Ajinkya Rahane Pension / ଅବସର ପରେ ଏଇଠୁ ହେବ ରାହାଣେଙ୍କ ରୋଜଗାର; BCCI ଦେବ ମାସିକ ପେନସନ୍

ନୂଆଦିଲ୍ଲୀ: ଭାରତର କିମ୍ବଦନ୍ତୀ ବ୍ୟାଟସମ୍ୟାନ ଅଜିଙ୍କ୍ୟ ରାହାଣେ ଟେଷ୍ଟ କ୍ରିକେଟରୁ ଅବସର ଘୋଷଣା କରିଛନ୍ତି। ଭାରତର ସବୁଠାରୁ ନିର୍ଭରଯୋଗ୍ୟ ବ୍ୟାଟସମ୍ୟାନ ରାହାଣେ ଗୁରୁବାର ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରି ତାଙ୍କର ୧୨ ବର୍ଷର ଅନ୍ତର୍ଜାତୀୟ କ୍ୟାରିୟର ଶେଷ କରିଛନ୍ତି । ୩୮ ବର୍ଷୀୟ ଏହି କ୍ରିକେଟର ନିଜ କ୍ୟାରିଅର ମଧ୍ୟରେ ୮୫ଟି ଟେଷ୍ଟ, ୯୦ ଦିନିକିଆ ଏବଂ ୨୦ ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ତେବେ ଆପଣ ଜାଣନ୍ତି କି ଅବସର ପରେ ମଧ୍ୟ ରାହାଣେଙ୍କୁ ପ୍ରାପ୍ୟ ଦେବ ବିସିସିଆଇ ।

୨୦୨୦-୨୧ରେ, ରାହାଣେ ଅନେକ ପ୍ରମୁଖ ଖେଳାଳିଙ୍କ ଅନୁପସ୍ଥିତିରେ ଅଷ୍ଟ୍ରେଲିଆ ବିପକ୍ଷରେ ୨-୧ ଟେଷ୍ଟ ସିରିଜରେ ଐତିହାସିକ ବିଜୟ ହାସଲ କରିଥିଲେ । ରାହାଣେଙ୍କୁ ସର୍ବଦା ଜଣେ ଚମତ୍କାର ବ୍ୟାଟସମ୍ୟାନ ଭାବରେ ମନେ ପକାଯାଏ । ବର୍ତ୍ତମାନ ରାହାଣେ ଅନ୍ତର୍ଜାତୀୟ କ୍ରିକେଟର ସବୁ ଫର୍ମାଟରୁ ଅବସର ନେଇସାରିଥିବାରୁ ଅନେକ ପ୍ରଶଂସକଙ୍କ ମନରେ ଏକ ପ୍ରଶ୍ନ ଉଠୁଛି ଯେ ରାହାଣେ ବିସିସିଆଇରୁ ପେନସନ ପାଇବେ କି ନାହିଁ ।

• କେତେ ପେନସନ୍ ପାଇବେ ରାହାଣେ ?

ରାହାଣେଙ୍କୁ BCCIର ଟପ୍-ବ୍ରାକେଟ୍ ପେନସନ୍ ଯୋଜନାରେ ସାମିଲ କରାଯାଇଛି । BCCIର ଟପ୍-ବ୍ରାକେଟ୍ ପେନସନ୍ ଯୋଜନା ଅବସରପ୍ରାପ୍ତ କ୍ରିକେଟରମାନଙ୍କୁ BCCI ଦ୍ୱାରା ପ୍ରଦାନ କରାଯାଉଥିବା ସର୍ବୋଚ୍ଚ ପେନସନ୍ ବର୍ଗକୁ ବୁଝାଇଥାଏ । ଏକ ରିପୋର୍ଟ ଅନୁଯାୟୀ, ଟପ୍ ପେନସନ୍ ସ୍ଲାବ୍ ପାଇଁ ଯୋଗ୍ୟତା ଅର୍ଜନ କରିଥିବା ପୂର୍ବତନ ଭାରତୀୟ ଖେଳାଳିମାନେ ପ୍ରତି ମାସରେ ₹୭୦,୦୦୦ର ଜୀବନବ୍ୟାପୀ ପେନସନ୍ ପାଆନ୍ତି । ୮୫ଟି ଟେଷ୍ଟ ମ୍ୟାଚ୍ ଖେଳିଥିବା ଅଜିଙ୍କ୍ୟ ରାହାଣେ BCCIର ଏହି ଟପ୍ ବ୍ରାକେଟ୍ ପାଇଁ ଯୋଗ୍ୟ ବିବେଚିତ ହୋଇଛନ୍ତି ।

• ପୂର୍ବରୁ ମିଳୁଥିଲା ୫୦,୦୦୦ ଟଙ୍କା

୨୦୨୨ରେ ବିସିସିଆଇ ଅବସରପ୍ରାପ୍ତ କ୍ରିକେଟରଙ୍କ ପାଇଁ ପେନସନ ରାଶି ସଂଶୋଧନ କରିବାକୁ ନିଷ୍ପତ୍ତି ନେଇଥିଲା । ଭାରତ ପାଇଁ ୮୫ଟି ଟେଷ୍ଟ ମ୍ୟାଚ୍ ଖେଳିଥିବା ରାହାଣେ ସର୍ବୋଚ୍ଚ ବର୍ଗରେ ସାମିଲ ହୋଇଛନ୍ତି । ପୂର୍ବରୁ ଏତିକି ଅଭିଜ୍ଞତା ରଖୁଥିବା ଖେଳାଳିମାନେ ପ୍ରତି ମାସରେ ₹୫୦,୦୦୦ ପାଉଥିଲେ, କିନ୍ତୁ ୪ ବର୍ଷ ପୂର୍ବେ ଏହି ପରିମାଣକୁ ପ୍ରତି ମାସରେ ₹୭୦,୦୦୦ କୁ ବୃଦ୍ଧି କରାଯାଇଥିଲା । ତେଣୁ ରାହାଣେ ଏବେ ପ୍ରତି ମାସରେ ₹୭୦,୦୦୦ ଏକ ସ୍ଥିର ପେନସନ ପାଇବେ । ସୌରଭ ଗାଙ୍ଗୁଲିଙ୍କ ବିସିସିଆଇ ସଭାପତି କାର୍ଯ୍ୟକାଳ ସମୟରେ ପେନସନ ରାଶି ସଂଶୋଧନ କରିବାର ଏହି ନିଷ୍ପତ୍ତି ନିଆଯାଇଥିଲା ।

ପଢନ୍ତୁ ଏହି ଖବର: T20ରେ ଧୂଆଁଦାର ବ୍ୟାଟିଂ ଯଥେଷ୍ଟ ନୁହେଁ...ଏବେ ହେବ ବୈଭବ ସୂର୍ଯ୍ୟବଂଶୀଙ୍କ କ୍ୟାରିଅରର ପ୍ରକୃତ ପରୀକ୍ଷା

• ପେନସନ ପାଇଁ କଣ ନିୟମ ଅଛି ?

ଏଠାରେ କହିରଖୁଛୁ କି, ଜଣେ ଅବସରପ୍ରାପ୍ତ ଖେଳାଳିଙ୍କ ପେନସନ ସେପର୍ଯ୍ୟନ୍ତ ଜାରି ରହିଥାଏ ଯେପର୍ଯ୍ୟନ୍ତ ସେମାନେ BCCI ମଧ୍ୟରେ କୌଣସି ଆନୁଷ୍ଠାନିକ ପଦବୀରେ ରହିନଥାନ୍ତି । ଯଦି ଜଣେ ଖେଳାଳି ବୋର୍ଡର ପ୍ରଶାସକ କିମ୍ବା ପ୍ରଶିକ୍ଷକ ହୁଅନ୍ତି, ତେବେ ସେହି ସେବା ପାଇଁ ଦରମା ପାଇବା ସମୟରେ ସେମାନଙ୍କର ପେନସନ ଅସ୍ଥାୟୀ ଭାବରେ ସ୍ଥଗିତ ରଖାଯାଏ । ଏହା ପରେ ସେମାନେ ଆନୁଷ୍ଠାନିକ ଭାବରେ ସେହି ପଦବୀ କିମ୍ବା ଚାକିରିରୁ ଅବସର ନେବା ପରେ ପେନସନ ଯୋଜନା ପୁଣି ଆରମ୍ଭ ହୁଏ ।