Raghav Chadha / ଭୋଟର ତାଲିକାରୁ କଟିଲା ରାଘବ ଚଢାଙ୍କ ନାଁ; କାହିଁକି ଚାଲିଲା BLOଙ୍କ ନାଲି ପେନ୍ ?

ନୂଆଦିଲ୍ଲୀ: ପୂର୍ବତନ ଆମ ଆଦମୀ ପାର୍ଟି ନେତା ରାଘବ ଚଢାଙ୍କ ନାମ ଡ୍ରାଫ୍ଟ ଭୋଟର ତାଲିକାରୁ ହଟାଇ ଦିଆଯାଇଛି । ପଞ୍ଜାବରେ ରାଘବଙ୍କ ନାଁ ASDD ତାଲିକାରୁ ହଟାଇ ଦିଆଯାଇଥିବାବେଳେ ରାଘବ ନିଜେ ଏ ନେଇ ସୂଚନା ଦେଇଛନ୍ତି । ତେବେ ଏହା ରାଜନୈତିକ ପ୍ରତିଶୋଧ କାରଣରୁ କରାଯାଇଥିବା ରାଘବ ଅଭିଯୋଗ କରିଛନ୍ତି । ଏବେ ପ୍ରଶ୍ନ ଉଠିଛି ଯେ ଏହି ତାଲିକା କଣ ଓ କାହିଁକି ରାଘବଙ୍କ ବିରୋଧରେ ଚାଲିଛି ବୁଥ୍ ଲେଭେଲ୍ ଅଫିସର (BLO)ଙ୍କ ନାଲି ପେନ୍ ?

ରାଘବ ଏହି ସମ୍ପର୍କରେ ପ୍ରତିକ୍ରିୟା ରଖି କହିଛନ୍ତି, "ମୁଁ ପଞ୍ଜାବର ଜଣେ ରାଜ୍ୟସଭା ସାଂସଦ । ମୋର ଭୋଟର ପରିଚୟ ପତ୍ର ପଞ୍ଜାବର ମୋହାଲିରେ ପଞ୍ଜୀକୃତ । ତଥାପି ମୋ ନାମ ଡ୍ରାଫ୍ଟ ଭୋଟର ତାଲିକାରେ ସ୍ଥାନାନ୍ତରିତ ହୋଇଥିବା ଦର୍ଶାଯାଇଛି । ଭଲ ଖବର ହେଉଛି ଏହା ଚୂଡ଼ାନ୍ତ ଭୋଟର ତାଲିକା ନୁହେଁ, ବରଂ କେବଳ ଏକ ଡ୍ରାଫ୍ଟ ଭୋଟର ତାଲିକା । ଦାବି ଏବଂ ଆପତ୍ତି ପ୍ରକ୍ରିୟା ସମୟରେ ନାମ ସଂଶୋଧନ କରାଯାଏ, ଯାହା ବର୍ତ୍ତମାନ ଚାଲିଛି । ଚୂଡ଼ାନ୍ତ ଭୋଟର ତାଲିକା ଅକ୍ଟୋବର ୨୦୨୬ରେ ପ୍ରକାଶିତ ହେବ ।" ରାଘବ ଅଭିଯୋଗ କରି କହିଛନ୍ତି ଯେ ଏହା କେବଳ ଜଣେ କ୍ଲର୍କଙ୍କ ଭୁଲ ପରି ମନେ ହେଉନାହିଁ । ଏହା ସ୍ପଷ୍ଟ ଭାବରେ ରାଜନୈତିକ ପ୍ରତିଶୋଧ ।

• ପ୍ରତ୍ୟେକ ସ୍ତରରେ ଅଧିକାରୀ ତଥାପି ଭୁଲ କେମିତି ?

ରାଘବ କହିଛନ୍ତି ଯେ ଏହି କାମ ଲାଗି ପଞ୍ଜାବରେ ବୁଥ୍ ସ୍ତରୀୟ ଅଧିକାରୀଙ୍କଠାରୁ ଆରମ୍ଭ କରି ପଞ୍ଜାବର ମୁଖ୍ୟ ନିର୍ବାଚନ ଅଧିକାରୀ (CEO) ପର୍ଯ୍ୟନ୍ତ ପ୍ରତ୍ୟେକ ସ୍ତରରେ ସରକାରୀ ଅଧିକାରୀମାନେ ନିୟୋଜିତ ଅଛନ୍ତି । ବିଏଲଓ ସାଧାରଣତଃ ପଞ୍ଜାବ ସରକାରଙ୍କ ଜଣେ କନିଷ୍ଠ କର୍ମଚାରୀ । ସେମାନଙ୍କ ମଧ୍ୟରେ କାର୍ଯ୍ୟ କରୁଥିବା ସହକାରୀ ନିର୍ବାଚନୀ ପଞ୍ଜୀକରଣ ଅଧିକାରୀ (AERO), ନିର୍ବାଚନୀ ପଞ୍ଜୀକରଣ ଅଧିକାରୀ (ERO) ଏବଂ DEO ମଧ୍ୟ ପଞ୍ଜାବ ସରକାରୀ ଅଧିକାରୀ । ଶୀର୍ଷରେ ଜଣେ ପଞ୍ଜାବ-କ୍ୟାଡର IAS ଅଧିକାରୀ ଅଛନ୍ତି ଯିଏ ପଞ୍ଜାବର ମୁଖ୍ୟ ନିର୍ବାଚନ ଅଧିକାରୀ ଭାବରେ କାର୍ଯ୍ୟ କରନ୍ତି । ତଥାପି ଏପରି ବଡ଼ ଧରଣର ଭୁଲ୍ ହୋଇଛି ।

The AAP government in Punjab has now taken its politics of revenge to the Draft Electoral Rolls.

I am a sitting Rajya Sabha MP from Punjab, with my voter ID registered in Mohali, Punjab. Yet my name has been classified as “shifted” in the draft electoral rolls.

Thankfully,… pic.twitter.com/laAFAAWYiQ

— Raghav Chadha (@raghav_chadha) September 3, 2026

• 'ପ୍ରତିଶୋଧ ନେଇ ଭୋଟର ତାଲିକାରୁ ମୋ ନାଁ କଟାଯାଇଛି'

ରାଜ୍ୟସଭା ସାଂସଦ ଅଭିଯୋଗ କରିଛନ୍ତି ଯେ ପଞ୍ଜାବରେ ଆମ ଆଦମୀ ପାର୍ଟି ରାଜନୈତିକ ଉଦ୍ଦେଶ୍ଯ ରଖି ସରକାରଙ୍କ ଉପରେ ରାଜନୈତିକ ଚାପ ପ୍ରୟୋଗ କରୁଛି । ସେ କହିଛନ୍ତି ଯେ ସେ ଆପ୍ ଛାଡିବା ପରଠାରୁ ନେତାମାନଙ୍କ ମଧ୍ୟରେ କ୍ରୋଧ ରହିଛି । ଆପ୍ ଛାଡି ବିଜେପିରେ ଯୋଗ ଦେଇଥିବା ଅନ୍ୟ ସାଂସଦମାନଙ୍କୁ ମଧ୍ୟ ପଞ୍ଜାବ ସରକାର ଟାର୍ଗେଟ କରିଛନ୍ତି । ଭୋଟର ତାଲିକାରୁ ସେମାନଙ୍କ ନାମ ବାଦ ଦେବା ମଧ୍ୟ ପ୍ରତିଶୋଧ ଭାବନା ଛଡ଼ା ଆଉ କିଛି ନୁହେଁ ବୋଲି କହିଛନ୍ତି ରାଘବ ।

ପଢନ୍ତୁ ଏହି ଖବର: SIR ଯାଞ୍ଚ ପରେ ହଲଚଲ୍, ଭୋଟର ଲିଷ୍ଟରୁ କଟିପାରେ ୧.୦୮ କୋଟି ନାମ

• କେତେବେଳେ କଟେ ନାଁ ?

ନିର୍ବାଚନ ଆୟୋଗ ଯେଉଁ SIR ଆଣିଛନ୍ତି, ଏଥିରେ ଭୋଟର ତାଲିକାକୁ ଅପଡେଟ୍ କରାଯାଉଛି । ଏଥିରେ ସେହି ଲୋକଙ୍କ ନାମ କଟାଯାଉଛି, ଯେଉଁମାନେ ପୁରୁଣା ଠିକଣାରୁ ଅନ୍ୟ କେଉଁ ସ୍ଥାନକୁ ସ୍ଥାନାନ୍ତର ହୋଇଛନ୍ତି, ଯାହାର ମୃତ୍ୟୁ ଘଟିଛି, ଯାହା ନାଁରେ ଦୁଇଟି ଠିକଣା ରହିଛି । ଏହି ପ୍ରକ୍ରିୟାକୁ ପୂରଣ କରିବା ଲାଗି BLO ନିଜ ଅଞ୍ଚଳର ସମସ୍ତ ଘର ବୁଲୁଛନ୍ତି ଏବଂ ଭୋଟର ତାଲିକା ଯାଞ୍ଚ କରୁଛନ୍ତି । ଏପରି ସ୍ଥିତିରେ ଯଦି କୌଣସି ଭୋଟର ଘରେ ନାହାନ୍ତି, ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । ଏପରି ନୁହେଁ ଯେ, ବିଏଲଓ ଥରେ ମାତ୍ର ଯାଞ୍ଚ କରି ନାଁ କାଟୁଛନ୍ତି । ସେ ବାରମ୍ବାର ଯାଞ୍ଚ କରିବା ପରେ ମଧ୍ୟ ମତଦାତାଙ୍କୁ ଘରେ ନ ପାଇବା ପରେ, ତାଙ୍କ ନାମକୁ ASDDF ତାଲିକା ଅନ୍ତର୍ଭୁକ୍ତ କରାଯାଉଛି । ଏଠାରେ କହିରଖୁଛୁ କି, ASDDFର ଅର୍ଥ ଆବସେଣ୍ଟ, ଶିଫ୍ଟେଡ୍‍, ଡେଡ୍‍, ଡୁପ୍ଲିକେଟ୍ ଓ ଫରେନର୍ ଭୋଟର୍ସ ।