ତାମିଲନାଡୁ ରାଜନୀତିରେ ନୂଆ ଟୁଇଷ୍ଟ । ସରକାର ଗଠନକୁ ନେଇ ଜାରି ରହିଥିବା ଅସ୍ଥିରତା ମଧ୍ୟରେ ଏବେ DMK ଏବଂ AIADMK ଏକାଠି ହେବା ନେଇ ଚର୍ଚ୍ଚା ଜୋର୍ ଧରିଛି । ଏପରି ସ୍ଥିତିରେ TVK (ତାମିଲଗା ଭେଟ୍ରି କାଝାଗାମ)ର ୧୦୮ ବିଧାୟକ ଇସ୍ତଫା ଦେଇପାରନ୍ତି ବୋଲି ଚେତାବନୀ ଦେଇଛନ୍ତି । ଟିଭିକେ ଏକକ ବହୁମତ ହାସଲ କରିଥିଲେ ସୁଦ୍ଧା ସଂଖ୍ୟାଗରିଷ୍ଠତା ପ୍ରମାଣ ଦେଇପାରିନାହିଁ । ଏଥିଲାଗି ଟିଭିକେକୁ ନୂଆ ସରକାର ଗଢିବାକୁ ତାମିଲନାଡୁ ରାଜ୍ୟପାଳ ଅନୁମତି ଦେଇନାହାନ୍ତି । ସଂଖ୍ୟାଗରିଷ୍ଠତା ପ୍ରମାଣ ଦେବା ପରେ ହିଁ ସରକାର ଗଠନ କରିବ ବୋଲି କହିଛନ୍ତି ରାଜ୍ୟପାଳ ।

TVK ପାଖରେ ୧୦୮ ଆସନ ଥିବା ବେଳେ ସରକାର ଗଠନ ପାଇଁ ୧୧୮ ଆସନର ଆବଶ୍ୟକତା ରହିଛି । କଂଗ୍ରେସର ୫ଟି ସମର୍ଥନ ପରେ ମଧ୍ୟ TVK ମ୍ୟାଜିକ୍ ନମ୍ବରଠାରୁ ଦୂରରେ ରହିଛି । ଅନ୍ୟପଟେ ନିଜ ବିଧାୟକଙ୍କୁ ସୁରକ୍ଷିତ ରଖିବା ପାଇଁ AIADMK ସମସ୍ତଙ୍କୁ ପୁଡୁଚେରୀର ଏକ ହୋଟେଲରେ ରଖିଛି । CPI, CPM ଏବଂ ଅନ୍ୟ ଛୋଟ ଆଞ୍ଚଳିକ ଦଳମାନେ ଆଜି ସେମାନଙ୍କର ଆଭିମୁଖ୍ୟ ସ୍ପଷ୍ଟ କରିପାରନ୍ତି । AIADMK ମୁଖପାତ୍ର କୋଭାଇ ସାଥିୟାନ କହିଛନ୍ତି ଯେ, TVK ଏକାକୀ ସରକାର ଗଢ଼ିବା ସମ୍ଭବ ନୁହେଁ । କଂଗ୍ରେସ ଏପରି ଏକ ଜାହାଜରେ ଗାତ ଖୋଳିଛି ଯାହା ଶୀଘ୍ର ବୁଡ଼ିବା ନିଶ୍ଚିତ । କଂଗ୍ରେସ ଟିଭିକେକୁ ସମର୍ଥନ ଦେବା ପରେ ଏହାକୁ ଉଭୟ DMK ଏବଂ AIADMK ବିଶ୍ଵାସଘାତକତା ବୋଲି କହିଛନ୍ତି ।

• ଆକ୍ଟିଭ୍ ମୋଡରେ DMK

ବିଜୟଙ୍କ ଦଳ ଟିଭିକେକୁ ସରକାର ଗଢିବା ପାଇଁ କଂଗ୍ରେସ ବ୍ୟତୀତ ଅନ୍ୟ କୌଣସି ଦଳର ସମର୍ଥନ ନ ମିଳିବା ପରେ ବେଶ ଆକ୍ଟିଭ ନଜର ଆସିଛି ଏବଂ AIADMK ଶିବିରରେ ମଧ୍ୟ ହଲଚଲ ଦେଖିବାକୁ ମିଳିଛି । ଏଥିଲାଗି ଟିଭିକେ ଆଶଙ୍କା କରୁଛି ଯେ ଦୁଇ ଦଳ DMK ଏବଂ AIADMK ତାଙ୍କ ଦଳକୁ ସରକାର ଗଢିବାରୁ ବଞ୍ଚିତ କରିବାକୁ ଷଡ଼ଯନ୍ତ୍ର କରୁଛନ୍ତି । ଯଦି ତାମିଲନାଡୁ ରାଜନୀତିରେ ଏହି ଦୁଇ ଦଳ ସାଥୀରେ ଆସୁଛନ୍ତି, ତେବେ ଦୁଇଟି ପ୍ରତିଦ୍ଵନ୍ଦ୍ଵୀଙ୍କ ବଡ଼ ମିଳନ ହେବ । କାରଣ ଏଯାବତ ରାଜ୍ୟରେ ଏହି ଦୁଇ ଦଳ ମଧ୍ୟରେ ମୁକାବିଲା ହୋଇଆସୁଥିଲା । ଯଦି ଦୁଇ ଦଳ ହାତ ମିଳାନ୍ତି, ତେବେ ଉଭୟ ଦଳର କର୍ମକର୍ତ୍ତାଙ୍କ ଲାଗି ଏହା କୌଣସି ଆଶ୍ଚର୍ଯ୍ୟଠାରୁ କମ ହେବ ନାହିଁ ।

ପଢନ୍ତୁ ଏହି ଖବର: ତାମିଲନାଡୁରେ ସରକାର ଗଠନ ନେଇ ସସପେନ୍ସ; ବିଜୟଙ୍କ ପାଖରେ କଣ ଅଛି ବିକଳ୍ପ ?

• ଚେନ୍ନାଇ ନ ଛାଡ଼ିବାକୁ ବିଧାୟକଙ୍କୁ କହିଛି DMK

ତାମିଲନାଡୁରେ ସରକାର ଗଠନକୁ ନେଇ ସସପେନ୍ସ ଜାରି ଥିବାବେଳେ AIADMK ନିଜ ବିଧାୟକଙ୍କୁ ଆଉ ୨ ଦିନ ଶାନ୍ତ ରହିବାକୁ କହିଛି । ସେପଟେ DMK ନିଜ ବିଧାୟକଙ୍କୁ ଚେନ୍ନାଇ ଛାଡ଼ି ନ ଯିବାକୁ ନିର୍ଦ୍ଦେଶ ଦେଇଛି । ଏଥର ନିର୍ବାଚନରେ ଟିଭିକେକୁ ୧୦୮ ଆସନ, DMKକୁ ୫୯, AIADMKକୁ ୪୭ଟି ଆସନ ମିଳିଛି । ସେହିପରି କଂଗ୍ରେସକୁ ୫ଟି ଆସନ ମିଳିଥିବାବେଳେ PMKକୁ ୪ ଆସନ ମିଳିଛି । ଅନ୍ୟପଟେ IUML, CPI, VCK, CPI(M)କୁ ୨ଟି ଲେଖାଏଁ ଆସନ ମିଳିଛି । ବିଜେପି ରାଜ୍ୟରେ ଗୋଟିଏ ଆସନ ଜିତିଥିବାବେଳେ DMDK ଓ AMMKMNKZ ଦଳ ମଧ୍ୟ ଗୋଟିଏ ଲେଖାଏଁ ଆସନରେ ବିଜୟୀ ହୋଇଛନ୍ତି ।