Ajinkya Rahane Big Reveal / ଦୁଃଖକଥା ମନେ ପକାଇଲେ ରାହାଣେ...ଟେଷ୍ଟ ଡେବ୍ୟୁ ପାଇଁ କରିଥିଲେ ଲମ୍ବା ଅପେକ୍ଷା

ନିକଟରେ ଭାରତୀୟ କ୍ରିକେଟର ଅନ୍ୟତମ ଚର୍ଚ୍ଚିତ ଚେହେରା ଅଜିଙ୍କ୍ୟ ରାହାଣେ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଥିଲେ । ଅବସର ନେବା ପରେ ସେ ନିଜ ମନର ଦୁଃଖ ସେୟାର କରିଛନ୍ତି । ଦିନେ ତାଙ୍କୁ ଟେଷ୍ଟ ସ୍କ୍ଵାର୍ଡରେ ସ୍ଥାନ ମିଳିବା ପରେ ମଧ୍ୟ ମ୍ୟାଚ୍ ଖେଳିବା ଲାଗି ଦୀର୍ଘ ଦିନ ଧରି ଅପେକ୍ଷା କରିବାକୁ ପଡ଼ିଥିଲା । ପ୍ଲେଇଙ୍ଗ-୧୧ରେ ତାଙ୍କୁ ସ୍ଥାନ ମିଳିନଥିଲା । ୩୮ ବର୍ଷୀୟ ଏହି ଷ୍ଟାର କ୍ରିକେଟର ଟେଷ୍ଟ ଡେବ୍ୟୁ ଲାଗି ପ୍ରାୟ ୨ ବର୍ଷ ଏବଂ ୨୦ଟି ମ୍ୟାଚ୍‌ ଯାଏଁ ଅପେକ୍ଷା କରିବାକୁ ପଡ଼ିଥିଲା । ଏହି ସମୟରେ ସେ ଲଗାତାର ଟିମ ସହିତ ଥିଲେ ଏବଂ ଅଧିକାଂଶ ସମୟ ୧୨ ନମ୍ବର ଖେଳାଳି ଭାବେ ଦାୟିତ୍ଵ ତୁଲାଇଥିଲେ ।

ଅଜିଙ୍କ୍ୟ ରାହାଣେ ସ୍ଵୀକାର କରିଛନ୍ତି ଯେ ଏହି ସମୟ ତାଙ୍କ ପାଇଁ ସହଜ ନଥିଲା । ତଥାପି ସେ ନିଜକୁ ନିରାଶ ଏବଂ ଅସହାୟ ମନେ କରିବା ପରିବର୍ତ୍ତେ ଏହି ସମୟ ମଧ୍ୟରେ ନିଜ ଉପରେ କାମ କରିଥିଲେ । ନିଜ ଖେଳରେ ଅଧିକ ଉନ୍ନତି ଆଣିବା ଉପରେ ଧ୍ୟାନ ଦେଇଥିଲେ । ସେହି ଲମ୍ବା ଅପେକ୍ଷା ତାଙ୍କ ବିଚାରଧାରା ଓ ମାନସିକତାକୁ ଅଧିକ ମଜଭୁତ କରିଥିଲା, ଯାହାର ଫଳ ତାଙ୍କୁ ଟେଷ୍ଟ କ୍ୟାରିଅର ମଧ୍ୟରେ ମିଳିଥିଲା ।

• କେବେ ଡେବ୍ୟୁ କଲେ ରାହାଣେ ?

ଶେଷରେ ଅଜିଙ୍କ୍ୟ ରାହାଣେ ୨୦୧୧ରେ ଭାରତ ଲାଗି ଲିମିଟେଡ୍ ଓଭର୍ସ କ୍ରିକେଟରେ ଅନ୍ତର୍ଜାତୀୟ ଡେବ୍ୟୁ କରିଥିଲେ । ଏହାପରେ ସେ ଟେଷ୍ଟ ଟିମ ସହିତ ରହିଥିଲେ ମାତ୍ର ପ୍ଲେଇଙ୍ଗ-୧୧ ଡୋର୍ ଶୀଘ୍ର ଖୋଲିନଥିଲା । ନିଜ ୟୁଟ୍ୟୁବ ଚ୍ୟାନେଲରେ ସେହି ଦିନଗୁଡ଼ିକୁ ମନେ ପକାଇଛନ୍ତି ରାହାଣେ । ଏନେଇ ସେ କହିଛନ୍ତି, "ମୋ ସାମ୍ନାରେ ଦୁଇଟି ବିକଳ୍ପ ଥିଲା । ଗୋଟିଏରେ ମୁଁ ସହାନୁଭୂତି ହାସଲ କରିବି ନଚେତ୍ ନିଜକୁ ଅଧିକ ଉନ୍ନତ କରିବା ଉପରେ ଧ୍ୟାନ ଦେବି । ୧୨ ନମ୍ବର ଖେଳାଳି ହେବା, ସାଥୀ ଖେଳାଳିଙ୍କୁ ପାଣି ପିଆଇବା କିମ୍ବା ନିଜ ସେମାନଙ୍କୁ ସାହାଯ୍ୟ କରିବା କିଛି ଖରାପ କଥା ନୁହେଁ । ମୁଁ ଏହାକୁ ସକାରାତ୍ମକ ଭାବରେ ନେଇଥିଲି ।"

ପଢନ୍ତୁ ଏହି ଖବର: ଖରାପ ଭାଗ୍ୟ ସାରିଦେଲା କ୍ୟାରିଅର; ଖେଳିଛନ୍ତି ମାତ୍ର ୪ଟି ଅନ୍ତର୍ଜାତୀୟ ମ୍ୟାଚ୍, ସନ୍ୟାସ ନେବାବେଳେ କାନ୍ଦି ପକାଇଲେ

• ୨୦୧୩ରେ କରିଥିଲେ ଟେଷ୍ଟ ଡେବ୍ୟୁ

ଅଜିଙ୍କ୍ୟ ରାହାଣେଙ୍କ ଦୀର୍ଘ ଅପେକ୍ଷା ସେତେବେଳେ ଶେଷ ହୋଇଥିଲା ଯେତେବେଳେ ତାଙ୍କୁ ୨୦୧୩ରେ ଟେଷ୍ଟ କ୍ରିକେଟରେ ଡେବ୍ୟୁ କରିବାକୁ ସୁଯୋଗ ମିଳିଥିଲା । ଏହାପରେ ସେ ଲମ୍ବା ସମୟ ଧରି ଭାରତୀୟ ଟେଷ୍ଟ ଟିମରେ ମଧ୍ୟକ୍ରମ ବ୍ୟାଟ୍ସମ୍ୟାନ୍ ଭାବେ ବ୍ୟାଟିଂ କରିଥିଲେ । ରାହାଣେ ଭାରତ ଲାଗି ୮୫ଟି ଟେଷ୍ଟରେ ୧୪୪ଟି ପାଳିରେ ମୋଟ ୫୦୭୭ ରନ୍ ହାସଲ କରିଛନ୍ତି । ତାଙ୍କ ବ୍ଯାଟ୍‌ରୁ ୧୨ଟି ଶତକ ଓ ୨୬ଟି ଅର୍ଦ୍ଧଶତକ ଆସିଛି ।