ମେ ୯ ତାରିଖରେ ପଶ୍ଚିମବଙ୍ଗ ରାଜନୀତିରେ ହୋଇଥିଲା ବଡ଼ ପରିବର୍ତ୍ତନ । ପ୍ରଥମ ଥର ପାଇଁ ବଙ୍ଗରେ ସରକାରକୁ ଆସିଛି ବିଜେପି ଓ ଶୁଭେନ୍ଦୁ ଅଧିକାରୀ ନୂଆ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି । ଶପଥ ଗ୍ରହଣ ପରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ । ରାଜନୀତିରେ ସଫଳତା ହାସଲ କରିଥିବା ଶୁଭେନ୍ଦୁ କାହିଁକି ଅବିବାହିତ ତାକୁ ନେଇ ଚାରିଆଡ଼େ ପ୍ରଶ୍ନ । ୫୫ ବର୍ଷୀୟ ବେଙ୍ଗଲ ମୁଖ୍ୟମନ୍ତ୍ରୀ ଆଜି ଯାଏଁ କାହିଁକି ନିଜର ଘର ବସାଇନାହାନ୍ତି ? ଏ ନେଇ ନିଜ ମୁହଁରେ କହିଛନ୍ତି ଶୁଭେନ୍ଦୁ ।

• 'ବ୍ୟାଚଲର ଲାଇଫ୍'ର ରାଜ୍ ଖୋଲିଥିଲେ ଶୁଭେନ୍ଦୁ

ପ୍ରାୟ ୬ ବର୍ଷ ପୂର୍ବେ ହଲଦିଆର ଏକ ଜନସଭାରେ ନିଜ ବ୍ୟକ୍ତିଗତ ଜୀବନ ସମ୍ପର୍କରେ ଖୋଲି କହିଦେଇଥିଲେ ଶୁଭେନ୍ଦୁ । ଯେଉଁ ପ୍ରଶ୍ନ ତାଙ୍କୁ ଲୋକେ ପଚାରିବାକୁ ଚାହୁଁଥିଲେ ବି ଜାଣିବାକୁ ଚାହୁଁଥିଲେ, ସେ ସମ୍ପର୍କରେ ଶୁଭେନ୍ଦୁ ନିଜେ କହିଦେଇଥିଲେ । ମାଇକ୍ ଧରି ଶୁଭେନ୍ଦୁ କହିଥିଲେ, "ଅନେକ ଲୋକ ମୋତେ ପଚାରନ୍ତି, ଶୁଭେନ୍ଦୁ ତୁମ ଭାଇ ବିବାହିତ, ହେଲେ ତୁମେ କାହିଁକି ବିବାହ କରୁନ ?" ଏହାପରେ ଶୁଭେନ୍ଦୁ ଯାହା ଜବାବ ଦେଇଥିଲେ, ତାହା ସମସ୍ତଙ୍କୁ ଚକିତ କରିଥିଲା ।

ଶୁଭେନ୍ଦୁ କହିଥିଲେ, "ମୁଁ ଅବିବାହିତ ବୋଲି କେବେ ଭାବିନାହିଁ । କାରଣ ମୋ ପରିବାରରେ କେବଳ ୮ କିମ୍ବା ୧୦ ଜଣ ସଦସ୍ୟ ନାହାନ୍ତି, ପୁରା ପଶ୍ଚିମବଙ୍ଗ ମୋ ପରିବାର । ସମାଜ ପାଇଁ କିଛି ତ୍ୟାଗ କରିବାକୁ ପଡ଼େ ।" ଏହାସହିତ ସେ ପଶ୍ଚିମବଙ୍ଗର ମହାନ ବ୍ୟକ୍ତିତ୍ଵ ସତୀଶ ସାମନ୍ତା, ସୁଶୀଳ ଧାରାଙ୍କ ନାମ ନେଇ କହିଥିଲେ ଯେ ଏହି ମହାନ ବ୍ୟକ୍ତିମାନେ ମଧ୍ୟ ଅବିବାହିତ ରହି ଜନତାଙ୍କ ସେବା କରିବାକୁ ନିଷ୍ପତ୍ତି ନେଇଥିଲେ ଓ ସେ ମଧ୍ୟ ସେହି ସମାନ ରାସ୍ତା ଆପଣାଇଥିବା କହିଛନ୍ତି ।

• 'ବିବାହ ପାଇଁ ଗାଳି କରନ୍ତି ବାପା'

ଶୁଭେନ୍ଦୁଙ୍କ ଏହି ନିଷ୍ପତ୍ତିକୁ ତାଙ୍କ ପିତା ତଥା ପଶ୍ଚିମବଙ୍ଗର ଅନ୍ୟତମ ପରିଚିତ ଚେହେରା ଶିଶିର ଅଧିକାରୀ ସହଜରେ ଗ୍ରହଣ କରିନାହାନ୍ତି । ଜଣେ ପିତା ଭାବେ ଶିଶିର ଚାହାନ୍ତି କି ତାଙ୍କ ପୁଅ ନିଜ ଘର ବସାନ୍ତୁ । ସେ ଏକ ସାକ୍ଷାତକାରରେ ନିଜ ଅନ୍ତରରେ ଚାପି ରଖିଥିବା ଦୁଃଖକୁ କହିଥିଲେ ଓ ବିବାହ ପାଇଁ ସେ ଅନେକ ଥର ଶୁଭେନ୍ଦୁଙ୍କୁ ଗାଳି କରନ୍ତି ବୋଲି ମଧ୍ୟ କହିଥିଲେ । ମାତ୍ର ଶୁଭେନ୍ଦୁ ନିଜ ଜିଦରେ ଅଟଳ ଓ ନିଷ୍ପତ୍ତିକୁ ବଦଳାନ୍ତିନି ବୋଲି ସେ କହିଥିଲେ ।

• ସିଙ୍ଗଲ୍ ଲାଇଫକୁ ନେଇ କଣ କୁହନ୍ତି ଶୁଭେନ୍ଦୁ ?

ଶୁଭେନ୍ଦୁ ଥରେ ସିଙ୍ଗଲ ଲାଇଫ୍ ସମ୍ପର୍କରେ ଖୋଲାଖୋଲି ଆଲୋଚନା କରିଥିଲେ ଏବଂ କହିଥିଲେ ସେ ଯେତେବେଳେ ୧୯୮୭ରେ ଛାତ୍ର ରାଜନୀତିରେ ଯୋଡ଼ି ହୋଇଥିଲେ, ସେତେବେଳେ ସେ ନିଜକୁ ଜନତାଙ୍କ ପ୍ରତି ସମର୍ପି ଦେଇଥିଲେ । ତାଙ୍କ ହିସାବରେ, ଅବିବାହିତ ରହିବାର ବହୁତ ବଡ଼ ଫାଇଦା ଅଛି । ଅବିବାହିତ କାରଣରୁ ତାଙ୍କ ପାଖରେ ପର୍ଯ୍ୟାପ୍ତ ସମୟ ରହେ ଓ ସେ ନିଜ କାମ କରିଥାନ୍ତି । ତାଙ୍କ ମୁଣ୍ଡ ଉପରେ ପରିବାରର ଦାୟିତ୍ଵ ନଥାଏ, ଏଥିଲାଗି ସେ ୨୪ ଘଣ୍ଟା ଜନତାଙ୍କ ପାଇଁ ସମୟ ଦେଇପାରନ୍ତି ।

ପଢନ୍ତୁ ଏହି ଖବର: କେତେ ପାଠ ପଢିଛନ୍ତି ପଶ୍ଚିମବଙ୍ଗର ନୂଆ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ?

• ଛାତ୍ର ରାଜନୀତିରୁ ମୁଖ୍ୟମନ୍ତ୍ରୀ ପର୍ଯ୍ୟନ୍ତ ଯାତ୍ରା

୮୦ ଦଶକରେ କାନ୍ଥୀର ପ୍ରଭାତ କୁମାର କଲେଜରୁ ଆରମ୍ଭ ହୋଇଥିବା ଶୁଭେନ୍ଦୁଙ୍କ ଯାତ୍ରା ଆଜି ବହୁ ଉପଲବ୍ଧି ହାସଲ କରିଛି । ମମତା ବାନାର୍ଜୀଙ୍କ ପରି ନେତ୍ରୀଙ୍କୁ ଧୂଳି ଚଟାଇଛନ୍ତି । ଆଜି ଯେତେବେଳେ ସେ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି, ତାଙ୍କ ବ୍ୟାଚଲର ଲାଇଫ୍ ଏବେ ତାଙ୍କର ଏକ ବଡ଼ ଶକ୍ତି ପାଲଟିଛି । ଜନତା ଏବେ ତାଙ୍କୁ ଏପରି ଜଣେ ନେତା ଭାବେ ଦେଖୁଛନ୍ତି, ଯାହାଙ୍କ ନିକଟରେ ହରାଇବା ଲାଗି କିଛି ନାହିଁ । ଏପିରିକି ଶୁଭେନ୍ଦୁଙ୍କ ନିକଟରେ ଗାଡ଼ି, ସୁନା କିଛି ନାହିଁ ।