ପଶ୍ଚିମବଙ୍ଗରେ ବିଜେପି ସରକାର ଆସିବା ପରେ ଏବେ ଆକ୍ସନ ମୋଡରେ ନୂଆ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ । ପୂର୍ବ ସରକାରରେ ମହିଳାଙ୍କ ବିରୋଧରେ ହୋଇଥିବା ଅତ୍ୟାଚାରର ଯାଞ୍ଚ ଲାଗି କମିଟି ଗଠନ କରିଛନ୍ତି । ଏହି କମିଟିର ଅଧ୍ୟକ୍ଷତା କରିବେ ଅବସରପ୍ରାପ୍ତ ବିଚାରପତି ସମାପ୍ତି ଚାଟାର୍ଜୀ । ଏହି କମିଟିର ସଚିବ ହେଉଛନ୍ତି ଦମୟନ୍ତୀ ସେନ୍, ଏ ହେଉଛନ୍ତି ସେହି ଆଇପିଏସ ଅଫିସର ଯାହାକୁ ଦିଦି ତଡ଼ି ଦେଇଥିଲେ । ଏବେ ଶୁଭେନ୍ଦୁ ଅଧିକାରୀ ତାଙ୍କୁ ଗୁରୁ ଦାୟିତ୍ଵ ଦେଇଛନ୍ତି ।
ଦମୟନ୍ତୀ ସେନ୍ ହେଉଛନ୍ତି ୧୯୯୬ ବ୍ୟାଚର ଆଇପିଏସ ଅଧିକାରୀ । ତାଙ୍କୁ ପଶ୍ଚିମବଙ୍ଗର ଜଣେ ସଚ୍ଚୋଟ ଅଧିକାରୀ ଭାବରେ ଗଣାଯାଏ । ସେ କୋଲକାତା ପୋଲିସରେ ଜଏଣ୍ଟ କମିଶନର (ଅପରାଧ)ର ପ୍ରଥମ ମହିଳା ଅଧିକାରୀ ଏବଂ ପରେ ତାଙ୍କୁ ସ୍ଵତନ୍ତ୍ର କମିଶନରର ଦାୟିତ୍ଵ ଦିଆଯାଇଥିଲା । ଦମୟନ୍ତୀ ସେନଙ୍କ ଜନ୍ମ ୧୯୭୦ ମସିହାରେ ହୋଇଥିଲା । ସେ କୋଲକାତାର ଯାଦବପୁର ବିଶ୍ଵବିଦ୍ୟାଳୟରେ ଅର୍ଥଶାସ୍ତ୍ରରେ ସ୍ନାତକ ଓ ସ୍ନାତକୋତ୍ତର ହାସଲ କରିଛନ୍ତି । ପାଠପଢାରେ ବି ବେଶ ଧୁରନ୍ଧର ଥିଲେ । ଏହାବାଦ୍ ତାଙ୍କର ବ୍ୟକ୍ତିଗତ ଜୀବନ ମଧ୍ୟ ସର୍ବଦା ଚର୍ଚ୍ଚାରେ ରହିଆସିଛି । ସେ ଅବିବାହିତ, କିନ୍ତୁ ଏକ ସନ୍ତାନକୁ ପୋଷ୍ୟ ଭାବେ ଗ୍ରହଣ କରିଛନ୍ତି ।
- ପାର୍କ ଷ୍ଟ୍ରିଟ୍ ଗଣଦୁଷ୍କର୍ମ ବେଳେ ମିଳିଥିଲା ପରିଚୟ
ଦମୟନ୍ତୀ ସେନ୍ ୨୦୧୨ରେ ସବୁଠୁ ଚର୍ଚ୍ଚାକୁ ଆସିଥିଲେ, ଯେତେବେଳେ ସେ ପାର୍କ ଷ୍ଟ୍ରିଟ୍ ଗଣଦୁଷ୍କର୍ମ ମାମଲାର ତଦନ୍ତ କରୁଥିଲେ । ୨୦୧୨ ଫେବୃଆରୀ ୬ ତାରିଖରେ କୋଲକାତାର ପାର୍କ ଷ୍ଟ୍ରିଟ୍ ଅଞ୍ଚଳରେ ଜଣେ ମହିଳା ଅଭିଯୋଗ କରିଥିଲେ ଯେ ନାଇଟ୍ କ୍ଲବରୁ ବାହାରିବା ପରେ ତାଙ୍କୁ ଚଳନ୍ତା କାରରେ ଗଣଦୁଷ୍କର୍ମ କରିଥିଲେ । ସେତେବେଳେ ଏହି ଘଟଣା ପୁରା ଦେଶରେ ଚର୍ଚ୍ଚା ହୋଇଥିଲା ଏବଂ ଦମୟନ୍ତୀ ସେନ୍ କୋଲକାତା ପୋଲିସର କ୍ରାଇମବ୍ରାଞ୍ଚର ପ୍ରଭାରୀ ଜଏଣ୍ଟ କମିଶନର ଥିଲେ ଏବଂ ଏହି ମାମଲାର ଯାଞ୍ଚ କରିଥିଲେ ।
ପାର୍କ ଷ୍ଟ୍ରିଟ୍ ଗଣଦୁଷ୍କର୍ମ ମାମଲାରେ ତତ୍କାଳୀନ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହି ଘଟଣାକୁ ମନୁଷ୍ୟକୃତ ବୋଲି କହିଥିଲେ, ଯାହାକୁ ନେଇ ପୁରା ଦେଶରେ ବିବାଦ ଉପୁଜିଥିଲା । ମହିଳା ସଂଗଠନ ଓ ବିରୋଧୀ ଦଳ ମମତା ସରକାରଙ୍କୁ ଘେରିଥିଲେ । ଯେତେବେଳେ ଦମୟନ୍ତୀ ସେନ୍ ଯାଞ୍ଚ କରିଥିଲେ ଏହା ସତ ଘଟଣା ବୋଲି ଜଣାପଡ଼ିଥିଲା ଓ ମହିଳାଙ୍କ ସହିତ ଗଣଦୁଷ୍କର୍ମ ହୋଇଥିଲା । ଏହାପରେ ଆଇପିଏସ ଦମୟନ୍ତୀ ସେନ୍ ଓ ମମତା ସରକାରଙ୍କ ସମ୍ପର୍କରେ ତିକ୍ତତା ଆସିଥିଲା । ଏହି ଯାଞ୍ଚ ପରେ ଦମୟନ୍ତୀଙ୍କୁ ତୁରନ୍ତ ବଦଳି କରାଯାଇଥିଲା, ଯେଉଁଥିଲାଗି ରାଜ୍ୟରେ ରାଜନୈତିକ ପାଣିପାଗ ଉଷ୍ମ ହୋଇଥିଲା ।
- ଦମୟନ୍ତୀଙ୍କ ସପକ୍ଷରେ ଥିଲେ ହାଇକୋର୍ଟ
ଆଇପିଏସ ଅଫିସର ଦମୟନ୍ତୀ ସେନଙ୍କ ଯାଞ୍ଚ ଉପରେ କୋଲକାତା ହାଇକୋର୍ଟଙ୍କ ବି ଭରସା ଥିଲା । ୨୦୧୪ରେ ମଧ୍ୟଗ୍ରାମ ଦୁଷ୍କର୍ମ ଘଟଣାରେ ଯାଞ୍ଚ ବି କରୁଥିଲେ ଦମୟନ୍ତୀ । ଏହି ଘଟଣାରେ ଜଣେ ଟ୍ୟାକ୍ସି ଡ୍ରାଇଭର ଦୁଷ୍କର୍ମ କରିବା ପରେ ତାଙ୍କୁ ଜୀବିତ ଅବସ୍ଥାରେ ଜାଳିଦେଇଥିଲେ ଉତ୍ତ୍ୟକ୍ତ ଲୋକେ । ଏହି ଘଟଣାର ଯାଞ୍ଚ ଭାର ଦମୟନ୍ତୀଙ୍କ ହାତକୁ ଯାଇଥିଲା । ସେ ମମତା ସରକାରରେ ଚାପ ଥିବା ସତ୍ତ୍ଵେ ନିରପେକ୍ଷ ତଦନ୍ତ କରୁଥିଲେ । ଏଥିଲାଗି ତାଙ୍କୁ ମମତା ସରକାର ସାଇଡଲାଇନ୍ କରିଥିଲେ । ଏବେ ଶୁଭେନ୍ଦୁ ସରକାର ଆସିବା ପରେ ଦମୟନ୍ତୀଙ୍କୁ ପୁଣି ଥରେ ଡ଼କାଯାଇଛି ।
ପଢନ୍ତୁ ଏହି ଖବର: ନନ୍ଦିଗ୍ରାମ ସିଟ୍ କାହିଁକି ଛାଡ଼ିଲେ ଶୁଭେନ୍ଦୁ ଅଧିକାରୀ ?- ଶୁଭେନ୍ଦୁ ଦେଲେ ବଡ଼ ଦାୟିତ୍ଵ
ଏବେ ପଶ୍ଚିମବଙ୍ଗରେ ଶୁଭେନ୍ଦୁ ସରକାର ତାଙ୍କୁ ଗୁରୁତ୍ଵପୂର୍ଣ୍ଣ ଦାୟିତ୍ଵ ଦେଇଛନ୍ତି । ରାଜ୍ୟ ସରକାର ଟିଏମସି ଶାସନ କାଳ ସମୟରେ ହୋଇଥିବା ସଂସ୍ଥାଗତ ଭ୍ରଷ୍ଟାଚାର, ମହିଳା ଓ ଶିଶୁଙ୍କ ପ୍ରତି ଅପରାଧ ଏବଂ ନିର୍ବାଚନୀ ହିଂସାର ଯାଞ୍ଚ ପାଇଁ ଦୁଇଟି ଅଲଗା ଅଲଗା କମିଟି ଗଠନ କରିଛନ୍ତି । ମହିଳା ଓ ଶିଶୁଙ୍କ ଉପରେ ହୋଇଥିବା ଅତ୍ୟାଚାରର ଯାଞ୍ଚ କରିବାକୁ ଥିବା କମିଟିର ଅଧ୍ୟକ୍ଷ ହେଉଛନ୍ତି ଅବସରପ୍ରାପ୍ତ ବିଚାରପତି ସମାପ୍ତି ଚାଟାର୍ଜୀ ଏବଂ ଦମୟନ୍ତୀ ସେନ ଏହି କମିଟିର ସଚିବ ରହିବେ । ଏହି କମିଟି ବିଶେଷ କରି ମହିଳା, ଶିଶୁ, ଅନୁସୂଚିତ ଜାତି, ଅନୁସୂଚିତ ଜନଜାତି ଓ ସଂଖ୍ୟାଲଘୁଙ୍କ ଉପରେ ହେଉଥିବା ଅତ୍ୟାଚାରର ଯାଞ୍ଚ କରିବ । ଉଭୟ କମିଟି ଜୁନ ୧ ତାରିଖଠାରୁ କାମ ଆରମ୍ଭ କରିବେ ।
