2027 ODI World Cup / ବିଶ୍ଵକପ୍-୨୦୨୭ରେ ଆଫଗାନିସ୍ତାନର ଏଣ୍ଟ୍ରି; ଏପଟେ ୱେଷ୍ଟଇଣ୍ଡିଜର ବଢିଲା ଚିନ୍ତା, କଣ କହୁଛି ସମୀକରଣ

ଆଫଗାନିସ୍ତାନ କ୍ରିକେଟ୍ ଦଳ ଅନ୍ତର୍ଜାତୀୟ କ୍ରିକେଟରେ ଆଉ ଏକ ପ୍ରମୁଖ ମାଇଲଖୁଣ୍ଟ ହାସଲ କରିଛି। ଆଫଗାନିସ୍ତାନ ୨୦୨୭ ଆଇସିସି ଏକଦିବସୀୟ ବିଶ୍ୱକପ୍ ପାଇଁ ସିଧା ଏଣ୍ଟ୍ରି ମାରିଛି । ଲଗାତାର ବର୍ଷା ଯୋଗୁଁ ଆଫଗାନିସ୍ତାନ ଓ ଆୟରଲ୍ୟାଣ୍ଡ ମଧ୍ୟରେ ପ୍ରଥମ ODI ମ୍ୟାଚ୍ ରଦ୍ଦ ହୋଇଥିଲା । ଦ୍ୱିତୀୟ ମ୍ୟାଚ୍‌ରେ ଆଫଗାନିସ୍ତାନ ବିଜୟୀ ହୋଇଥିଲା । ଏହା ସହିତ ଆୟରଲ୍ୟାଣ୍ଡର ସିଧାସଳଖ ବିଶ୍ଵକପ୍ ୨୦୨୭ ପାଇଁ କ୍ଵାଲିଫାଏ ହେବାର ସ୍ଵପ୍ନ ଧୂଳିସାତ ହୋଇଛି ।

ଆୟରଲ୍ୟାଣ୍ଡ ବିପକ୍ଷ ଏହି ୫ ଟିକିଆ ସିରିଜର ଦ୍ଵିତୀୟ ମ୍ୟାଚରେ ଆଫଗାନିସ୍ତାନ ୯୨ ରନରେ ବିଶାଳ ବିଜୟ ହାସଲ କରିଛି । ଏହାସହିତ ଆସନ୍ତା ବର୍ଷ ଖେଳାଯିବାକୁ ଥିବା ଏକଦିବସୀୟ ବିଶ୍ଵକପ୍ ଲାଗି କ୍ଵାଲିଫାଏ କରିନେଇଛି । ଆଫଗାନିସ୍ତାନର ଏଣ୍ଟ୍ରି ୱେଷ୍ଟଇଣ୍ଡିଜ ପାଇଁ ମଧ୍ୟ ଏକ ବଡ଼ ଝଟକା । ଦୁଇ ଥର ଚାମ୍ପିଆନ୍ ଥିବା ୱେଷ୍ଟଇଣ୍ଡିଜ ଲାଗି ମଧ୍ୟ ସିଧାସଳଖ କ୍ଵାଲିଫାଏ କରିବା ଲାଗି ସୁଯୋଗ ନାହିଁ । ଯଦି ୱେଷ୍ଟଇଣ୍ଡିଜକୁ ୨୦୨୭ ବିଶ୍ଵକପର ଅଂଶ ହେବ ତେବେ ଦଳକୁ କ୍ଵାଲିଫାୟର ଖେଳିବାକୁ ପଡ଼ିବ।

• ବର୍ଷା ଧୋଇଦେଲା ଆୟରଲ୍ୟାଣ୍ଡର ସ୍ୱପ୍ନ

ଆଫଗାନିସ୍ତାନ ଓ ଆୟରଲ୍ୟାଣ୍ଡ ଏକଦିବସୀୟ ସିରିଜ ୱେଷ୍ଟଇଣ୍ଡିଜ୍ ପାଇଁ ବେଶ ମହତ୍ତ୍ଵପୂର୍ଣ୍ଣ ଥିଲା । ସମୀକରଣ ଅନୁସାରେ, ଆୟରଲ୍ୟାଣ୍ଡ ଏହି ସିରିଜକୁ ଯଦି ୪-୧ କିମ୍ବା ୫-୦ରେ ଜିତୁଛି ତେବେ ୱେଷ୍ଟଇଣ୍ଡିଜ୍ ବିଶ୍ଵକପ୍‌କୁ କ୍ଵାଲିଫାଏ କରିବାର ସମ୍ଭାବନା ଥିଲା । ମାତ୍ର ପ୍ରଥମ ମ୍ୟାଚରେ ବର୍ଷା ଓ ଦ୍ଵିତୀୟ ମ୍ୟାଚରେ ଆଫଗାନିସ୍ତାନର ବିଜୟ ୱେଷ୍ଟଇଣ୍ଡିଜକୁ ଧକ୍କା ଦେଇଛି ।

• କଣ କହୁଛି ICC ନିୟମ ?

ODI ବିଶ୍ୱକପ୍ ପାଇଁ ସିଧାସଳଖ ଯୋଗ୍ୟତା ପାଇଁ ନିୟମ ସ୍ପଷ୍ଟ । ICC ନିୟମ ଅନୁଯାୟୀ, ଟୁର୍ଣ୍ଣାମେଣ୍ଟର ଆୟୋଜନ କରୁଥିବା ପୂର୍ଣ୍ଣ ସଦସ୍ୟ ଦେଶଗୁଡ଼ିକ ସିଧାସଳଖ ଯୋଗ୍ୟତା ଅର୍ଜନ କରନ୍ତି । ଏହା ଆଧାରରେ, ଦକ୍ଷିଣ ଆଫ୍ରିକା ଏବଂ ଜିମ୍ବାୱେ ୨୦୨୭ ବିଶ୍ୱକପ୍ ପାଇଁ ସେମାନଙ୍କର ସ୍ଥାନ ସୁରକ୍ଷିତ କରିସାରିଛନ୍ତି । ଆୟୋଜକ ଦେଶଗୁଡ଼ିକୁ ବାଦ ଦେଇ, କଟ-ଅଫ୍ ତାରିଖ ଅନୁଯାୟୀ ICC ODI ରାଙ୍କିଙ୍ଗରେ ଶୀର୍ଷ ୮ଟି ଦଳ ସିଧାସଳଖ ଟୁର୍ଣ୍ଣାମେଣ୍ଟ ପାଇଁ ଯୋଗ୍ୟତା ଅର୍ଜନ କରିବେ ।

ପଢନ୍ତୁ ଏହି ଖବର: ଦୁଃଖକଥା ମନେ ପକାଇଲେ ରାହାଣେ...ଟେଷ୍ଟ ଡେବ୍ୟୁ ପାଇଁ କରିଥିଲେ ଲମ୍ବା ଅପେକ୍ଷା

ଆଇସିସି ସିଧାସଳଖ ଯୋଗ୍ୟତା ଅର୍ଜନ ପାଇଁ ସେପ୍ଟେମ୍ବର ୩୦, ୨୦୨୬ ତାରିଖ ଧାର୍ଯ୍ୟ କରିଛି । ବର୍ତ୍ତମାନର ରାଙ୍କିଙ୍ଗ ଆଧାରରେ ଭାରତ, ଅଷ୍ଟ୍ରେଲିଆ, ନ୍ୟୁଜିଲ୍ୟାଣ୍ଡ, ପାକିସ୍ତାନ, ଶ୍ରୀଲଙ୍କା, ଇଂଲଣ୍ଡ ଏବଂ ଆଫଗାନିସ୍ତାନ ନିଶ୍ଚିତ ହୋଇଛି । ଏବେ ୱେଷ୍ଟଇଣ୍ଡିଜ୍ ୭୭ ଅଙ୍କ ସହିତ ଦଶମ ସ୍ଥାନରେ ଅଛି । ଏହା ଉପରେ ବାଂଲାଦେଶ ୮୩ ଅଙ୍କ ସହିତ ନବମ ଓ ଆଫଗାନିସ୍ତାନ ୯୦ ଅଙ୍କ ସହିତ ଅଷ୍ଟମ ସ୍ଥାନରେ ଅଛି ।

• ଆଫଗାନ କ୍ରିକେଟର ବଢୁଥିବା ପ୍ରାଧାନ୍ୟ

ବିଶ୍ଵକପ୍ ୨୦୨୭ ପାଇଁ ସିଧାସଳଖ ଏଣ୍ଟ୍ରି ଆଫଗାନିସ୍ତାନ ଦଳ ପାଇଁ ଗୁରୁତ୍ୱପୂର୍ଣ୍ଣ । କାରଣ ଦଳ ଗତ କିଛି ବର୍ଷ ଧରି ନିଜର ପ୍ରଭାବଶାଳୀ ପ୍ରଦର୍ଶନ ପାଇଁ ବିଶ୍ୱ କ୍ରିକେଟରେ ପରିଚିତି ହାସଲ କରିଛି । ଗତ ସଂସ୍କରଣରେ ଆଫଗାନିସ୍ତାନ ସିଧାସଳଖ ଯୋଗ୍ୟତା ହାସଲ କରିଥିଲା ଏବଂ ଷଷ୍ଠ ସ୍ଥାନରେ ରହିଥିଲା । ଲିଗ୍ ପର୍ଯ୍ୟାୟରେ ଆଫଗାନିସ୍ତାନ ଇଂଲଣ୍ଡ, ପାକିସ୍ତାନ, ଶ୍ରୀଲଙ୍କା ଏବଂ ନେଦରଲ୍ୟାଣ୍ଡ ଭଳି ଦଳକୁ ପରାସ୍ତ କରିଥିଲା ।