଥ ଆସନକୁ ନେଇ ବିଜେଡି-ବିଜେପି ଭିତରେ ବଳ କଷାକଷି ଭିତରେ କଂଗ୍ରେସ ମାରିଲା ଏଣ୍ଟ୍ରି । ସଂଖ୍ୟା ନ ନଥାଇ ବି ଫର୍ମ କିଣିବା ସହ ୫ ନାଁ ଆଣିଲା ସାମ୍ନାକୁ । ପିସିସି ସଭାପତି ଦିଲ୍ଲୀ ଯାଇଥିବା ବେଳେ ଆସନ୍ତାକାଲି ଚୂଡାନ୍ତ ନିଷ୍ପତ୍ତି ଆସିବ ବୋଲି କହିଛନ୍ତି ।

ସେପଟେ ଗତକାଲି ୬ ସେଟ୍‌ ଫର୍ମ କିଣିବା ସହ ରାଜନୈତିକ ବ୍ୟାପାର କମିଟି ବୈଠକ ଡାକିଥିବା ବିଜେଡି ଆଜି ବିଧାୟକମାନଙ୍କୁ ନେଇ କରିଛି ମାନସ ମନ୍ଥନ । ପ୍ରସ୍ତାବକ ଭାବେ ବିଧାୟକମାନଙ୍କଠୁ ଦସ୍ତଖତ ନିଆଯାଇଥିବା କୁହାଯାଉଛି । ଆହୁରି ଚର୍ଚ୍ଚା ହେଉଛି ବିଜେଡିର ବୈଠକରେ ସଂତୃପ୍ତ ମିଶ୍ରଙ୍କ ନାଁରେ ମୋହର ମରାଯାଇଛି । ଏହା ସହ ସୁଜାତା କାର୍ତ୍ତିକେୟାନ ଓ ଡାକ୍ତର ରମାକାନ୍ତ ପଣ୍ଡାଙ୍କ ନାଁ ବି ବିକଳ୍ପ ଭାବେ ରଖାଯାଇଥିବା ଚର୍ଚ୍ଚା ହେଉଛି ।

ଚତୁର୍ଥ ଆସନକୁ ନେଇ କଂଗ୍ରେସ ଓ ବିଜେଡି ଗଣିତ କଷୁ ଥିବା ବେଳେ ସ୍ୱତନ୍ତ୍ର ରଣନୀତି ଆପଣେଇଛି ବିଜେପି । ମନ୍ତ୍ରୀ ପ୍ରଦୀପ ବଳ ସାମନ୍ତ କହିଛନ୍ତି ଚତୁର୍ଥ ଆସନ ସହ ୩ଟି ସିଟ୍‌ ହାତେଇବ ବିଜେପି । ପ୍ରଶ୍ନ କାହାର ହେବ ଚତୁର୍ଥ ଆସନ ? ଚତୁର୍ଥ ଆସନ ପାଇଁ ବିଜେଡି ଦେବ କି ପ୍ରାର୍ଥୀ ? ନାଁ କଂଗ୍ରେସର ନିର୍ଦ୍ଦଳୀୟ ପ୍ରାର୍ଥୀଙ୍କୁ କରିବ ସମର୍ଥନ ?

ଏଥିସହ ପଢ଼ନ୍ତୁ: ରାଜ୍ୟସଭା ନିର୍ବାଚନ ପାଇଁ ଆରମ୍ଭ ହେଲା ନାମାଙ୍କନ ପ୍ରକିୟା, ବିଜେଡି ନେଲା ୬ ସେଟ୍ ଫର୍ମ