Odisha Politics / ବଦଳୁଛି କଟକ ରାଜନୀତିର ସମୀକରଣ; ପଦ୍ମ ଧରିଲେ ପ୍ରଭାତ

ଭୁବନେଶ୍ଵର: ପଦ୍ମ ଧରିଲେ ପ୍ରଭାତ ବିଶ୍ଵାଳ । ଚୌଦ୍ୱାର-କଟକର ପ୍ରଭାବଶାଳୀ ନେତା ପ୍ରଭାତ ବିଶ୍ଵାଳ ବିଜେପିରେ ଯୋଗ ଦେଇଛନ୍ତି । ରାଜ୍ୟ ବିଜେପି କାର୍ଯ୍ୟାଳୟରେ ଶତାଧିକ ସମର୍ଥକଙ୍କ ସହ ବିଜେପିରେ ମିଶିଛନ୍ତି ପ୍ରଭାତ । ଏହି ଅବସରରେ ମଞ୍ଚରେ ରାଜ୍ୟ ବିଜେପି ସଭାପତି ମନମୋହନ ସାମଲ, ମୁଖ୍ୟମନ୍ତ୍ରୀ ମୋହନ ମାଝୀ ଉପସ୍ଥିତ ରହିଥିଲେ ।

ପ୍ରଭାତ ବିଶ୍ଵାଳଙ୍କ ସହ ଶତାଧିକ ସମର୍ଥକ ବିଜେପିରେ ସାମିଲ୍ ହୋଇଛନ୍ତି । ପ୍ରଭାତ ବିଶ୍ଵାଳ ହେଉଛନ୍ତି ଚୌଦ୍ୱାର-କଟକର ପୂର୍ବତନ ପ୍ରଭାବଶାଳୀ ବିଜେଡି ନେତା । ବିଜେଡିରୁ ବହିଷ୍କାର ହେବା ପରେ ପ୍ରଭାତ ବିଜେପିରେ ମିଶିବା ନେଇ ବଡ଼ ରାଜନୈତିକ ନିଷ୍ପତ୍ତି ନେଇଛନ୍ତି ।

ଏଥିସହ ପଢ଼ନ୍ତୁ: ରାଜନୈତିକ ପ୍ରତିବାଦରେ ସ୍କୁଲ ପିଲାଙ୍କୁ ବ୍ୟବହାର କରି ଫସିଲା ବିଜେଡି 

ଗତକାଲି ରାଜ୍ୟ ବିଜେପି କାର୍ଯ୍ୟାଳୟକୁ ଯାଇଥିଲେ ପ୍ରଭାତଙ୍କ ପୁଅ ସୌଭିକ ବିଶ୍ଵାଳ । ବାପା ବିଜେପିରେ ଯୋଗ ଦେବା ପୂର୍ବରୁ ସୌଭିକ ବିଜେପି ରାଜ୍ୟ କାର୍ଯ୍ୟାଳୟକୁ ଯିବା ନେଇ ଚର୍ଚ୍ଚା ଜୋର୍ ଧରିଥିଲା । ରାଜ୍ୟସଭା ନିର୍ବାଚନରେ କ୍ରସ୍-ଭୋଟିଂ ପାଇଁ ସୌଭିକଙ୍କୁ ବିଜେଡି ଦଳରୁ ନିଲମ୍ବିତ କରିଛି ।

ଏବେ ପ୍ରଭାତ ବିଶ୍ଵାଳ ବିଜେପିରେ ସାମିଲ୍ ହେବା ନିଶ୍ଚିତ ଭାବେ ବିଜେଡିକୁ ଶକ୍ତ ଝଟ୍‌କା ଦେଇଛି । ପ୍ରଭାତଙ୍କ ପୁଅ ସୌଭିକଙ୍କୁ ବିଜେଡି ଦଳରୁ ନିଲମ୍ବନ କରଥିବାରୁ ସେ ମଧ୍ୟ ପରବର୍ତ୍ତୀ ସମୟରେ ବାପାଙ୍କ ରାସ୍ତାରେ ଆଗକୁ ବଢ଼ିପାରନ୍ତି ବୋଲି ଚର୍ଚ୍ଚା ହେଉଛି ।

ବିଜେପିରେ ଯୋଗଦେବା ପରେ ପ୍ରଭାତ ବିଶ୍ଵାଳ କହିଛନ୍ତି, "ଭାରତୀୟ ଜନତା ପାର୍ଟି ହେଉଛି ଜ୍ଞାନୀ, ଗୁଣି ଓ ସ୍ଵାଭିମାନୀ ଲୋକଙ୍କ ଦଳ । ବିଶ୍ଵାସ ଅଛି ଏଠି ସେବା କରିବାର ସୁଯୋଗ ମିଳିବ । ବିଶାଳ ସଂଗଠନରେ ମୁଁ ଜଣେ ସାଧାରଣ କର୍ମୀ । ସମସ୍ତଙ୍କ ସହ ମିଶି, ସହଯୋଗରେ କାର୍ଯ୍ୟ କରିବି ।"

ବିଜେପିରେ ମିଶିବା ପରେ ପ୍ରଭାତ ବିଜେଡିକୁ ନେଇ ଅସନ୍ତୋଷ ଝାଡ଼ିଛନ୍ତି । ପ୍ରଭାତ କହିଛନ୍ତି, "୨୪ ବର୍ଷ ବହୁତ ପରିଶ୍ରମ କରିଛି । ଦଳ ପାଇଁ ନିଷ୍ଠାର ସହ କାର୍ଯ୍ୟ କରିଥିଲି । ବିଶ୍ଵାସ ଥିଲା ବଣିଆ ସାଜି ସୁନାକୁ ଚିହ୍ନିବେ । ହେଲେ ହେଲା ନାହିଁ, ବିଳମ୍ବ ହେଲା । ବରଂ ଭଲ ହୋଇଛି... ।"

ଏଥିସହ ପଢ଼ନ୍ତୁ: ରାଜ୍ୟ ରାଜନୀତିରେ ନୂଆ ଟ୍ବିଷ୍ଟ,ବିଜେପି ରାଜ୍ୟ କାର୍ଯ୍ୟାଳୟରେ ବିଧାୟକ ସୌଭିକ ବିଶ୍ବାଳ 

ଏହା ପୂର୍ବରୁ ବାରବାଟୀ-କଟକର ନେତା ଦେବାଶିଷ ସାମନ୍ତରାୟ ବିଜେପିରେ ମିଶିଥିଲେ । ରାଜ୍ୟସଭା ସାଂସଦ ପଦ ସହ ବିଜେଡିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇ ବିଜେପିରେ ଯୋଗ ଦେଇଥିଲେ ଦେବାଶିଷ । ଏବେ ପ୍ରଭାତ ବିଶ୍ଵାଳ ମଧ୍ୟ ବିଜେଡି ଛାଡ଼ି ବିଜେପିରେ ମିଶିବା ଦଳକୁ କଟକରେ ଆହୁରି ସୁଦୃଢ଼ କରିବ ।