Vaibhav Real Test / T20ରେ ଧୂଆଁଦାର ବ୍ୟାଟିଂ ଯଥେଷ୍ଟ ନୁହେଁ...ଏବେ ହେବ ବୈଭବ ସୂର୍ଯ୍ୟବଂଶୀଙ୍କ କ୍ୟାରିଅରର ପ୍ରକୃତ ପରୀକ୍ଷା

ଆଇପିଏଲରେ ଛକା ବର୍ଷା, ଅନ୍ତର୍ଜାତୀୟ କ୍ରିକେଟରେ ଦମଦାର ପ୍ରଦର୍ଶନ ଆଉ ଏବେ ଜିମ୍ବାୱେ ଗସ୍ତରେ ପ୍ଲେୟାର ଅଫ ଦି ସିରିଜ୍ । ୧୫ବର୍ଷର ବୈଭବ ସୂର୍ଯ୍ୟବଂଶୀଙ୍କ ଲାଗି ଗତ କିଛି ମାସ କୌଣସି ସ୍ଵପ୍ନରୁ କମ ନଥିଲା । ମାତ୍ର ଏବେ ତାଙ୍କ ସାମ୍ନାରେ ଆସିଛି ଅସଲି ପରୀକ୍ଷା । ଅସଲ ଚ୍ୟାଲେଞ୍ଜ । ଯାହା ନିର୍ଣ୍ଣୟ କରିବ ଯେ ବୈଭବ କେବଳ ଟି୨୦ ସୁପରଷ୍ଟାର ହୋଇ ରହିବେ ନା ଭାରତୀୟ କ୍ରିକେଟର ସବୁ ଫର୍ମାଟର ଷ୍ଟାର ପାଲଟିବେ । ଆଗାମୀ ରେଡ୍ ବଲ୍ କ୍ରିକେଟ୍ ମ୍ୟାଚ ଉପରେ ଏବେ ସାରା ଭାରତ ଓ କ୍ରୀଡାପ୍ରେମୀଙ୍କ ନଜର।

ବିସିସିଆଇ ଦଲୀପ ଟ୍ରଫି ଲାଗି ପୂର୍ବ ଜୋନ୍ ଟିମ୍ ଲାଗି ବୈଭବ ସୂର୍ଯ୍ୟବଂଶୀଙ୍କୁ ଉପଅଧିନାୟକ ଦାୟିତ୍ଵ ଦେଇଛି । ପ୍ରଥମେ ଏହା ଏକ ବଡ଼ ଦାୟିତ୍ଵ ବୋଲି ଲାଗିପାରେ, କିନ୍ତୁ ଏହା ପଛରେ ବୋର୍ଡର ଏକ ବଡ଼ ବିଚାରଧାରା ରହିଛି । ଚୟନକର୍ତ୍ତା ସିଧା ସଙ୍କେତ ଦେଇଛନ୍ତି ଯେ ବୈଭବ ସୂର୍ଯ୍ୟବଂଶୀଙ୍କୁ କେବଳ ଭାରତୀୟ କ୍ରିକେଟର ବିସ୍ଫୋରକ ଟି-୨୦ ବ୍ୟାଟର ନୁହେଁ, ବରଂ ଭବିଷ୍ୟତ ଲାଗି ଜଣେ ଦମଦାର ଟେଷ୍ଟ କ୍ରିକେଟର ଭାବେ ଗଢି ତୋଳିବା ଲକ୍ଷ୍ୟ ରହିଛି ।

• IPL ୨୦୨୬ରେ ହାଇଲାଇଟ୍ ହୋଇଥିଲେ ବୈଭବ

ଚଳିତ ବର୍ଷ ଆଇପିଏଲ ସିଜିନରେ ବୈଭବ ବିଶ୍ଵର ଅନେକ ବଡ଼ ବଡ଼ କ୍ରିକେଟରଙ୍କୁ ପଛରେ ପକାଇଥିଲେ । ସେ ୭୦୦ରୁ ଅଧିକ ରନ୍ ମଧ୍ୟ କରିଥିଲେ । ଏହାପରେ ତାଙ୍କୁ ତୁରନ୍ତ ଟିମ ଇଣ୍ଡିଆରେ ସ୍ଥାନ ମିଳିଥିଲା । ଇଂଲଣ୍ଡ ଗସ୍ତ ବେଳେ ବୈଭବଙ୍କ ପ୍ରଦର୍ଶନ ଆଶା ମୁତାବକ ରହିନଥିଲା । ମାତ୍ର ଜିମ୍ବାୱେ ଗସ୍ତରେ ସେ ୩ଟି ଟି-୨୦ ମ୍ୟାଚରେ ୧୫୧ ରନ୍ କରିଥିଲେ, ଯେଉଁଥିରେ ଦୁଇଟି ଅର୍ଦ୍ଧଶତକ ଥିଲା ଏବଂ ସେ ପ୍ଲେୟାର ଅଫ ଦ ସିରିଜ୍ ମଧ୍ୟ ହୋଇଥିଲେ । ଏହି ପ୍ରଦର୍ଶନ ପରେ ସେ ଏକାଥରେ ୨୩୦ ସ୍ଥାନ ଡେଇଁ ICC T20 ରାଙ୍କରେ ୪୮ ନମ୍ବର ସ୍ଥାନରେ ପହଞ୍ଚିପାରିଛନ୍ତି ।

• ଟେଷ୍ଟ କ୍ରିକେଟ୍ ପ୍ରଦର୍ଶନ ଉପରେ ନଜର

ଟି୨୦ କ୍ରିକେଟରେ ତ ବୈଭବ ଷ୍ଟାର ରହିଆସିଛନ୍ତି, କିନ୍ତୁ ପ୍ରଶ୍ନ ଉଠୁଥିଲା ଯେ ବୈଭବ କଣ ଟେଷ୍ଟ କ୍ରିକେଟରେ ଦମଦାର ପ୍ରଦର୍ଶନ କରିପାରିବେ ? ରେଡ୍ ବଲରେ ବି ତାଙ୍କର ଆକ୍ରମଣାତ୍ମକ ବ୍ୟାଟିଂ ଦେଖିବାକୁ ମିଳିବ ? କାରଣ ଟେଷ୍ଟ କ୍ରିକେଟରେ ଧୈର୍ଯ୍ୟ, କୌଶଳ ଓ ଲମ୍ବା ପାଳି ଖେଳିବାର କ୍ଷମତା ରହିବା ଆବଶ୍ୟକ । ନିଜେ କିମ୍ବଦନ୍ତୀ କ୍ରିକେଟର ସଚିନ ତେନ୍ଦୁଲକର ମଧ୍ୟ ଖୋଲାଖୋଲି କହିଛନ୍ତି ଯେ ବୈଭବଙ୍କୁ ଟେଷ୍ଟ କ୍ରିକେଟ୍ ଲାଗି ପ୍ରସ୍ତୁତ କରିବା ଆବଶ୍ୟକ । ବୈଭବ ମଧ୍ୟ ଅନେକ ଥର କହିଛନ୍ତି ଯେ ତାଙ୍କ ପିତା କୁହନ୍ତି ଯେ 'ଟେଷ୍ଟ କ୍ରିକେଟ୍ ହେଉଛି ଅସଲି କ୍ରିକେଟ ।'

ପଢନ୍ତୁ ଏହି ଖବର: ରୋହିତ ଶର୍ମାଙ୍କ ସହ ଓପନିଂ କରନ୍ତୁ ବୈଭବ ସୂର୍ଯ୍ୟବଂଶୀ; କାହିଁକି ଏମିତି କହିଲେ ପୂର୍ବତନ କ୍ରିକେଟର

• ଦଲୀପ ଟ୍ରଫି କେବେ ଆରମ୍ଭ ହେବ ?

ଅଗଷ୍ଟ ୨୩ ତାରିଖ ଠାରୁ ଦଲୀପ ଟ୍ରଫି ଟୁର୍ଣ୍ଣାମେଣ୍ଟ ଆରମ୍ଭ ହେବାକୁ ଯାଉଛି । ବୈଭବ ପ୍ରଥମ ଥର ଲାଗି ଭାରତର ସବୁଠୁ ପ୍ରତିଷ୍ଠିତ ଜୋନାଲ ଫାଷ୍ଟ କ୍ଲାସ୍ ପ୍ରତିଯୋଗିତାର ଅଂଶ ହେବେ । ଆଶା କରାଯାଉଛି ସେ ଅଭିଜ୍ଞ ଅଭିମନ୍ୟୁ ଈଶ୍ଵରନଙ୍କ ସହିତ ଓପନିଂ କରିପାରନ୍ତି । ଏଠାରେ କହିରଖୁଛୁ କି, ରେଡ୍ ବଲ୍ କ୍ରିକେଟ୍ ବୈଭବଙ୍କ ପାଇଁ ସମ୍ପୂର୍ଣ୍ଣ ନୂଆ ନୁହେଁ । ସେ ଏଯାବତ ୮ଟି ଫାଷ୍ଟ କ୍ଲାସ୍ ମ୍ୟାଚ୍ ଖେଳିସାରିଛନ୍ତି, ଯେଉଁଥିରେ ସେ ୧୨ ପାଳିରେ ୨୦୭ ରନ୍ କରିଛନ୍ତି । ତାଙ୍କର ସର୍ବାଧିକ ରନ୍ ୯୩ ରହିଛି, ଆଭରେଜ୍ ୧୭.୫ ରହିଛି।