Puri Rath Yatra 2026 / ଛେରା ପହଁରା ପରେ ଆରମ୍ଭ ହେଲା ରଥଟଣା, ପ୍ରଥମେ ଗଡ଼ିଲା ବଡ଼ ଠାକୁରଙ୍କ ତାଳଧ୍ବଜ ରଥ

ଛେରା ପହଁରା ନୀତି ସମାପନ ପରେ ଆରମ୍ଭ ହେଲା ରଥଟଣା । ଶ୍ରୀଗୁଣ୍ଡିଚା ମନ୍ଦିର ଅଭିମୁଖେ ରଥକୁ ଟାଣି ନେଉଛନ୍ତି ଭକ୍ତ ମଣ୍ଡଳୀ । ଘଣ୍ଟ ଘଣ୍ଟା ନାଦରେ ଘର୍‌ ଘର୍‌ ଗଡ଼ିଲା ବଳଭଦ୍ରଙ୍କ ତାଳଧ୍ବଜ ରଥ । ପ୍ରଥମେ ବଡ଼ ଭାଇ ଜନ୍ମବେଦୀ ଅଭିମୁଖେ ବାହାରିଛନ୍ତି । ଏହାପରେ ସାନ ଭଉଣୀ ଦେବୀ ସୁଭଦ୍ରା ବାହାରିବେ । ଶେଷରେ ଜଗତର ନାଥ ଜଗନ୍ନାଥଙ୍କ ନନ୍ଦିଘୋଷ ରଥ ବଡ଼ଦାଣ୍ଡରେ ଗଡ଼ିବ ।

ରଥ ଉପରେ ଛେରାପହଁରା ନୀତି ସମାପନ ହେବା ପରେ ଚାରମାଳ ଖୋଲା ହୋଇଥିଲା । ଏହା ପରେ ରଥରେ ଅନ୍ୟାନ୍ୟ ନୀତି ଅନୁଷ୍ଠିତ ହୋଇ ଘୋଡ଼ା ଜୋଖା ହୋଇଛି । ଏହାପରେ ରଥଟଣା କାର୍ଯ୍ୟ ଆରମ୍ଭ ହୋଇଛି । ଭାଇ ଭଉଣୀଙ୍କୁ ସାଥୀରେ ନେଇ ନବଦିନାତ୍ମକ ଯାତ୍ରାରେ ବାହାରିଲେ ମହାପ୍ରଭୁ । ୯ ଦିନ ଧରି ଜନ୍ମବେଦୀରେ ଲୀଳାଖେଳା କରିବେ ଚତୁର୍ଦ୍ଧା ମୂରତି ।

ଅଧିକ ପଢ଼ନ୍ତୁ: ଆରମ୍ଭ ହେଲା ଛେରା ପହଁରା ନୀତି: ଜାଣନ୍ତୁ ମହାବାହୁଙ୍କ ଘୋଷଯାତ୍ରାର ଦୁର୍ଲଭ ନୀତି...

ବିଶ୍ବ ପ୍ରସିଦ୍ଧ ରଥଯାତ୍ରାର ଅନନ୍ୟ ପରମ୍ପରା ହେଉଛି ଛେରା ପହଁରା । ଗଜପତି ମହାରାଜା ଦିବ୍ୟସିଂହ ଦେବ ଏହି ନୀତି ସମ୍ପନ୍ନ କରିଛନ୍ତି । ମହାପ୍ରଭୁଙ୍କୁ ଶଙ୍କରାଚାର୍ଯ୍ୟ ଦର୍ଶନ କରିବା ପରେ ରଥ ଉପରେ ଛେରା ପହଁରା ନୀତି କରିଛନ୍ତି ଗଜପତି ମହାରାଜା । ଗଜପତି ମହାରାଜା ପ୍ରଥମେ ତାଳଧ୍ୱଜ ରଥରେ ଛେରା ପହଁରା କରିବା ପରେ ଦେବୀ ସୁଭଦ୍ରାଙ୍କ ରଥ ଦେବଦଳନ ଓ ଶେଷରେ ମହାପ୍ରଭୁ ଜଗନ୍ନାଥଙ୍କ ନନ୍ଦିଘୋଷ ରଥକୁ ଯାଇ ଛେରା ପହଁରା ନୀତି ସମାପନ କରିଛନ୍ତି । 

ଜଗାର ରଥଯାତ୍ରା ଦେଖିବାକୁ ଜନସମୁଦ୍ର ପାଲଟିଛି ବଡ଼ଦାଣ୍ଡ । ଭାବ ଓ ଭକ୍ତିରେ ଉଛୁଳି ପଡ଼ୁଛି ବଡ଼ଦାଣ୍ଡ । ଭଗବାନ ଓ ଭକ୍ତଙ୍କ ମଧ୍ୟରେ ବାଧକ ସାଜିପାରୁନି ବର୍ଷା । ଚକାଆଖିର ପ୍ରେମରେ ବିଭୋର ମନ ଓ ଆତ୍ମା । ରଥାରୂଢ଼ କଳାଶ୍ରୀମୁଖର ଦର୍ଶନ ଅପେକ୍ଷାରେ କୋଟି କୋଟି ଭକ୍ତ । ଚତୁର୍ଦ୍ଧାମୂର୍ତ୍ତିଙ୍କ ଝଲକ ପାଇବା ପାଇଁ ଭକ୍ତଙ୍କ ମଧ୍ୟରେ ଅଦ୍ଭୁତ ଶିହରଣ ଦେଖିବାକୁ ମିଳିଛି । ବର୍ଷା ଯୋଗୁଁ ବଡ଼ ଦାଣ୍ଡକୁ ଘୋଡ଼େଇଛି ଭକ୍ତଙ୍କ ମାଳମାଳ ଛତା, ଯାହାର ଦୃଶ୍ୟ ବେଶ ମନୋରମ ରହିଛି ।

କଡ଼ା ସୁରକ୍ଷା ବଳୟରେ ଶ୍ରୀକ୍ଷେତ୍ର

ସେପଟେ କଡ଼ା ସୁରକ୍ଷା ବଳୟରେ ଅଛି ପୁରୀ ସହର । AI ଓ ସିସିଟିଭି ନଜରରେ ସାରା ସହରକୁ ରଖାଯାଇଛି । ୧୨ ହଜାର ପୋଲିସଙ୍କ ସହ ସଜାଗ ଅଛନ୍ତି କୋଷ୍ଟଗାର୍ଡ ଓ ନୌସେନା । ପୋଲିସ ଡିଜି ୱାଇ ବି ଖୁରାନିଆ କହିଲେ, ସବୁ ଠିକ୍ ସମୟରେ ଚାଲୁଛି । ସୁରୁଖୁରୁରେ ହେବ ରଥ ଟଣା । ଅନ୍ୟପଟେ ସବୁ ଠିକ୍‌ଠାକ୍ ଚାଲିଛି କହିଛନ୍ତି ପୁରୀ ଏସ୍‌ପି ପ୍ରତୀକ ସିଂ । ସେ ସବୁ ବ୍ୟବସ୍ଥାକୁ ତନତନ କରି ତଦାରଖ କରିଛନ୍ତି ।