ଅଷ୍ଟ୍ରେଲିଆର ମେଲବର୍ଣ୍ଣ କ୍ରିକେଟ୍‌ ଷ୍ଟାଡିୟମରେ ଭାରତ-ଅଷ୍ଟ୍ରେଲିଆ ମଧ୍ୟରେ ଦ୍ବିତୀୟ ଟି-୨୦ ମ୍ୟାଚ୍ ଖେଳାଯାଇଥିଲା । ଏହି ମ୍ୟାଚ୍‌ର ଭାରତର ବ୍ୟାଟିଂ ବିପର୍ଯ୍ୟୟ ହୋଇଥିଲା । ଅଭିଷେକ ଶର୍ମା ଓ ହର୍ଷିତ ରାଣାଙ୍କ ବ୍ୟତୀତ ଅନ୍ୟ କୌଣସି ବ୍ୟାଟ୍ସମ୍ୟାନ୍‌ ଦୁଇ ଅଙ୍କ ଛୁଇଁପାରିନାହାନ୍ତି । ତେବେ ଏହି ମ୍ୟାଚ୍‌ରେ ଟିମ୍ ଇଣ୍ଡିଆର ଓପନର ଅଭିଷେକ ଶର୍ମା ୬୮ ରନ୍‌ର ଇନିଂସ ଖେଳି ବିରାଟ କୋହଲିଙ୍କ ଏକ ରେକର୍ଡ ଭାଙ୍ଗିଛନ୍ତି ।

ବିରାଟଙ୍କ ରେକର୍ଡ ଭାଙ୍ଗିଲେ ଅଭିଷେକ

ଟିମ୍ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ୍‌ ବିରାଟ କୋହଲି ଟି-୨୦ ଅନ୍ତଜାର୍ତୀୟରେ ପ୍ରଥମ ୨୫ଟି ଇନିଂସରେ ୯୦୬ ରନ୍‌ କରି ସର୍ବାଧିକ ରନ୍‌ ସ୍କୋରର ଥିଲେ । କିନ୍ତୁ ଶୁକ୍ରବାର ଖେଳାଯାଇଥିବା ମ୍ୟାଚ୍‌ ଅଭିଷେକ ଶର୍ମାଙ୍କ କୋହଲିଙ୍କ ଏହି ରେକର୍ଡ ଭାଙ୍ଗିଛନ୍ତି । ସେ ୨୫ ଇନିଂସରେ ୯୩୬ ରନ୍‌ କରିଛନ୍ତି ।

ଅଧିକ ପଢ଼ନ୍ତୁ: ଭାଇରାଲ ହେଉଛି ବିରାଟ କୋହଲିଙ୍କ One 8 ରେସ୍ତୋରାଁର ଖାଦ୍ୟ ମେନ୍ୟୁ

୨୫ ଟି-୨୦ ଅନ୍ତର୍ଜାତୀୟ ଇନିଂସରେ ସର୍ବାଧିକ ରନ୍ କରିଥିବା ବ୍ୟାଟ୍ସମ୍ୟାନଙ୍କ ତାଲିକାରେ ଅଭିଷେକ ଶର୍ମା ଚତୁର୍ଥ ସ୍ଥାନରେ ଅଛନ୍ତି । ଏହି ତାଲିକାର ଶୀର୍ଷ ସ୍ଥାନରେ ଅଛନ୍ତି ଇଂଲଣ୍ଡର ଡେଭିଡ୍ ମାଲାନ୍ । ଯିଏକି ୨୫ ଇନିଂସରେ ୧୦୧୦ ରନ୍ କରିଥିଲେ । ସେହିପରି ବାବର ଆଜମ୍ ୯୫୨ ରନ୍ ସହିତ ଦ୍ୱିତୀୟ ଏବଂ ଡେଭିଡ୍ କନୱେ ୯୪୧ ରନ୍ ସହିତ ତୃତୀୟ ସ୍ଥାନରେ ଅଛନ୍ତି ।

ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ମ୍ୟାଚ୍‌ରେ ଅଭିଷେକ ଶର୍ମା ତାଙ୍କର ଷଷ୍ଠ ଟି-୨୦ ଅନ୍ତର୍ଜାତୀୟ ଅର୍ଦ୍ଧଶତକ ହାସଲ କରିଥିଲେ। ଅଭିଷେକ ବର୍ତ୍ତମାନ ଟି-୨୦ରେ ବିଶ୍ୱର ନମ୍ବର-୧ ବ୍ୟାଟ୍ସମ୍ୟାନ୍ । ଏହି ଇନିଂସ ତାଙ୍କ ଆଇସିସି ରେଟିଂ ତାଲିକା ସ୍ଥିତିକୁ ଆହୁରି ମଜବୁତ କରିବ ।

ତୃତୀୟ ଟି-୨୦ ଗୁରୁତ୍ୱପୂର୍ଣ୍ଣ

ଭାରତ-ଅଷ୍ଟ୍ରେଲିଆ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍‌ର ପ୍ରଥମ ମ୍ୟାଚ୍‌ ବର୍ଷା କାରଣରୁ ଅଧାରୁ ବାତିଲ ହୋଇଥିଲା । ଏହା ପରେ ମେଲବର୍ଣ୍ଣରେ ଖେଳାଯାଇଥିବା ଦ୍ବିତୀୟ ମ୍ୟାଚ୍‌ରେ ଭାରତ ପରାଜୟ ବରଣ କରିଥିଲା । ସେଥିପାଇଁ ତୃତୀୟ ଟି-୨୦ ଜିତିବା ଭାରତ ପାଇଁ ବେଶ୍ ଗୁରୁତ୍ବପୂର୍ଣ୍ଣ । କାହିଁକି ନା ଯଦି ଅଷ୍ଟ୍ରେଲିଆ ଏହି ମ୍ୟାଚ୍‌ରେ ବିଜୟ ଲାଭ କରେ ତେବେ ଭାରତ ପରବର୍ତ୍ତୀ ଦୁଇଟି ମ୍ୟାଚ୍ ଜିତିଲେ ମଧ୍ୟ ସିରିଜ୍ ବରାବର୍ କରିପାରିବ । କିନ୍ତୁ ସିରିଜ୍‌ ଜିତିପାରିବ ନାହିଁ । ସୂଚନା ଅନୁସାରେ, ଭାରତ ୨୦୨୪ ଟି-୨୦ ବିଶ୍ୱକପ୍ ପରଠାରୁ ଖେଳାଯାଇଥିବା ସମସ୍ତ ପାଞ୍ଚଟି ଟି-୨୦ ସିରିଜ୍ ଜିତିଛି ।