ଆଜି ବିଜେଡିରେ ସାମିଲ ହୋଇପାରନ୍ତି ଭିକେ ପାଣ୍ଡିଆନଙ୍କ ପତ୍ନୀ ସୁଜାତା କାର୍ତ୍ତିକେୟନ । ଏଥିପାଇଁ ସେ ଶଙ୍ଖଭବନରେ ପହଞ୍ଚିଛନ୍ତି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଉପସ୍ଥିତିରେ ସୁଜାତା ଶଙ୍ଖ ଧରି ପାରନ୍ତି ବୋଲି ଚର୍ଚ୍ଚା ହେଉଛି । ଏଥିପାଇଁ ଶଙ୍ଖ ଭବନରେ ହଲଚଲ ଆରମ୍ଭ ହୋଇଯାଇଛି । ଜଣଙ୍କ ପରେ ଜଣେ ନେତା ବିଜେଡି କାର୍ଯ୍ୟାଳୟରେ ପହଞ୍ଚୁଛନ୍ତି । ରାଜ୍ୟସଭା ସାଂସଦ ସୁଲତା ଦେଓ, ବିଜେଡି ନେତ୍ରୀ ଟୁକୁନି ସାହୁ, ବିଜୁ ମହିଳା ଜନତା ଦଳ ସଭାନେତ୍ରୀ ସ୍ନେହାଙ୍ଗିନୀ ଛୁରିଆ, ବିଜେଡି ନେତା ପଦ୍ମନାଭ ବେହେରା, ବିଧାୟକ ଧ୍ରୁବ ସାହୁ ପ୍ରମୁଖ ପହଞ୍ଚି ସାରିଛନ୍ତି । ଅପରାହ୍ନ ୧୨ଟାରେ ଶଙ୍ଖ ଭବନକୁ ଆସିବେ ନବୀନ ପଟ୍ଟନାୟକ। ନବୀନଙ୍କ ଉପସ୍ଥିତିରେ ଦଳରେ ସୁଜାତା ମିଶିବେ ଚର୍ଚ୍ଚା ହେଉଛି ।

ଅଧିକ ପଢ଼ନ୍ତୁ: ଶିବସେନା, ଟିଏମସି ପରି ଭାଙ୍ଗିବ କି ବିଜେଡି ? ସାଂସଦଙ୍କ ପରେ NDA ମୁହାଁ ବିଧାୟକ ଗୋଷ୍ଠୀ

ପାଣ୍ଡିଆନଙ୍କ ବିଜେଡିରେ ଏଣ୍ଟ୍ରି ପରେ ସୁଜାତା ସରକାରୀ ପଦବୀରେ ରହି ବି ଦଳ ପାଇଁ କାର୍ଯ୍ୟ କରୁଥିବା ଚର୍ଚ୍ଚା ହେଉଥିଲା । ଏନେଇ ଅଭିଯୋଗ ପରେ ସାଧାରଣ ନିର୍ବାଚନ ପୂର୍ବରୁ ସୁଜାତାଙ୍କୁ ନିଜ ପଦରୁ ହଟାଇଥିଲେ ନିର୍ବାଚନ କମିଶନ । ପରେ ଚାକିରୀ ଛାଡିବା, ନବୀନଙ୍କ ଅସୁସ୍ଥତା ବେଳେ ତାଙ୍କ ପାଖେ ପାଖେ ରହିବା ସୁଜାତାଙ୍କ ବିଜେଡିରେ ଏଣ୍ଟ୍ରି ଚର୍ଚ୍ଚା ବଢ଼ାଇଥିଲା । ତେବେ ସୁଜାତା ଶଙ୍ଖ ଧରିବା ଚର୍ଚ୍ଚା ଭିତରେ ଶ୍ରୀମୟୀ ମିଶ୍ର ବିଜେଡିକୁ କଟାକ୍ଷ କରି ସୋସିଆଲ ମେଡିଆରେ ଲେଖିଛନ୍ତି କାଲି ଦଳ ନିଶ୍ଚିହ୍ନ ହେବାର ମୁଳଦୁଆ ପଡିବ । ଏଲିନା ଦାସ ଲେଖିଛନ୍ତି ବିଜେଡିର ନେତୃତ୍ବ ଜଣେ ମହିଳା ନେଲେ ଦଳର ମହିଳା ସୁରକ୍ଷିତ ରହିବେ ।

୨୦୨୪ ନିର୍ବାଚନରେ ଭୈରବ କାର୍ତ୍ତିକେୟନ ପାଣ୍ଡିଆନଙ୍କ ପାଇଁ ବିଜେଡିର ବିପର୍ଯ୍ୟୟ ହେଲା ବୋଲି ଅନେକ କହିଲେ। ଖୋଦ ପାଣ୍ଡିଆନ ରାଜନୀତିରୁ ସନ୍ୟାସ ନେଲେ । ହେଲେ ପରଦା ପଛରେ ରହି ବିଜେଡିର ସର୍ବେସର୍ବା ସାଜିଥିବାର ଅଭିଯୋଗ ଭିତରେ ନେତାଙ୍କ ଭିତରେ ଏବେ ବି କୁହୁଳୁଛି ଅସନ୍ତୋଷ । ପାଣ୍ଡିଆନଙ୍କ ହାକିମାତିକୁ ପସନ୍ଦ କରୁ ନଥିବା ନେତା ବିଜେଡିକୁ ବାଏ ବାଏ କରୁଛନ୍ତି । ଏପରି ସ୍ଥିତିରେ ସୁଜାତାଙ୍କ ଏଣ୍ଚ୍ରିକୁ କର୍ମୀ କେମିତି ଗ୍ରହଣ କରିବେ ତା ଉପରେ ନଜର ।