ତୃଣମୂଳ କଂଗ୍ରେସର ରାଜନୈତିକ ଦୁର୍ଗ ଏବେ ଦଳର ଆଭ୍ୟନ୍ତରୀଣ ବିଦ୍ରୋହ ଯୋଗୁଁ ସମ୍ପୂର୍ଣ୍ଣ ଭାବେ ଦୋହଲି ଯାଇଛି । ଏହା ଦଳର ସୁପ୍ରିମୋ ମମତା ବାନାର୍ଜୀଙ୍କ ନିଜସ୍ୱ ଭୁଲ୍ ନିଷ୍ପତ୍ତି ଏବଂ ରଣନୀତିକ ବିଫଳତାର ପରିଣାମ ବୋଲି କୁହାଯାଉଛି । ବରିଷ୍ଠ ଏବଂ ଦଳ ପାଇଁ ରକ୍ତଝାଳ ବୁହାଇଥିବା ନେତାମାନଙ୍କୁ କୋଣଠେସା କରି ନିଜ ପୁତୁରା ଅଭିଷେକ ବାନାର୍ଜୀଙ୍କୁ ଦଳରେ ଅଧିକ ପ୍ରାଧାନ୍ୟ ଦେବା ମମତାଙ୍କ ପାଇଁ ଏବେ ବୁମେରାଙ୍ଗ ସଦୃଶ ହୋଇଛି ।


ଦଳର ବରିଷ୍ଠ ନେତା ହୁମାୟୁନ କବୀର ମମତା ବାନାର୍ଜୀଙ୍କ ଏହି ପରିବାରବାଦ ନୀତି ବିରୋଧରେ ସ୍ୱର ଉତ୍ତୋଳନ କରିଛନ୍ତି ଏବଂ ଅଭିଷେକଙ୍କୁ ଅନ୍ୟ ଅଭିଜ୍ଞ ନେତାମାନଙ୍କ ଉପରେ ଲଦି ଦିଆଯାଉଥିବାରୁ ଖୋଲାଖୋଲି ଆକ୍ରମଣ କରିଛନ୍ତି । ଏହି କାରଣରୁ ଟିଏମସି ଆଜି ନିଜ ଲୋକଙ୍କ ଦ୍ୱାରା ହିଁ ଧ୍ୱଂସ ଅଭିମୁଖେ ଗତି କରୁଛି । ଅନ୍ୟପଟେ, ଦଳରୁ ବିତାଡ଼ିତ କିମ୍ବା ଅସନ୍ତୁଷ୍ଟ ଥିବା ପ୍ରାୟ ୬୦ ଜଣ ଟିଏମସି ବିଧାୟକ (MLAs) ଏବେ ରାଜନୈତିକ ଆଶ୍ରୟ ଖୋଜୁଛନ୍ତି । ପୂର୍ବରୁ ସେମାନେ ବିଜେପି ଆଡ଼କୁ ଆଶା ରଖିଥିଲେ ମଧ୍ୟ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ନେତୃତ୍ୱରେ ପଶ୍ଚିମବଙ୍ଗରେ କ୍ଷମତାସୀନ ବିଜେପି ସରକାର ସେମାନଙ୍କ ପାଇଁ ଦ୍ୱାର ବନ୍ଦ କରିଦେଇଛନ୍ତି ।

ଟିଏମସିର ଏହି ଆଭ୍ୟନ୍ତରୀଣ ଅସ୍ଥିରତାର ସୁଯୋଗ ନେଇ ପ୍ରଦେଶ କଂଗ୍ରେସର ଟାଣୁଆ ନେତା ଅଧୀର ରଞ୍ଜନ ଚୌଧୁରୀ ଏବେ ସେହି ପ୍ରତ୍ୟାଖ୍ୟାତ ଟିଏମସି ବିଧାୟକମାନଙ୍କୁ କଂଗ୍ରେସ ଦଳକୁ ସ୍ୱାଗତ କରିବା ପାଇଁ ଡାକରା ଦେଇଛନ୍ତି । ମମତା ବାନାର୍ଜୀ ଦିନେ ଯେଭଳି କଂଗ୍ରେସକୁ ଭାଙ୍ଗି ନିଜ ଦଳ ଗଢ଼ିଥିଲେ, ଆଜି ଠିକ୍ ସେହିପରି ମହାରାଷ୍ଟ୍ରର "ଏକନାଥ ସିନ୍ଦେ" ମଡେଲ ଭଳି ତାଙ୍କର ନିଜ ଦୁର୍ଗ ନିଜ ଲୋକଙ୍କ ବିଦ୍ରୋହ ଯୋଗୁଁ ଧୂଳିସାତ ହେବାକୁ ଯାଉଛି ।

• କାହିଁକି TMCରେ ଅନ୍ତଃକନ୍ଦଳ: ଜାଣନ୍ତୁ ପଏଣ୍ଟ-ଟୁ-ପଏଣ୍ଟ

ପରିବାରବାଦ ବିରୋଧରେ ହୁମାୟୁନ କବୀରଙ୍କ ଆକ୍ରମଣ: ମମତା ବାନାର୍ଜୀ ସିନିୟର ନେତାମାନଙ୍କୁ ଅଣଦେଖା କରି କେବଳ ଅଭିଷେକ ବାନାର୍ଜୀଙ୍କୁ ଆଗକୁ ବଢ଼ାଉଥିବାରୁ ହୁମାୟୁନ କବୀର ତୀବ୍ର ଅସନ୍ତୋଷ ପ୍ରକାଶ କରିବା ସହ ଖୋଲାଖୋଲି ମମତାଙ୍କୁ ସମାଲୋଚନା କରିଛନ୍ତି ।

୨୦୨୬ ନିର୍ବାଚନର ବଡ଼ ବିପର୍ଯ୍ୟୟ: ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପି ୧୯୧ଟି ଆସନ ସହ ସଂଖ୍ୟାଗରିଷ୍ଠତା ହାସଲ କରି ସରକାର ଗଠନ କରିଥିବା ବେଳେ ଟିଏମସି ମାତ୍ର ୯୬ଟି ଆସନରେ ସୀମିତ ରହି ପରାଜୟର ସ୍ୱାଦ ଚାଖିଛି ।

୬୦ ବିଧାୟକଙ୍କ ବିଦ୍ରୋହ: ଦଳର ଶୀର୍ଷ ନେତୃତ୍ୱ ଉପରେ ବିରକ୍ତ ହୋଇ ଋତବ୍ରତ ବାନାର୍ଜୀଙ୍କ ଭଳି ପ୍ରମୁଖ ଚେହେରାଙ୍କ ସହ ପ୍ରାୟ ୬୦ ଜଣ ଟିଏମସି ବିଧାୟକ ଦଳ ବିରୋଧରେ ବିଦ୍ରୋହ ଘୋଷଣା କରିଛନ୍ତି ।

ଅଧୀର ରଞ୍ଜନ ଚୌଧୁରୀଙ୍କ ମାଷ୍ଟରଷ୍ଟ୍ରୋକ୍: ଟିଏମସିର ଏହି ଦୁର୍ବଳତାର ଫାଇଦା ଉଠାଇ ବରିଷ୍ଠ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ ସେହି ସମସ୍ତ ଅସନ୍ତୁଷ୍ଟ ଓ ଟିଏମସିରୁ ପ୍ରତ୍ୟାଖ୍ୟାତ ବିଧାୟକମାନଙ୍କୁ କଂଗ୍ରେସ ସହ ହାତ ମିଳାଇବାକୁ ପ୍ରସ୍ତାବ ଦେଇଛନ୍ତି ।

ଶୁଭେନ୍ଦୁ ଅଧିକାରୀଙ୍କ ପାୱାର ଗେମ୍: ପଶ୍ଚିମବଙ୍ଗରେ ଶୁଭେନ୍ଦୁ ଅଧିକାରୀ ମୁଖ୍ୟମନ୍ତ୍ରୀ ଆସନ ସମ୍ଭାଳିବା ପରେ ଟିଏମସିର ବହୁ ବିଦ୍ରୋହୀ ନେତା ବିଜେପିରେ ସ୍ଥାନ ନପାଇ ଏବେ ରାଜନୈତିକ ଅସ୍ଥିରତା ମଧ୍ୟକୁ ଠେଲି ହୋଇଯାଇଛନ୍ତି ।

ପଢନ୍ତୁ ଏହି ଖବର: ବିଭାଜନ ମୁହାଁ ଦଳ; ପଦ ଛାଡି଼ଲେ କୋଲକାତା ମେୟର