କୋଟି କୋଟି ଶ୍ରଦ୍ଧାଳୁଙ୍କ ଆରାଧ୍ୟ ଶ୍ରୀଜିଉଙ୍କ ରଥଟଣା ଆଜି ପାଇଁ ଶେଷ ହୋଇଛି । ଆସନ୍ତାକାଲି ସକାଳ ଧୂପ ପରେ ପୁଣି ରଥଟଣା ଆରମ୍ଭ ହେବ । ଶ୍ରୀଜଗନ୍ନାଥଙ୍କ ନନ୍ଦିଘୋଷ ସିଂହଦ୍ବାରରୁ ମାତ୍ର କେତେ ହାତ ଗଡ଼ିବା ପରେ ଅଟକି ଯାଇଛି । ସେହିପରି ବଳଭଦ୍ରଙ୍କ ତାଳଧ୍ବଜ ରଥ ଟାଉନ ଥାନା ନିକଟରେ ପହଞ୍ଚିଛି ।

ଅଧିକ ପଢ଼ନ୍ତୁ: ଛେରା ପହଁରା ପରେ ଆରମ୍ଭ ହେଲା ରଥଟଣା, ପ୍ରଥମେ ଗଡ଼ିଲା ବଡ଼ ଠାକୁରଙ୍କ ତାଳଧ୍ବଜ ରଥ

ସେହିପରି ଦେବୀ ସୁଭଦ୍ରାଙ୍କ ଦେବଦଳନ ରଥ ମରିଚକୋଟ ଛକ ନିକଟରେ ପହଞ୍ଚିଛି । ଭାଇ ଉଭଣୀ ସେମାନଙ୍କ ଯାତ୍ରା ଆରମ୍ଭ କରିଥିଲେ ମଧ୍ୟ ସିଂହଦ୍ବାର ସମ୍ମୁଖରେ ଅଟକି ରହିଥିଲେ ମହାପ୍ରଭୁ ଶ୍ରୀ ଜଗନ୍ନାଥ । ଶ୍ରଦ୍ଧାଳୁ ମାନେ ଅପେକ୍ଷା କରିଥିଲେ କେତେ ବେଳେ ଗଡିବ ମହାପ୍ରଭୁଙ୍କ ରଥ । ସବୁ ପ୍ରତୀକ୍ଷାର ଅନ୍ତ ଘଟାଇ ଶେଷରେ ଗଡିଥିଲା ନନ୍ଦିଘୋଷ ।

ଶ୍ରୀକ୍ଷେତ୍ରକୁ ଲକ୍ଷ ଲକ୍ଷ ଭକ୍ତଙ୍କୁ ଟାଣି ଆଣିଛି । କାଳିଆର ଅଦୃଶ୍ୟ ଡୋରି । ସକାଳୁ ସକାଳୁ ଜନସମୁଦ୍ର ହୋଇସାରିଥିଲା ବଡ଼ଦାଣ୍ଡ । ଆଗ ହେଲା ରଥ ପ୍ରତିଷ୍ଠା ନୀତି । ପ୍ରଥମେ ପହଣ୍ଡି ହୋଇ ଆସିଲେ ଚକ୍ରରାଜ ସୁଦର୍ଶନ । ତାଙ୍କ ପରେ ତାଳଧ୍ବଜକୁ ବିଜେ କଲେ ବଡ଼ ଭାଇ ବଳଭଦ୍ର । ପଛେ ପଛେ ଆସିଲେ ସାନ ଭଉଣୀ ଦେବୀ ସୁଭଦ୍ରା । ଶ୍ରୀଜୀଉଙ୍କ ଝଲକ ମାତ୍ରେ ଉପରକୁ ଉଠୁଥିଲା ହଜାର ହଜାର ହାତ । ସବୁ ପଛରେ ଗୋଟିଏ ବିଶ୍ୱାସ । ହଜାର ହଜାର ଆଖି । କିନ୍ତୁ ସମସ୍ତଙ୍କର ଥିଲା ଗୋଟିଏ ଅପେକ୍ଷା । କେବେ ମିଳିବ କାଳିଆ ସାଆନ୍ତଙ୍କର ସେହି ଅମୂଲ୍ୟ ଦର୍ଶନ । ଶେଷରେ ପ୍ରତୀକ୍ଷାର ହେଲା ଅନ୍ତ । ହଲି ଦୋହଲି ଆସିଲେ କାଳିଆ ସାଆନ୍ତ । ତାଙ୍କ ଦାଣ୍ଡରେ ତାଙ୍କ ଯାତ୍ରାରେ ବର୍ଷାରେ ଭିଜୁଥିଲେ ଲକ୍ଷ ଲକ୍ଷ ଭକ୍ତ । ସେଥିପାଇଁ ବୋଧହୁଏ ନିଜ ମୁଣ୍ଡରୁ ଟାହିଆ ଓହ୍ଲାଇ ଆସିଥିଲେ ଜଗତର ନାଥ । ରଥରୂଢ଼ ଚତୁର୍ଦ୍ଧାମୂର୍ତ୍ତିଙ୍କୁ ଦେଖି ଭାବ ବିହ୍ବଳ ହେଲେ ଭକ୍ତ ।