Koel Mallick Resignation / TMCକୁ ବଡ଼ ଝଟକା, ରାଜ୍ୟସଭାରୁ ଇସ୍ତଫା ଦେଲେ କୋଏଲ ମଲିକ

ପୁଣି ଟିଏମ୍‌ସିକୁ ଲାଗିଲା ବଡ଼ ଝଟକା । ରାଜ୍ୟସଭା ସଦସ୍ୟ ପଦରୁ ଇସ୍ତଫା ଦେଲେ TMC ସାଂସଦ କୋଏଲ ମଲିକ । ଗୁରୁବାର କୋଏଲ ରାଜ୍ୟସଭାରୁ ଇସ୍ତଫା ଦେଇଛନ୍ତି । ରାଜ୍ୟସଭାରୁ ଇସ୍ତଫା ଦେବାରେ ସେ ଚତୁର୍ଥ ଟିଏମସି ସାଂସଦ । ଏହା ପୂର୍ବରୁ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସରୁ ତିନି ଜଣ ସାଂସଦ ଇସ୍ତଫା ଦେଇ ବିଜେପିରେ ଯୋଗ ଦେଇଛନ୍ତି । ବିଜେପି ତାଙ୍କୁ ରାଜ୍ୟସଭା ପ୍ରାର୍ଥୀ ଭାବରେ ମନୋନୀତ କରିଛି । କୋଏଲ ମଲିକ ପ୍ରଥମେ ଏପ୍ରିଲରେ ରାଜ୍ୟସଭାକୁ ନିର୍ବାଚିତ ହୋଇଥିଲେ । ଏପ୍ରିଲ ୬ ତାରିଖରେ ରାଜ୍ୟସଭା ସଦସ୍ୟ ଭାବରେ ଶପଥ ଗ୍ରହଣ କରି ଏହି ଅଭିନେତ୍ରୀ ଆନୁଷ୍ଠାନିକ ଭାବରେ ଜାତୀୟ ରାଜନୀତିରେ ପ୍ରବେଶ କରିଥିଲେ ।

ରାଜ୍ୟସଭା ଅଧ୍ୟକ୍ଷଙ୍କ ନିକଟରେ ଇସ୍ତଫାପତ୍ର ଦାଖଲ

ଟିଏମସି ନେତା ଏବଂ ଅଭିନେତ୍ରୀ କୋଏଲ ମଲିକ ଗୁରୁବାର ରାଜ୍ୟସଭାରୁ ଇସ୍ତଫା ଦେଇଛନ୍ତି । ସେ ଉପରାଷ୍ଟ୍ରପତି ଏବଂ ରାଜ୍ୟସଭା ଅଧ୍ୟକ୍ଷ ସିପି ରାଧାକୃଷ୍ଣନଙ୍କୁ ଭେଟି ତାଙ୍କର ଇସ୍ତଫାପତ୍ର ପ୍ରଦାନ କରିଛନ୍ତି । କୋଏଲଙ୍କ ପୂର୍ବରୁ ଟିଏମସିରୁ ସୁଖେନ୍ଦୁ ଶେଖର ରାୟ, ସୁସ୍ମିତା ଦେବ ଏବଂ ପ୍ରକାଶ ଚିକ୍ ବାରିକ ମଧ୍ୟ ରାଜ୍ୟସଭାରୁ ଇସ୍ତଫା ଦେଇଥିଲେ । ଏହି ତିନି ନେତା ବିଜେପିରେ ଯୋଗ ଦେଇଛନ୍ତି ଏବଂ ରାଜ୍ୟସଭା ଉପନିର୍ବାଚନ ପାଇଁ ନାମାଙ୍କନ ଦାଖଲ କରିଛନ୍ତି ।

ଅଧିକ ପଢ଼ନ୍ତୁ: ମମତାଙ୍କ ମୁଣ୍ଡରେ ଚଡ଼କ; ଖୋଲିବ TMC ସରକାରର ଦୁର୍ନୀତି ଫାଇଲ୍; ଶୁଭେନ୍ଦୁ ସରକାର ଗଠନ କଲେ ନ୍ୟାୟିକ କମିଶନ

କୋଏଲ ମଲିକ ବଙ୍ଗଳା ଚଳଚ୍ଚିତ୍ର ଶିଳ୍ପର ଜଣେ ଜଣାଶୁଣା ଅଭିନେତ୍ରୀ । ସେ ଚଳଚ୍ଚିତ୍ର ଏବଂ ଟେଲିଭିଜନରେ ଅଭିନୟ ମାଧ୍ୟମରେ ନିଜର ପରିଚୟ ସୃଷ୍ଟି କରିଛନ୍ତି । ସେ ପ୍ରଖ୍ୟାତ ବଙ୍ଗଳା ଅଭିନେତା ରଞ୍ଜିତ ମଲିକଙ୍କ ଝିଅ । ୨୦୦୩ ମସିହାରେ, ସେ ଟଲିଉଡରେ ପ୍ରବେଶ କରିଥିଲେ ଏବଂ ଅଳ୍ପ ସମୟ ମଧ୍ୟରେ ସେ ଷ୍ଟାର ପାଲଟି ଯାଇଥିଲେ । ଚଳିତ ବର୍ଷ, ସେ ଆନୁଷ୍ଠାନିକ ଭାବରେ ତୃଣମୂଳ କଂଗ୍ରେସରେ ଯୋଗ ଦେଇଥିଲେ ଏବଂ ରାଜ୍ୟସଭାକୁ ନିର୍ବାଚିତ ହୋଇଥିଲେ । କୋଏଲ ମଲିକଙ୍କୁ ଅଭିଷେକ ବାନାର୍ଜୀଙ୍କ ନିକଟତର ବୋଲି ମଧ୍ୟ ବିବେଚନା କରାଯାଏ ।

ତୃଣମୂଳ କଂଗ୍ରେସ ନେତ୍ରୀ ରୁକ୍ମଣୀ ମଲିକ, ଯିଏ କୋଏଲ ମଲିକ ଭାବେ ବେଶ୍ ଲୋକପ୍ରିୟ ସେ ଗୁରୁବାର ରାଜ୍ୟସଭାର ଅଧ୍ୟକ୍ଷ ଏବଂ ଭାରତର ଉପରାଷ୍ଟ୍ରପତି ସି.ପି. ରାଧାକୃଷ୍ଣନଙ୍କୁ ଏକ ଚିଠି ଲେଖିଥିଲେ । ନିଜ ପତ୍ରରେ କୋୟଲ ଲେଖିଛନ୍ତି, “ଆଦରଣୀୟ ସଭାପତି ମହୋଦୟ, ମୁଁ ରାଜ୍ୟସଭାର ସଦସ୍ୟପଦରୁ ଇସ୍ତଫା ଦେଉଛି । ଦୟାକରି ଏହାକୁ ତତ୍କାଳ ପ୍ରଭାବରୁ ଗ୍ରହଣ କରାଯାଉ।”

ସେ ଆହୁରି କହିଛନ୍ତି, “ମୋର କାର୍ଯ୍ୟକାଳ ସମୟରେ ରାଜ୍ୟସଭାର ସଭାପତି, ଉପସଭାପତି ଏବଂ ସଚିବାଳୟର ସମସ୍ତ କର୍ମଚାରୀଙ୍କଠାରୁ ମିଳିଥିବା ସହଯୋଗ ପାଇଁ ମୁଁ ସେମାନଙ୍କ ପ୍ରତି ହୃଦୟରୁ କୃତଜ୍ଞତା ଜଣାଉଛି ।”