ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ୨୦୨୬ ବିଧାନସଭା ନିର୍ବାଚନରେ ନନ୍ଦିଗ୍ରାମ ଓ ଭବାନିପୁର ଦୁଇଟି ଆସନରୁ ନିର୍ବାଚନ ଲଢିଥିଲେ ଓ ଦୁଇଟି ଯାକରେ ଜତିଥିଲେ ମଧ୍ୟ । ଏବେ ସମୟ ଆସିଛି, ନନ୍ଦିଗ୍ରାମ ଆସନ ଛାଡ଼ିଦେବେ ଶୁଭେନ୍ଦୁ ଏବଂ ଭବାନିପୁରରୁ ବିଧାୟକ ରହିବେ । ସେ ବିଧାନସଭାରେ ଭବାନିପୁର ବିଧାୟକ ଭାବେ ଶପଥ ନେଇଛନ୍ତି । ଏହି ଭବାନିପୁର ଆସନରୁ ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ପରାଜିତ କରିଥିଲେ ଶୁଭେନ୍ଦୁ ।

ଦୁଇଟି ଆସନରୁ ବିପୁଳ ବିଜୟ ହାସଲ କରିବା ପରେ ଶୁଭେନ୍ଦୁ ଅଧିକାରୀ କହିଥିଲେ ଯେ ୧୦ ଦିନ ମଧ୍ୟରେ ସେ ଗୋଟିଏ ଆସନ ଛାଡ଼ିଦେବେ । ମାତ୍ର ସେ କେଉଁ ଆସନରୁ ବିଧାୟକ ରହିବେ, ସେ ସମ୍ପର୍କରେ ଦଳ ନିଷ୍ପତ୍ତି ନେବ ବୋଲି କହିଥିଲେ ଶୁଭେନ୍ଦୁ । ସେ ନିଜର ନିଷ୍ପତ୍ତି ମଧ୍ୟ ଦଳ ସମ୍ମୁଖରେ ରଖିବେ ବୋଲି କହିଥିଲେ । ନନ୍ଦିଗ୍ରାମରୁ ଶୁଭେନ୍ଦୁ ଦ୍ଵିତୀୟ ଥର ଲାଗି ବିଜୟ ହାସଲ କରିଥିଲେ । ସାମ୍ବିଧାନିକ ନିୟମ ଅନୁଯାୟୀ, ଜଣେ ବ୍ୟକ୍ତି ଦୁଇଟି ଆସନରେ ବିଧାୟକ ରହିପାରିବେ ନାହିଁ, ଏଣୁ ଶୁଭେନ୍ଦୁଙ୍କୁ ଗୋଟିଏ ବାଛିବାକୁ ପଡ଼ିଲା । ଶୁଭେନ୍ଦୁ ଅଧିକାରୀ ଭବାନୀପୁରକୁ ନିଜର ପ୍ରାଥମିକତା ଦେଇଛନ୍ତି ।

• ନନ୍ଦିଗ୍ରାମରେ କେତେ ଭୋଟରେ ଜିତିଥିଲେ ଶୁଭେନ୍ଦୁ ?

ଶୁଭେନ୍ଦୁ ଅଧିକାରୀ ନନ୍ଦିଗ୍ରାମ ଆସନରୁ ତୃଣମୂଳ କଂଗ୍ରେସ (TMC)ର ପବିତ୍ର କରଙ୍କୁ ପରାଜିତ କରିଥିଲେ । ବିଜେପି ପ୍ରାର୍ଥୀ ଶୁଭେନ୍ଦୁଙ୍କୁ ଏହି ଆସନରୁ ୧,୨୭,୩୦୧ ଖଣ୍ଡ ଭୋଟ୍ ମିଳିଥିଲା, ଯେତେବେଳେ କି ଟିଏମସି ପ୍ରାର୍ଥୀ ପବିତ୍ରଙ୍କୁ ୧,୧୭,୬୩୬ ଖଣ୍ଡ ଭୋଟ୍ ମିଳିଥିଲା । ସେହିପରି ତୃତୀୟ ସ୍ଥାନରେ ସିପିଆଇ ପ୍ରାର୍ଥୀ ସନ୍ତି ଗୋପାଲ ଥିଲେ, ଯାହାଙ୍କୁ କେବଳ ୩୦୦୦ ଭୋଟ୍ ମିଳିଥିଲା । ସେହିପରି କଂଗ୍ରେସ ପ୍ରାର୍ଥୀ ଶେଖ ଜରିତୁଲ ହୁସେନ ପଞ୍ଚମ ସ୍ଥାନରେ ଥିଲେ ଏବଂ ତାଙ୍କୁ ମାତ୍ର ୭୯୪ ଖଣ୍ଡ ଭୋଟ୍ ମିଳିଥିଲା ।

• ଭବାନିପୁରରେ ଦିଦିଙ୍କୁ ଦେଇଥିଲେ ମାତ୍

ଏଥର ନିର୍ବାଚନରେ ଭବାନିପୁର ହେଭିୱେଟ୍ ଆସନ ଥିଲା, କାରଣ ଏଠାରେ ଶୁଭେନ୍ଦୁ ସିଧାସଳଖ ଦିଦିଙ୍କୁ ଟକ୍କର ଦେଉଥିଲେ । ୨୦୨୧ ନିର୍ବାଚନରେ ମଧ୍ୟ ବିଜେପି ଟିକଟରୁ ନନ୍ଦିଗ୍ରାମରେ ଶୁଭେନ୍ଦୁ ନିର୍ବାଚନ ଲଢିଥିବାବେଳେ ସେଠାରେ ମଧ୍ୟ ଦିଦିଙ୍କୁ ପରାସ୍ତ କରିଥିଲେ । ସେତେବେଳେ ଟିଏମସିକୁ ବହୁମତ ମିଳିଥିଲା ସତ, କିନ୍ତୁ ଖୋଦ୍ ମୁଖ୍ୟମନ୍ତ୍ରୀ ଥିବା ଦିଦି ହାରିଥିଲେ । ଏହାପରେ ଭବାନିପୁର ଆସନକୁ ଖାଲି କରାଯାଇଥିଲା ଓ ମମତା ବାନାର୍ଜୀ ଏଠାରୁ ନିର୍ବାଚନ ଲଢି ବିଧାୟିକା ହୋଇଥିଲେ । ଏଥର ୨୦୨୬ ନିର୍ବାଚନରେ ପୁଣି ଥରେ ଶୁଭେନ୍ଦୁ ଓ ମମତା ବାନାର୍ଜୀ ମୁହାଁମୁହିଁ ହୋଇଥିଲେ । ଏଥର ମଧ୍ୟ ଶୁଭେନ୍ଦୁ ମମତାଙ୍କ ବଡ଼ ହାର ଦେଇଛନ୍ତି । ଭବାନିପୁରରୁ ଶୁଭେନ୍ଦୁଙ୍କୁ ୭୩,୯୧୭ ଖଣ୍ଡ ଭୋଟ୍ ମିଳିଥିବାବେଳେ ମମତାଙ୍କୁ ୫୮,୮୧୨ ଖଣ୍ଡ ଭୋଟ୍ ମିଳିଥିଲା । ଶୁଭେନ୍ଦୁ ମମତାଙ୍କୁ ୧୫,୧୦୫ ଖଣ୍ଡ ଭୋଟରେ ପରାସ୍ତ କରିଥିଲେ ।

ପଢନ୍ତୁ ଏହି ଖବର: କାହିଁକି ବାହା ହୋଇନାହାନ୍ତି ପଶ୍ଚିମବଙ୍ଗର ନୂଆ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ? କହିଲେ କାରଣ

• କେତେ ମହତ୍ତ୍ଵପୂର୍ଣ୍ଣ ନନ୍ଦିଗ୍ରାମ ଆସନ ?

ପଶ୍ଚିମବଙ୍ଗରେ ନନ୍ଦିଗ୍ରାମ ଆସନ ମମତା ବାନାର୍ଜୀଙ୍କ ଗଡ଼ ବୋଲି କୁହାଯାଏ, କିନ୍ତୁ ୨୦୨୧ ନିର୍ବାଚନରେ ଶୁଭେନ୍ଦୁଙ୍କଠାରୁ ପରାସ୍ତ ହେବା ପରେ ସେ ଏହି ଆସନକୁ ବାଏ ବାଏ କରିଥିଲେ । ଏହି ଆସନକୁ ଶୁଭେନ୍ଦୁ ଅଧିକାରୀ ମଧ୍ୟ ନିଜର ଗଡ଼ ବୋଲି ମାନନ୍ତି । ଏହା ଶୁଭେନ୍ଦୁଙ୍କ ରାଜନୈତିକ କ୍ୟାରିଅରର କେନ୍ଦ୍ର । ଯେତେବେଳେ ସେ ଏହି ଆସନରୁ ୨୦୨୧ରେ ମମତାଙ୍କୁ ହରାଇଥିଲେ, ରାତାରାତି ପଶ୍ଚିମବଙ୍ଗ ବିଜେପିର ବଡ଼ ଚେହେରା ପାଲଟିଯାଇଥିଲେ ।