Election Violence / ପଶ୍ଚିମବଙ୍ଗ ନିର୍ବାଚନରେ ହିଂସା; ଫୁଟିଲା ବୋମା, TMC ଓ AUJP କର୍ମୀ ଧସ୍ତାଧସ୍ତି

ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଚାଲିଛି । ଆଜି ପ୍ରଥମ ପର୍ଯ୍ୟାୟରେ ୧୬ଟି ଜିଲ୍ଲାରେ ୧୫୨ଟି ଆସନରେ ଭୋଟ୍ ଦେଉଛନ୍ତିଭୋଟର । ଏହାରି ଭିତରେ ଫୁଟୁଛି ବୋମା । ମୁର୍ଶିଦାବାଦ ଜିଲ୍ଲାର ନୌଡାରେ ଏକ ବିସ୍ଫୋରଣରେ ଅନେକ ଲୋକ ଆହତ ହେବା ପରେ ମମତାଙ୍କ ତୃଣମୂଳ କଂଗ୍ରେସ (ଟିଏମସି) ଏବଂ ଆମ ଜନତା ଉନ୍ନୟନ ପାର୍ଟି (ଏଜେୟୁପି) କର୍ମୀ ପରସ୍ପର ମଧ୍ୟରେ ଧସ୍ତାଧସ୍ତି ହୋଇଛନ୍ତି । ଏଜେୟୁପି ପ୍ରତିଷ୍ଠାତା ହୁମାୟୁନ କବୀରଙ୍କୁ ଟିଏମସି କର୍ମୀ ମାଡ଼ ମାରିଥିବା ଅଭିଯୋଗ । ବୋମାମାଡ଼ ଖବର ପାଇ ହୁମାୟୁନ କବୀର ଘଟଣା ସ୍ଥଳକୁ ଯାଇଥିଲେ ।

• AJUP ମୁଖ୍ୟଙ୍କୁ ମାଡ଼

ବଙ୍ଗଳାର ମୁର୍ଶିଦାବାଦ ଜିଲ୍ଲାରେ ବୋମା ବିସ୍ଫୋରଣ ଘଟଣା ଘଟିବା ପରେ, ଏୟୁଜେପିର ହୁମାୟୁନ କବୀର ଘଟଣାସ୍ଥଳ ପରିଦର୍ଶନ କରିଥିଲେ । କିନ୍ତୁ ତାଙ୍କ ଗସ୍ତ ଫଳରେ ଟିଏମସି କର୍ମୀ ଏବଂ ପୋଲିସ ମଧ୍ୟରେ ସଂଘର୍ଷ ହୋଇଥିଲା । ମତଦାନ ପ୍ରକ୍ରିୟା ସମୟରେ ଦଳୀୟ କର୍ମୀ ଏବଂ ପୋଲିସ ମଧ୍ୟରେ ଉତ୍ତେଜନା ବୃଦ୍ଧି ପାଇବାରୁ ପରିସ୍ଥିତି ନିୟନ୍ତ୍ରଣ ପାଇଁ ସୁରକ୍ଷା କର୍ମୀଙ୍କୁ ନିୟୋଜିତ କରାଯାଇଥିଲା । କିଛି ଲୋକଙ୍କୁ ହଟାଇବା ପାଇଁ ପୋଲିସକୁ ହାଲୁକା ଲାଠିଚାର୍ଜ ମଧ୍ୟ କରିଛି ।

• କିଏ ଫିଙ୍ଗିଲା ବୋମା ?

ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ ମତଦାନ ଚାଲିଥିବା ସମୟରେ ପ୍ରଥମ ହିଂସା ଘଟଣା ଘଟିଥିବା ଜଣାପଡ଼ିଛି । ମୁର୍ଶିଦାବାଦ ଜିଲ୍ଲାର ନୌଡାରେ ଅଜ୍ଞାତ ଲୋକଙ୍କ ଦ୍ୱାରା କ୍ରୁଡ୍ ବୋମା (ଘରୋଇ ଭାବେ ପ୍ରସ୍ତୁତ ଏକ ବିସ୍ଫୋରକ, ଯାହା ଅଧିକାଂଶ ସମୟରେ ଅସାମାଜିକ କାର୍ଯ୍ୟକଳାପ ବା ହିଂସା ପାଇଁ ବ୍ୟବହୃତ ହୁଏ । ଏହା ସ୍ୱଳ୍ପ ଶକ୍ତିସମ୍ପନ୍ନ କିନ୍ତୁ ବିପଜ୍ଜନକ ହୋଇଥାଏ) ଫିଙ୍ଗିବାରୁ ଅନେକ ଲୋକ ଆହତ ହୋଇଛନ୍ତି ।

ଜଣେ ଆହତ ଯୁବକ କହିଛନ୍ତି ଯେ ସେ ସକାଳ ପ୍ରାୟ ୮ଟାରେ ନମାଜ ପଢିବାକୁ ଯାଉଥିଲେ । ସେ ଠିଆ ହୋଇଥିବା ସମୟରେ ଦୁଇ ଜଣ ଯୁବକ ଆସି ତାଙ୍କ ଗୋଡ଼ ପାଖରେ ଏହି ବୋମା ଫିଙ୍ଗିଥିଲେ । ଏହି ଘଟଣାରେ ଏଜେୟୁପି କର୍ମୀଙ୍କ ସମ୍ପୃକ୍ତି ଥିବା ଆହତ ଯୁବକ ଜଣକ ଅଭିଯୋଗ କରିଛନ୍ତି । ସେପଟେ ଟିଏମସି ସାଂସଦ ଅବୁ ତାହିର ଖାନ ମଧ୍ୟ ସମାନ ଅଭିଯୋଗ ଆଣିଛନ୍ତି । ଏହି ବୋମାଟି ଶିବନଗର ପ୍ରାଥମିକ ବିଦ୍ୟାଳୟ ନିକଟରେ ଫିଙ୍ଗାଯାଇଥିବା ଜଣାପଡ଼ିଛି । ଉକ୍ତ ସ୍ଥାନରେ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରାଯାଇଛି ।

West Bengal Poll Violence: ନିର୍ବାଚନ ବେଳେ ହିଂସା | West Bengal Election | TMC vs AJUP

• ବିସ୍ଫୋରଣ ପରେ ଦୌଡ଼ାଦୌଡ଼ି ସ୍ଥିତି

ବିସ୍ଫୋରଣ ପୂର୍ବରୁ ମତଦାନ କେନ୍ଦ୍ର ନିକଟରେ ଲୋକଙ୍କ ଏକ ବଡ଼ ଭିଡ଼ ଜମା ହୋଇଥିଲା । କେତେକ ନିଜ ପାଳିକୁ ଅପେକ୍ଷା କରିଥିଲେ, ଅନ୍ୟମାନେ ଭୋଟ୍ ଦେଇ ବାହାରକୁ ବାହାରି ଆସୁଥିଲେ । ହଠାତ୍ ଏକ ଜୋରରେ ବିସ୍ଫୋରଣ ହେଲା ଏବଂ ଏହାପରେ ଦୌଡ଼ାଦୌଡ଼ି ସ୍ଥିତି ଦେଖିବାକୁ ମିଳିଥିଲା । ବିସ୍ଫୋରଣ ଶୁଣି ଲୋକମାନେ ଭୟଭୀତ ହୋଇ ଦୌଡ଼ିବାକୁ ଲାଗିଥିଲେ । କେତେକ ନିଜକୁ ବଞ୍ଚାଇବାକୁ ଚେଷ୍ଟା କରି ତଳେ ନଇଁ ପଡ଼ିଥିଲେ, ଅନ୍ୟମାନେ ଚିତ୍କାର କରି ନିଜ ପ୍ରିୟଜନଙ୍କୁ ଖୋଜିବାରେ ଲାଗିଲେ । ପରିବେଶ ଏତେ ଭୟଙ୍କର ଥିଲା ଯେ କିଛି ମୁହୂର୍ତ୍ତ ପାଇଁ କେହି ବୁଝିପାରିଲେ ନାହିଁ ଯେ କ'ଣ ଘଟିଛି । ଏହାପରେ ପୋଲିସ ଉକ୍ତ ସ୍ଥାନରେ ପହଞ୍ଚି ସ୍ଥିତିକୁ ନିୟନ୍ତ୍ରଣରେ ନେଇଛି ।

ପଢନ୍ତୁ ଏହି ଖବର: କିଏ ମାରିବ ବାଜି ? ପଶ୍ଚିମବଙ୍ଗରେ ୧୫୨ଟି ଆସନରେ ପ୍ରଥମ ପର୍ଯ୍ୟାୟ ଭୋଟିଂ ଆରମ୍ଭ

• ପୂର୍ବାହ୍ନ ୧୧ଟା ସୁଦ୍ଧା ୪୧.୧୧% ମତଦାନ

ଭାରତୀୟ ନିର୍ବାଚନ କମିଶନଙ୍କ ସୂଚନା ଅନୁଯାୟୀ, ପଶ୍ଚିମବଙ୍ଗର ପ୍ରଥମ ପର୍ଯ୍ୟାୟ ମତଦାନରେ ସକାଳ ୧୧ଟା ସୁଦ୍ଧା ୪୧.୧୧% ମତଦାନ ହୋଇଛି । ସକାଳ ୭ଟାରେ ମତଦାନ ଆରମ୍ଭ ହୋଇଥିଲା । ଦ୍ଵିତୀୟ ପର୍ଯ୍ୟାୟ ମତଦାନ ଆସନ୍ତା ବୁଧବାର ଅର୍ଥାତ ଏପ୍ରିଲ ୨୯ ତାରିଖରେ ଅନୁଷ୍ଠିତ ହେବ । ମୋଟ ୨୯୪ଟି ଆସନ ମଧ୍ୟରୁ ଆଜି ପ୍ରଥମ ପର୍ଯ୍ୟାୟ ମତଦାନରେ ୧୫୨ଟି ଆସନ ପାଇଁ ପଡୁଛି ଭୋଟ୍ ।