Raghopur MLA Tejashwi Yadav / 'ଯଦି କିଛି ହୋଇ ପାରୁନାହିଁ, ତାହେଲେ ବିଧାୟକ ପଦରୁ ଇସ୍ତଫା ଦେଇ ଦିଅ'

ଗତ ମଙ୍ଗଳବାର (୧୩ ଅକ୍ଟୋବର) ବିହାରର ବୈଶାଳୀ ଜିଲ୍ଲାର ରାଘୋପୁର ଦିଆରା ଅଞ୍ଚଳରେ ହୋଇଥିବା ଦୁଃଖଦ ଡଙ୍ଗା ବୁଡ଼ି ଘଟଣା ପରେ ଶୋକର ଛାୟା ଖେଳିଯାଇଛି। ଗଙ୍ଗା ନଦୀରେ ଡଙ୍ଗା ବୁଡ଼ିଯିବାରୁ ଅନେକ ଶିଶୁଙ୍କ ସମେତ ୧୩ ଜଣରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା। ଏହି ଦୁର୍ଘଟଣା ଘଟିବାର ପ୍ରାୟ ୨୪ ଘଣ୍ଟା ପରେ ଯେତେବେଳେ ସ୍ଥାନୀୟ ରାଘୋପୁର ବିଧାୟକ ତଥା ବିହାର ବିଧାନସଭାର ବିରୋଧି ଦଳ ନେତା ତେଜସ୍ୱୀ ଯାଦବ ଶୋକ ସନ୍ତପ ପରିବାରକୁ ଭେଟିଥିଲେ, ସେତେବେଳେ ତାଙ୍କୁ ପ୍ରବଳ ବିରୋଧର ସାମ୍ନା କରିବାକୁ ପଡ଼ିଥିଲା। ଯେଉଁ ଗ୍ରାମବାସୀ ନିଜ ପ୍ରିୟଜନଙ୍କୁ ହରାଇଥିଲେ ସେମାନେ କେବଳ ଦୁଃଖ ପ୍ରକାଶ କରିନଥିଲେ ବରଂ ବର୍ଷ ବର୍ଷ ଧରି ଏହି ଅଞ୍ଚଳରେ ଲାଗି ରହିଥିବା ସମସ୍ୟା ବିଷୟରେ ବିଧାୟକଙ୍କୁ ସିଧାସଳଖ ପ୍ରଶ୍ନ କରିଥିଲେ।

ଦୁର୍ଘଟଣା ପରେ ବଢିଲା ଜନ ଅସନ୍ତୋଷ
ରାଘୋପୁର ସ୍ଥିତ ରାମପୁର ଶ୍ୟାମଚାନ୍ଦ ଗ୍ରାମରେ ପ୍ରଭାବିତ ପରିବାରକୁ ଭେଟିବାକୁ ତେଜସ୍ୱୀ ଯାଦବ ପହଞ୍ଚିଥିଲେ। ହେଲେ ସେଠାରେ ପହଞ୍ଚିବା ମାତ୍ରେ ଉପସ୍ଥିତ ଲୋକ ଖୋଲାଖୋଲି ଭାବରେ ନିଜର ଅସନ୍ତୋଷ ପ୍ରକାଶ କରିଥିଲେ। ଅନେକ ଶୋକ ସନ୍ତପ ପରିବାରର ଲୋକ ବିଧାୟକଙ୍କ କାର୍ଯ୍ୟଶୈଳୀ ଏବଂ ଅଞ୍ଚଳର ପରିସ୍ଥିତି ଉପରେ ପ୍ରଶ୍ନ ଉଠାଇଥିଲେ। ଗ୍ରାମବାସୀ କହିଛନ୍ତି ଯେ ଯେତେବେଳେ ଏତେ ବଡ଼ ଦୁର୍ଘଟଣା ଘଟିଥିଲା ​​ଏବଂ ସମଗ୍ର ଅଞ୍ଚଳ ସେମାନଙ୍କ ପ୍ରିୟଜନଙ୍କ ଶବଦାହ ଏବଂ ଶୋକରେ ବୁଡ଼ି ରହିଥିଲା, ସେତେବେଳେ ସେମାନଙ୍କ ଜନପ୍ରତିନିଧିଙ୍କୁ ଘଟଣାସ୍ଥଳରେ ପହଞ୍ଚିବା ପାଇଁ ଗୋଟିଏ ଦିନ ସମୟ ଲାଗିଗଲା। ସେମାନେ ତେଜସ୍ୱୀ ଯାଦବଙ୍କୁ କହିଥିଲେ, "ଯଦି ଆପଣ କିଛି କରିପାରିବେ ନାହିଁ, ତାହେଲେ ବିଧାୟକ ପଦରୁ ଇସ୍ତଫା ଦେଇଦିଅନ୍ତୁ। ଏଠାରେ କୌଣସି ରାସ୍ତା କିମ୍ବା ସୁବିଧା ନାହିଁ, ହେଲେ ତଥାପି ଆପଣ ରାଘୋପୁର ବିଧାୟକ ଅଛନ୍ତି।"

ଏହା ସହ ପଢନ୍ତୁ: ଗଙ୍ଗାନଦୀରେ ଓଲଟି ପଡ଼ିଲା ଡଙ୍ଗା; ୧୧ ମୃତ

ମୌଳିକ ସୁବିଧାର ଅଭାବକୁ ନେଇ ବିଧାୟକଙ୍କ ଉପରେ ତାତି ଉଠିଲେ ସ୍ଥାନୀୟ ଲୋକ
ବିଧାୟକଙ୍କୁ ବିରୋଧି କରୁଥିବା ଲୋକ କହିଥିଲେ ଯେ ରାଘୋପୁର ଦିଆରା ଅଞ୍ଚଳରେ ଏବେ ମଧ୍ୟ ମୌଳିକ ସୁବିଧାର ଅଭାବ ରହିଛି। ଅନେକ ଗ୍ରାମରେ ରାସ୍ତା ସଂଯୋଗ ନାହିଁ। ଲୋକ ଜରୁରୀକାଳୀନ ପରିସ୍ଥିତିରେ ଘୋର ଅସୁବିଧାର ସାମ୍ନା କରିଥାନ୍ତି। ଗ୍ରାମବାସୀ ଅଭିଯୋଗ କରିଛନ୍ତି ଯେ ଏହି ଦୁର୍ଘଟଣା ପୁଣି ଥରେ ଅଞ୍ଚଳରେ ବିପର୍ଯ୍ୟୟ ପରିଚାଳନା ଏବଂ ଦ୍ରୁତ ରିଲିଫ୍ ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି। ଲୋକେ କହିଛନ୍ତି ଯେ ଏହି ସମସ୍ୟା ବର୍ଷ ବର୍ଷ ଧରି ଲାଗି ରହିଛି। ହେଲେ ଏପର୍ଯ୍ୟନ୍ତ ଏହାର କୌଣସି ସ୍ଥାୟୀ ସମାଧାନ ହୋଇନାହିଁ।

ପୀଡ଼ିତ ପରିବାରକୁ ଭେଟିଲେ ତେଜସ୍ୱୀ ଯାଦବ
ବିରୋଧ ଏବଂ ଅସନ୍ତୋଷ ମଧ୍ୟରେ ରଘୋପୁର ବିଧାୟକ ତେଜସ୍ୱୀ ଯାଦବ ମୃତକଙ୍କ ପରିବାର ସହିତ ସାକ୍ଷାତ କରିଛନ୍ତି ଏବଂ ସେମାନଙ୍କୁ ସାନ୍ତ୍ୱନା ଦେଇଛନ୍ତି। ସେ ଦୁର୍ଘଟଣାରେ ପ୍ରାଣ ହରାଇଥିବା ଲୋକଙ୍କ ପରିବାର ପ୍ରତି ସମବେଦନା ପ୍ରକାଶ କରିଛନ୍ତି। 

ମଙ୍ଗଳବାର ବିହାରର ବୈଶାଳୀ ଜିଲ୍ଲାରେ ଘଟିଯାଇଛି ଏକ ବଡ଼ ଦୁର୍ଘଟଣା। ବୈଶାଳୀ ଜିଲ୍ଲାର ରାଘୋପୁର ଥାନା ଅଞ୍ଚଳରେ ଗଙ୍ଗା ନଦୀରେ ଏକ ଡଙ୍ଗା ଓଲଟି ପଡ଼ିଥିଲା। ଏହି ଘଟଣାରେ ୧୩ ଜଣଙ୍କ ମୃତ୍ୟୁ ହୋଇଥିଲା। ରିପୋର୍ଟ ଅନୁଯାୟୀ ବୁଡ଼ି ଯାଇଥିବା ଡଙ୍ଗାରେ ପ୍ରାୟ ୧୫-୨୦ ଜଣ ଲୋକ ରହିଥିଲେ। ସମସ୍ତେ ଏକ ଭୋଜି ଖାଇବାକୁ ଯାଉଥିଲେ। ସ୍ଥାନୀୟ ରାମପୁର ଶ୍ୟାମଚାନ୍ଦ ଗାଁ ନିକଟରେ ଏହି ଦୁର୍ଘଟଣା ଘଟିଥିଲା।