Rohit Message Viral / ହିରୋ ସାଜିଲେ ସଞ୍ଜୁ ସାମସନ; ଏବେ ଚର୍ଚ୍ଚାରେ ବର୍ଷ ପୂର୍ବରୁ ହିଟମ୍ୟାନ କହିଥିବା କଥା

ସୁପର ସଣ୍ଡେରେ ୱେଷ୍ଟଇଣ୍ଡିଜ୍ ବିରୋଧରେ ଖେଳାଯାଇଥିଲା ସୁପର-୮ ଭଳି ଗୁରୁତ୍ଵପୂର୍ଣ୍ଣ ମ୍ୟାଚରେ ସଞ୍ଜୁ ସାମସନଙ୍କ ଧୂଆଁଦାର ବ୍ୟାଟିଂ । ୫୦ ବଲରେ ୯୭ ରନ କରି ଅପରାଜିତ ଥିବାବେଳେ ଭାରତକୁ ଦେଇଛନ୍ତି ସେମି ଟିକେଟ୍ । ଏବେ ସମସ୍ତେ ସଞ୍ଜୁଙ୍କୁ ପ୍ରଶଂସାରେ ପୋତିଛନ୍ତି । ସଞ୍ଜୁଙ୍କ ଦମଦାର ପ୍ରଦର୍ଶନ ପରେ ଏବେ ହିଟମ୍ୟାନ ରୋହିତ ଶର୍ମାଙ୍କ ସେହି ପୁରୁଣା କଥା ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।

• କଣ କହିଥିଲେ ରୋହିତ ଶର୍ମା ?

୨୦୨୬ ଟି-୨୦ ବିଶ୍ୱକପ୍ ଆରମ୍ଭରେ ସାମସନଙ୍କୁ ପ୍ରଥମ ମ୍ୟାଚରୁ ବାହାରେ ବସିବାକୁ ପଡ଼ିଥିଲା । ସେହି ସମୟରେ ଦଳ ସହିତ ସାକ୍ଷାତ କରିଥିବା ରୋହିତ ଶର୍ମା ତାଙ୍କୁ ଉତ୍ସାହିତ କରି କହିଥିଲେ, "ନିରାଶ ହୁଅ ନାହିଁ । ଟୁର୍ଣ୍ଣାମେଣ୍ଟ ଲମ୍ବା, ତୁମେ ନିଶ୍ଚିତ ଭାବରେ ତୁମର ସୁଯୋଗ ପାଇବ । ସୁଯୋଗ ଯେକୌଣସି ସମୟରେ ଆସିପାରେ ।" ତେବେ ଏଠାରେ ଆପଣଙ୍କୁ କହିରଖୁଛୁ କି ଆଇସିସି ରୋହିତଙ୍କୁ ଏହି ଟୁର୍ଣ୍ଣାମେଣ୍ଟ ଲାଗି ଆମ୍ବାସାଡାର ଭାବରେ ଘୋଷଣା କରିଥିଲା । ପୂର୍ବତନ ଭାରତୀୟ ଅଧିନାୟକ ତଥା ହିଟମ୍ୟାନ ରୋହିତଙ୍କ ଏହି ଦୁଇ ପଦ କଥା ସାମସନଙ୍କ ଆତ୍ମବିଶ୍ଵାସକୁ ଦ୍ଵିଗୁଣିତ କରିଥିଲା ।

• 'ଏବେ ମୁଁ ବହୁତ ଭଲ ଅନୁଭବ କରୁଛି'

ସାମସନ୍ କହିଥିଲେ ଯେ ଦଳରୁ ଦୂରରେ ଥିବା ସମୟରେ ସେ ନିଜ ଉପରେ କାମ କରିଥିଲେ ଏବଂ ସୋସିଆଲ ମିଡିଆରୁ ଦୂରରେ ରହିଥିଲେ । ସେ ଆହୁରି କହିଥିଲେ, "ମୁଁ ଅନେକ ଲୋକଙ୍କ ସହିତ କାମ କରିଛି ଏବଂ ସେମାନଙ୍କ ପରାମର୍ଶକୁ ସମ୍ମାନ ଦେଇଛି । କିନ୍ତୁ ମୁଁ ଏହା ବି ଜାଣିଥିଲି ଯେ ମୁଁ ଏହି ସେଟଅପ୍ ସହିତ ୩ଟି ଅନ୍ତର୍ଜାତୀୟ ଶତକ ହାସଲ କରିଛି । ତେଣୁ ମୁଁ ମୋର ମୌଳିକ ଏବଂ ସଟ୍ ଚୟନ ଉପରେ ଧ୍ୟାନ ଦେଇଥିଲି । ମୁଁ ବହୁତ ପରିବର୍ତ୍ତନ କରିବାକୁ ଚାହୁଁ ନଥିଲି । ମୁଁ ମୋର ଫୋନ୍ ଏବଂ ସୋସିଆଲ ମିଡିଆ ବନ୍ଦ କରିଦେଲି । କେବଳ ମୋ ନିକଟତର ଲୋକଙ୍କ କଥା ଶୁଣିଲି । ଏବେ ମୁଁ ବହୁତ ଭଲ ଅନୁଭବ କରୁଛି ।"

• 'ରୋହିତ-କୋହଲିଙ୍କଠୁ ମିଳିଛି ପ୍ରେରଣା'

ମ୍ୟାଚ୍ ପରେ ସଞ୍ଜୁ ବହୁ ଭାବବିହ୍ଵଳ ହୋଇଯାଇଥିବା ଦେଖିବାକୁ ମିଳିଥିଲା । ସେ ନିଜ କ୍ୟାରିଅରରେ ୫୦ରୁ ୬୦ଟି ମ୍ୟାଚ ଖେଳିଛନ୍ତି, ହେଲେ ୧୦୦ରୁ ଅଧିକ ମ୍ୟାଚ୍ ଦେଖିଛନ୍ତି । ଚାପ ବେଳେ ଭାରତର ଅଭିଜ୍ଞ ଖେଳାଳି ରୋହିତ ଶର୍ମା ଓ ବିରାଟ କୋହଲି କିପରି ଶାନ୍ତ ରହି ପରିସ୍ଥିତିକୁ ସାମ୍ନା କରନ୍ତି, ସେଥିରୁ ସେ ଶିକ୍ଷା ଗ୍ରହଣ କରିଛନ୍ତି ବୋଲି ମଧ୍ୟ କହିଥିଲେ ।

ଅଧିକ ଖବର ପଢନ୍ତୁ...