ପଶ୍ଚିମବଙ୍ଗ ରାଜନୀତିରେ ଐତିହାସିକ ପରିବର୍ତ୍ତନ । ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଭାବରେ ଶୁଭେନ୍ଦୁ ଅଧିକାରୀଙ୍କୁ ବାଛିଛି ବିଜେପି । ଆଜି ପଶ୍ଚିମବଙ୍ଗର ନୂଆ ମୁଖ୍ୟମନ୍ତ୍ରୀ ଭାବେ ଶପଥ ନେବେ ଶୁଭେନ୍ଦୁ । ଏନେଇ କୋଲକାତାର ଐତିହାସିକ ବ୍ରିଗେଡ୍ ଗ୍ରାଉଣ୍ଡରେ ବ୍ୟାପକ ପ୍ରସ୍ତୁତି କରାଯାଇଛି । ଆଜି ରବିନ୍ଦ୍ର ଜୟନ୍ତୀ ଅବସରରେ ବଙ୍ଗର ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ସମାରୋହ ଆଜୋୟିତ ହେଉଛି । ପ୍ରଥମ ଥର ଲାଗି ବିଜେପି ପଶ୍ଚିମବଙ୍ଗରେ କ୍ଷମତାକୁ ଆସିଛି । ତେବେ ଏହି ଐତିହାସିକ କ୍ଷଣକୁ ଆହୁରି ସ୍ମରଣୀୟ କରିବାକୁ ଆଜିର ଦିନକୁ ଚୟନ କରାଯାଇଥିବା କୁହାଯାଉଛି ।

• ଭବ୍ୟ ସମାରୋହରେ ସାମିଲ ହେବେ ପିଏମ ମୋଦି

ସେପଟେ ଆଜି ପୂର୍ବାହ୍ନ ୧୧ଟାରେ ପଶ୍ଚିମବଙ୍ଗର ନୂଆ ମୁଖ୍ୟମନ୍ତ୍ରୀ ଭାବେ ଶପଥ ନେଇପାରନ୍ତି ଶୁଭେନ୍ଦୁ । ଏହି ଶପଥ ଗ୍ରହଣ ସମାରୋହରେ ସାମିଲ ହେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନଙ୍କ ସମେତ ଅନ୍ୟ ବରିଷ୍ଠ ନେତା ଓ ମନ୍ତ୍ରୀ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ଏହି ଶପଥ ଗ୍ରହଣ ସମାରୋହରେ ସାମିଲ ହେବାର କାର୍ଯ୍ୟକ୍ରମ ରହିଛି । ଅନ୍ୟ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ ଓ ମନ୍ତ୍ରୀ ମଧ୍ୟ ସାମିଲ ହେବାର କାର୍ଯ୍ୟକ୍ରମ ରହିଛି । ତେବେ ଗତକାଲି ବିଧାୟକ ଦଳ ନେତା ନିର୍ବାଚିତ ହେବା ପରେ ୨୦୮ ବିଧାୟକଙ୍କ ସମର୍ଥନ ସହ ରାଜ୍ୟପାଳଙ୍କୁ ଭେଟିଥିଲେ ଶୁଭେନ୍ଦୁ ଅଧିକାରୀ ।

• ବଙ୍ଗରେ ବିଜେପିର ବିଶାଳ ବିଜୟ

ଏଥର ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପିକୁ ଐତିହାସିକ ବିଜୟ ମିଳିଛି । ଆଉ ବେଙ୍ଗଲରେ ଦଳର ଏହି ଲ୍ୟାଣ୍ଡ ସ୍ଲାଇଡ୍‌ ବିଜୟ ପରେ ଚର୍ଚ୍ଚାକୁ ଆସିଥିଲେ ପଶ୍ଚିମବଙ୍ଗ ବିଜେପିର ପୁରୁଖା ଚେହେରା ଶୁଭେନ୍ଦୁ ଅଧିକାରୀ । ଯାହାଙ୍କୁ ଗତ ୨୦୨୧ ବିଧାନସଭା ନିର୍ବାଚନ ପରେ ଦଳ ବିରୋଧି ଦଳ ନେତା ଆସନରେ ବସାଇଥିଲା । ବିରୋଧି ଦଳ ନେତା ଭାବେ ଦାୟିତ୍ଵ ଗ୍ରହଣ କରିସାରିବା ପରେ ଶୁଭେନ୍ଦୁ ଅଧିକାରୀ ଟିଏମସି ସରକାରକୁ ସନ୍ଦେଶଖାଲି, ଦୁର୍ଗାପୂଜା ସମୟରେ ହାୱଡ଼ା-ଉଲୁବେରିଆ ଅଞ୍ଚଳରେ ହୋଇଥିବା ହିଂସାକାଣ୍ଡ, ଆର.ଜି କର ହସ୍ପିଟାଲ ଘଟଣା ପ୍ରଭୃତି ପ୍ରସଙ୍ଗରେ ଶାଣିତ ସ୍ୱରରେ ଆକ୍ରମଣ କରିଥିଲେ ।

ପଢନ୍ତୁ ଏହି ଖବର: କେତେ ପାଠ ପଢିଛନ୍ତି ପଶ୍ଚିମବଙ୍ଗର ନୂଆ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ?

• ଦିଦିଙ୍କୁ ପରାସ୍ତ କରି କରିଥିଲେ ଚକିତ

ଗତ ୨୦୨୧ ବିଧାନସଭା ନିର୍ବାଚନରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କର ପାରମ୍ପରିକ ସିଟ୍ ଭବାନୀପୁର ଛାଡି ଶୁଭେନ୍ଦୁ ଅଧିକାରୀଙ୍କ ଗଡ଼ କୁହାଯାଉଥିବା ନନ୍ଦିଗ୍ରାମ ଆସନରୁ ପ୍ରତିଦ୍ୱନ୍ଦ୍ୱିତା କରିବାକୁ ନିଷ୍ପତ୍ତି ନେଇଥିଲେ । ନନ୍ଦିଗ୍ରାମରେ ମମତା ବାନାର୍ଜୀଙ୍କୁ ପରାସ୍ତ କରି ଶୁଭେନ୍ଦୁ ଅଧିକାରୀ ସମଗ୍ର ଦେଶକୁ ଚକିତ କରି ଦେଇଥିଲେ । ଏହି ବିଜୟ ତାଙ୍କୁ ରାତାରାତି ପଶ୍ଚିମବଙ୍ଗ ବିଜେପିର ସବୁଠାରୁ ବଡ଼ ଚେହେରା ଭାବେ ପରିଚୟ ମିଳିଥିଲା । ଆଉ ୨୦୨୬ ନିର୍ବାଚନରେ ସେ ମମତାଙ୍କ ପାରମ୍ପାରିକ ଭବାନୀପୁର ଆସନରୁ ମଧ୍ୟ ପରାସ୍ତ କରି ବେଙ୍ଗଲରେ ନୂଆ ଇତିହାସ ଲେଖିଥିଲେ । ବେଙ୍ଗଲ ଦଖଲ ପରେ ବିଜେପି ବଙ୍ଗର ନୂଆ ମୁଖ୍ୟମନ୍ତ୍ରୀ ଭାବେ ନନ୍ଦିଗ୍ରାମର ନାୟକ ଶୁଭେନ୍ଦୁ ଅଧିକାରୀଙ୍କ ନାଁରେ ମୋହର ମାରିଛି ।