ପୁରୀ: ଆଜି ରଥଯାତ୍ରାର ଦ୍ଵିତୀୟ ଦିନରେ ଶରଧାବାଲିରେ ଲାଗିଲା ତିନି ରଥ । ପ୍ରଥମେ ବଡ଼ ଠାକୁର ବଳଭଦ୍ରଙ୍କ ତାଳଧ୍ଵଜ, ତା ପଛକୁ ପଛ ଦେବୀ ସୁଭଦ୍ରାଙ୍କ ଦର୍ପଦଳନ ଓ ଶେଷରେ କାଳିଆର ନନ୍ଦିଘୋଷ ରଥ ଶ୍ରୀଗୁଣ୍ଡିଚା ମନ୍ଦିରରେ ପହଞ୍ଚିଛି । ଜନ୍ମସ୍ଥାନରେ ତିନି ରଥ ଲାଗିବା ପୂର୍ବରୁ ଆଜି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ମନ୍ଦିରରେ ପହଞ୍ଚି ସ୍ଥିତିକୁ ତଦାରଖ କରିଥିଲେ । ସେପଟେ ଆଜି ତିନି ରଥରେ ତିନି ଠାକୁରଙ୍କ ସମସ୍ତ ନୀତିକାନ୍ତି କରାଯିବ । ଆସନ୍ତାକାଲି ଗୋଟି ପହଣ୍ଡିରେ ଭାଇ ଭଉଣୀ ଆଡ଼ପ ମଣ୍ଡପ ବିଜେ କରିବେ ।

ବରିଷ୍ଠ ସେବାୟତ ବିନାୟକ ଦାସ ମହାପାତ୍ର ଏ ନେଇ ସୂଚନା ଦେଇ କହିଛନ୍ତି ଯେ ଆଜି ରଥ ଉପରେ ଗୋପାଳବଲ୍ଲଭ, ସକାଳ ଧୂପ ନୀତି, ମଧ୍ୟାହ୍ନ ଧୂପ, ସନ୍ଧ୍ୟା ଆଳତି, ସନ୍ଧ୍ୟା ଧୂପ, ବଡ଼ ସିଂହାର ବେଶ ଏବଂ ପହୁଡ଼ ନୀତି ଅନୁଷ୍ଠିତ ହେବ । ଆସନ୍ତାକାଲି ଭୋରୁ ମଙ୍ଗଳା ଆଳତୀ, ଅବକାଶ, ଗୋପାଳ ବଲ୍ଲଭ, ସକାଳ ଧୂପ, ଯାତ୍ରାଙ୍ଗି ମହାସ୍ନାନ, ମଧ୍ୟାହ୍ନ ଧୂପ, ସନ୍ଧ୍ୟା ଆଳତି, ସନ୍ଧ୍ୟା ଧୂପ, ଘୋଡ଼ା ପିଠା, ଚାରମାଳ ବନ୍ଧା ନୀତି ପରେ ପୁଷ୍ପାଞ୍ଜଳି, ଡୋର ଲାଗି ଏବଂ ଗୋଟି ପହଣ୍ଡିରେ ତିନି ଠାକୁର ଜନ୍ମ ବେଦୀକୁ ଯିବେ ।

ଭକ୍ତିମୟ ପରିବେଶରେ ଶ୍ରୀଗୁଣ୍ଡିଚା ମନ୍ଦିର ସମ୍ମୁଖରେ ଶ୍ରୀବିଗ୍ରହମାନଙ୍କ ତିନି ରଥ ପହଞ୍ଚିଛି।

ଜୟ ଶ୍ରୀଜଗନ୍ନାଥ ମହାପ୍ରଭୁ।🙏#Rathayatra2026 #JaiJagannatha #RathaJatra2026 #RathaYatra #ShreeJagannathaDhaam #Puri pic.twitter.com/w7ofj5mVWu

— Shree Jagannatha Temple, Puri (@JagannathaDhaam) July 17, 2026

• ଭକ୍ତିମୟ ଶ୍ରୀଗୁଣ୍ଡିଚା ମନ୍ଦିର

ଘୋଷଯାତ୍ରାର ଦ୍ଵିତୀୟ ଦିନରେ ସମସ୍ତଙ୍କ ମୁହଁରେ 'ଜୟ ଜଗନ୍ନାଥ' ଧ୍ଵନି ପ୍ରତିଧ୍ଵନିତ ହୋଇଥିଲା । ଭକ୍ତି ଓ ଭାବର ପଥ ପାଲଟିଥିଲା ବଡ଼ଦାଣ୍ଡ । ଘଣ୍ଟଘଣ୍ଟା ମାଡ଼ ସାଙ୍ଗକୁ ହରିବୋଲ ଓ ହୁଳହୁଳି ଦେଇ ରଥକୁ ଆଗ୍ରହର ସହିତ ଶ୍ରୀଗୁଣ୍ଡିଚା ମନ୍ଦିରକୁ ଟାଣି ନେଇଥିଲେ ଭକ୍ତ । ଯେଉଁ ଦଉଡ଼ି ରଥକୁ ଟାଣେ, ସେହି ଦଉଡ଼ି ମଣିଷର ଅହଙ୍କାରକୁ ବି ଟାଣି ନେଇଯାଏ । ଏହି ବିଶ୍ଵାସରେ ଅନେକ ଭକ୍ତ ଆଗ୍ରହର ସହକାରେ ରଥ ଟାଣିଥିବା ଦେଖିବାକୁ ମିଳିଛି ।

ପଢନ୍ତୁ ଏହି ଖବର: ପୋଲିସର ନିର୍ଦ୍ଦେଶାବଳୀ ମାନିବାକୁ ଅପିଲ୍; ଛୋଟ ପିଲା ଏବଂ ବୟସ୍କଙ୍କୁ ନେଇ ପୁରୀ ଆସନି

• ସକାଳ ୯ଟାରୁ ଆରମ୍ଭ ହୋଇଥିଲା ରଥଟଣା

ଆଜି ସକାଳ ୯ଟାରୁ ପୁଣି ରଥଟଣା ଆରମ୍ଭ ହୋଇଥିବାବେଳେ ପ୍ରଥମେ ତାଳଧ୍ଵଜ ଓ ପରେ ଦେବୀ ସୁଭଦ୍ରାଙ୍କ ଦର୍ପଦଳନ ରଥ ଅପରାହ୍ନ ୧ଟା ମଧ୍ୟରେ ଶରଧାବାଲିରେ ଲାଗିଥିଲା । ଏବେ ଅପରାହ୍ନ ୩ଟା ପାଖାପାଖି ନନ୍ଦିଘୋଷ ବି ଶ୍ରୀଗୁଣ୍ଡିଚା ମନ୍ଦିରରେ ଲାଗିଛି । ଗତକାଲି ବର୍ଷା ଥିଲା, କିନ୍ତୁ ଆଜି ନୀଳ ଆକାଶ । ଗତକାଲି ଅପେକ୍ଷା ଥିଲା, ଆଜି ପୂର୍ଣ୍ଣତା । ଏବେ ୯ଦିନ ଜନ୍ମବେଦୀରେ ଭକ୍ତଙ୍କୁ ଦର୍ଶନ ଦେବେ ମହାବାହୁ । କୁହାଯାଏ ଜନ୍ମବେଦୀରେ ଶ୍ରୀଜିଉଙ୍କ ଦର୍ଶନ କଲେ ଅପାର କରୁଣା ମିଳେ । ଆସନ୍ତା ୯ଦିନ ଯାଏଁ ରତ୍ନବେଦୀ ଛାଡ଼ି ଜନ୍ମବେଦୀରେ ଲୀଳାଖେଳା ପରେ ଆଷାଢ଼ ଶୁକ୍ଳପକ୍ଷ ଦଶମୀ ବା ବାହୁଡ଼ା ଦଶମୀ ଦିନ ଶ୍ରୀଜଗନ୍ନାଥ ମହାପ୍ରଭୁ ରଥରେ ଗୁଣ୍ଡିଚା ଘରୁ ବଡ଼ ଦେଉଳକୁ ଫେରିବେ ।