BJP RS Candidate 2026 UP / କାହାକୁ ମିଳିବ ବିଜେପି ରାଜ୍ୟସଭା ଟିକେଟ୍? ଖୁବ୍ ଶୀଘ୍ର ହୋଇପାରେ ଘୋଷଣା

ଆସନ୍ତା ଅକ୍ଟୋବର ୧୬ ତାରିଖରେ ଉତ୍ତର ପ୍ରଦେଶର ୧୦ ରାଜ୍ୟସଭା ଆସନ ପାଇଁ ହେବାକୁ ଯାଉଛି ନିର୍ବାଚନ। ଆସନ୍ତାକାଲି (୨୯ ସେପ୍ଟମ୍ବର ୨୯) ଠାରୁ ଆରମ୍ଭ ହେଉଛି ନାମାଙ୍କନ ପ୍ରକ୍ରିୟା। ଏହି ସମୟରେ ଆଗାମୀ ୨୦୨୭ ଉତ୍ତର ପ୍ରଦେଶ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ବିଜେପି ଏହାର ଦଳୀୟ ରାଜ୍ୟସଭା ପ୍ରାର୍ଥୀଙ୍କ ନାମ ଉପରେ ସତର୍କତାର ସହ ବିଚାର କରୁଛି।

ସଂଖ୍ୟାବଳ ଆଧାରରେ ୭ ବିଜେପି ପ୍ରାର୍ଥୀ ଜିତିବା ନିଶ୍ଚିତ ରହିଛି। ହେଲେ ଦଳ ଆଗାମୀ ୨୦୨୭ ଉତ୍ତର ପ୍ରଦେଶ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ୮ ଜଣ ପ୍ରାର୍ଥୀଙ୍କୁ ଛିଡ଼ା କରିବାକୁ ବିଚାର କରୁଛି। ସୂତ୍ର ଅନୁସାରେ ବିଜେପି ଜାତୀୟ ସାଧାରଣ ସମ୍ପାଦକ ସ୍ମୃତି ଇରାନୀ ଏବଂ ହରିଶ ଦ୍ୱିବେଦୀଙ୍କୁ ପ୍ରାର୍ଥୀ କରିପାରେ। ଏହା ବ୍ୟତୀତ ଦଳ ଜାଟ, ରାଜପୁତ, ଓବିସି ଏବଂ ସଂଖ୍ୟାଲଘୁ ସମ୍ପ୍ରଦାୟର ନେତାଙ୍କୁ ମଧ୍ୟ ଟିକେଟ ଦେଇପାରେ। ବର୍ତ୍ତମାନର ଓବିସି ସାଂସଦ ଗୀତା ଶାକ୍ୟ ଏବଂ ବି.ଏଲ. ବର୍ମାଙ୍କ କାର୍ଯ୍ୟକାଳ ଶେଷ ହେଉଛି। ବି.ଏଲ ବର୍ମା କେନ୍ଦ୍ରମନ୍ତ୍ରୀ ଥିବାରୁ ତାଙ୍କୁ ପୁନର୍ବାର ରାଜ୍ୟସଭାକୁ ପଠାଯାଇପାରେ। ଗୀତା ଶାକ୍ୟଙ୍କୁ ପୁନର୍ବାର ରାଜ୍ୟସଭା ପଠାଇବା ନେଇ ଆଲୋଚନା ହେଉଛି।

ଏହା ସହ ପଢନ୍ତୁ:  ବିଧାନସଭା ପୂର୍ବରୁ ରାଜ୍ୟସଭା-ବିଧାନ ପରିଷଦ ନିର୍ବାଚନକୁ ନେଇ ସରଗରମ ରାଜନୀତି; କିଏ ମାରିବ ବାଜି?

ରାଜ୍ୟ ବିଜେପି ଓବିସି ମୋର୍ଚ୍ଚା ସଭାପତି ପ୍ରକାଶ ପାଲ ଏବଂ ରେଖା ବର୍ମାଙ୍କ ନାମ ମଧ୍ୟ ଆଲୋଚନା ହେଉଛି। କେନ୍ଦ୍ରମନ୍ତ୍ରୀ ହରଦୀପ ସିଂହ ପୁରୀଙ୍କ କାର୍ଯ୍ୟକାଳ ମଧ୍ୟ ଶେଷ ହେଉଛି। ଆଗାମୀ ୨୦୨୭ ପଞ୍ଜାବ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି, ତାଙ୍କୁ ପୁନର୍ବାର ରାଜ୍ୟସଭାକୁ ନିର୍ବାଚିତ କରାଯିବା ନେଇ ଆଲୋଚନା ହେଉଛି। ଦଳିତ ନେତା ବ୍ରିଜଲାଲଙ୍କ ସ୍ଥାନରେ ଜଣେ ଯୁବ ଦଳିତ ନେତାଙ୍କୁ ସ୍ଥାନ ଦେବା ନେଇ ମଧ୍ୟ ଆଲୋଚନା ହେଉଛି। ପୂର୍ବତନ ମନ୍ତ୍ରୀ ସଞ୍ଜୀବ ବାଲ୍ୟାନ ଏବଂ ପୂର୍ବତନ ସାଂସଦ ସତ୍ୟପାଲ ସିଂହ ଜାଟ୍ ଚେହେରା ପ୍ରମୁଖ ଦାବିଦାର ଭାବେ ଉଭା ହୋଇଛନ୍ତି। ବରୁଣ ଗାନ୍ଧୀ, ସୁରେଶ ରାଣା, ଅମିତ ମାଲବୀୟ ଏବଂ ରାଜବୀର ସିଂହଙ୍କ ନାମ ଉପରେ ମଧ୍ୟ ବିଚାର କରାଯାଉଛି।

ସୋମବାର (୨୮ ସେପ୍ଟମ୍ବର) ରାଜଧାନୀ ଲକ୍ଷ୍ନୌ ଠାରେ ଆୟୋଜିତ ହେଉଥିବା ରାଜ୍ୟ କୋର କମିଟି ବୈଠକରେ ସମ୍ଭାବ୍ୟ ପ୍ରାର୍ଥୀଙ୍କ ନାମ ଉପରେ ମଧ୍ୟ ଆଲୋଚନା ହୋଇଥିଲା। କେନ୍ଦ୍ରୀୟ ନିର୍ବାଚନ କମିଟି ଆଗାମୀ ୩-୪ ଦିନ ମଧ୍ୟରେ ଦଳୀୟ ପ୍ରାର୍ଥୀଙ୍କ ନାମ ଚୂଡ଼ାନ୍ତ କରିବ। ବର୍ତ୍ତମାନର ସାଂସଦ ନୀରଜ ଶେଖର ଏବଂ ଅରୁଣ ସିଂହଙ୍କୁ ବିଧାନସଭା ନିର୍ବାଚନରେ ପ୍ରାର୍ଥୀ କରାଯାଇପାରେ ବୋଲି ଆଲୋଚନା ହେଉଛି। ସୂତ୍ର ଅନୁସାରେ ବିଜେପି ବିଧାନସଭା ନିର୍ବାଚନକୁ ଆଖି ଆଗରେ ରଖି ଦଳୀୟ ପ୍ରାର୍ଥୀ ଚୂଡ଼ାନ୍ତ କରିବ। ଏହା ସହିତ, ଗତ ୨୦୨୪ ଲୋକସଭା ନିର୍ବାଚନରେ ​​ହରାଇଥିବା ଅଣ-ଯାଦବ ଓବିସି ଭୋଟ, ବିଶେଷକରି କୁର୍ମି ଏବଂ ଅଣ-ଜାଟବ ଏସସି ଭୋଟ୍ ପୁନର୍ବାର ଫେରିପାଇବା ପାଇଁ ପ୍ରୟାସ କରୁଛି। ବିଜେପି ଯୁବ ଏବଂ ମହିଳା ବର୍ଗଙ୍କୁ ଅଧିକ ପ୍ରତିନିଧିତ୍ୱ ଦେବାକୁ ଚାହୁଁଛି।