ଶଙ୍ଖ ଭବନରେ ଦରବାର ଖୋଲି ନେତାଙ୍କୁ ୱାନ ଟୁ ୱାନ ଭେଟୁଛନ୍ତି ସୁଜାତା । କିନ୍ତୁ ଅସନ୍ତୁଷ୍ଟଙ୍କୁ ମନେଇବେ କେମିତି । ଏଥିପାଇଁ କସରତ ଆରମ୍ଭ କରିଛନ୍ତି ପ୍ରୋ-ସୁଜାତା ଗୋଷ୍ଠୀ । ବିଜେଡି ଟିମର କେନ୍ଦୁଝର ଗସ୍ତ ସମୟରେ ବଦ୍ରିଙ୍କ ସହ ବସିଛନ୍ତି ସଞ୍ଜୟ । କଟକ -ଚୌଦ୍ଵାରରେ କାଉନସିଲରଙ୍କୁ ଭେଟି ବୁଝାଇବାକୁ ଦେବୀଙ୍କ ଉଦ୍ୟମ । କିନ୍ତୁ ଏହା ସଫଳ ହେବେ ତ...

ସୁଜାତାଙ୍କ ଏଣ୍ଟ୍ରିକୁ ନେଇ ବିଜେଡିରେ ଆରମ୍ଭ ହୋଇଥିବା ଭିତିରିଆ ଅସନ୍ତୋଷ ଏବେ ପଦାରେ ପଡିଲାଣି । ଡ୍ୟାମେଜ୍ କଣ୍ଟ୍ରୋଲ ପାଇଁ ଅଣ୍ଟା ଭିଡିଛନ୍ତି ଦେବୀ ଆଣ୍ଡ- କୋ । କେନ୍ଦୁଝରରେ ବଦ୍ରିଙ୍କ ସହ ଆଲୋଚନା କରିଛନ୍ତି ଉପସଭାପତି ସଞ୍ଜୟ ଦାସବର୍ମା । ବଦ୍ରି ବୁଝିଲେ ନା ଅବୁଝା ରହିଲେ ତାହା ଜଣାପଡିନି । କାରଣ ଗଣମାଧ୍ୟମକୁ କିଛି ପ୍ରତିକ୍ରିୟା ଦେଇ ନାହାଁନ୍ତି ବଦ୍ରି ପାତ୍ର । କୁହାଯାଉଛି, ଜୁଆଙ୍ଗ ଗାଁକୁ ବିଜେଡି ଟିମର ଗସ୍ତ ସମୟରେ ବଦ୍ରିଙ୍କ ସହ ହୋଇଛି ପଲିଟିକାଲ ଆଲୋଚନା । ସୁଜାତାଙ୍କ ମିଶ୍ରଣ ଦିନ ଶଙ୍ଖ ଭବନରେ ଅନୁପସ୍ଥିତ ଥିଲେ ବଦ୍ରି । ଆଉ ସୁଜାତା ବିଜେଡିକୁ ଆସିଲେ ଗ୍ରହଣ କରିବେନି ବୋଲି ଖୋଲା ମଞ୍ଚରେ କହି ଚର୍ଚ୍ଚାକୁ ଆସିଥିଲେ । ତେବେ କିନ୍ତୁ ଦଳରେ ଥିବା ଅସନ୍ତୋଷକୁ ଅସ୍ଵୀକାର କରିଛନ୍ତି ବିଜେଡି ନେତା ।

ଅଧିକ ପଢ଼ନ୍ତୁ: ୨୦୨୭ ଜନଗଣନା ପରେ ଏପ୍ରିଲରେ ପଂଚାୟତ ନିର୍ବାଚନ ପାଇଁ ବାହାରିବ ବିଜ୍ଞପ୍ତି

ଏପଟେ କଟକ-ଚୌଦ୍ଵାରରେ ପୌରାଧ୍ୟକ୍ଷା ଓ କାଉନସିଲରଙ୍କୁ ଭେଟିଥିଲେ ବରିଷ୍ଠ ଉପସଭାପତି ଦେବୀ ପ୍ରସାଦ ମିଶ୍ର । ସାଙ୍ଗରେ ଥିଲେ କାର୍ଯ୍ୟାଳୟ ଉପସଭାପତି ପ୍ରତାପ ଜେନା, ବିଧାୟକ ପ୍ରଶାନ୍ତ ବେହେରାଙ୍କ ସହ ଜିଲ୍ଲା ସଭାପତି ପ୍ରଫୁଲ୍ଲ ସିଂ । ପୂର୍ବତନ ବିଧାୟକ ପ୍ରଭାତ ବିଶ୍ୱାଳଙ୍କୁ ସମର୍ଥନ ଜଣାଇ ଜଣେ କାଉନସିଲରଙ୍କ ସମେତ ଶତାଧିକ ବିଜେଡି ଯୁବ ଓ ଛାତ୍ର ନେତାଙ୍କ ଇସ୍ତଫା ପରେ ଟେନସନରେ ଦଳ । ଯେଉଁଥିପାଇଁ ପୌରାଧ୍ୟକ୍ଷ ଏବଂ ଅନ୍ୟ କାଉନସିଲରଙ୍କୁ ଭେଟି ଆଲୋଚନା କରିଛନ୍ତି ଦେବୀ ଆଣ୍ଡ କୋ । ପ୍ରଭାତ ବିଶ୍ଵାଳ ଏବଂ ପୁଅ ବିଧାୟକ ସୌଭିକ ବିଶ୍ଵାଳଙ୍କୁ ନିଲମ୍ବନ ପରେ ଏଠି ଭୁଷିଡିବାରେ ଲାଗିଛି ବିଜେଡି ଗଡ଼ । ଆଉ ଏବେ ସୁଜାତାଙ୍କ ବିଜେଡିରେ ଯୋଗଦାନ ନିଆଁରେ ଘିଅ ଢାଳିବା ଭଳି ହୋଇଛି ।

ଗୋଟିଏ ପଟେ ସୁଜାତା ଦରବାର ଖୋଲି ଜଣଙ୍କ ପରେ ଜଣେ ବରିଷ୍ଠ ନେତାଙ୍କୁ ଭେଟୁଥିବା ବେଳେ, ଗ୍ରାଉଣ୍ଡକୁ ଓହ୍ଲେଇବା ପୂର୍ବରୁ ଅସନ୍ତୁଷ୍ଟ ନେତାଙ୍କୁ ମନେଇବାକୁ ପ୍ରୟାସ ଆରମ୍ଭ କରିଛନ୍ତି ସୁଜାତାଙ୍କ କୋର ଗ୍ରୁପ ।