India Beats Pakistan / ୨ ୱିକେଟରେ ହାରିଲା ପାକିସ୍ତାନ; ଋଷି ଧୱନଙ୍କ ଦମଦାର ବ୍ୟାଟିଂ, ଶେଷ ଓଭର ଯାଏଁ ସସପେନ୍ସ

ଲୁସାକା (ଜାମ୍ଵିଆ): ଏସିଆନ୍ ଲେଜେଣ୍ଡସ୍ ଲିଗ୍ ୨୦୨୬ର ଷଷ୍ଠ ମ୍ୟାଚ୍ ଇଣ୍ଡିଆନ୍ ରୟାଲ୍ସ ଏବଂ ପାକିସ୍ତାନ ପାନ୍ଥର୍ସ ମଧ୍ୟରେ ଖେଳାଯାଇଥିଲା । ଭାରତୀୟ ଦଳ ଚମତ୍କାର ପ୍ରଦର୍ଶନ କରି ପାକିସ୍ତାନ ପାନ୍ଥର୍ସକୁ ୨ ୱିକେଟରେ ପରାସ୍ତ କରିଛି । ଇଣ୍ଡିଆନ୍ ରୟାଲ୍ସ ପାଇଁ ଋଷି ଧୱନ ଏବଂ ସରୁଲ କନୱାର ବ୍ୟାଟିଂ ଷ୍ଟାର ପାଲଟିଯାଇଥିଲେ । ଶେଷ ଓଭର ଯାଏଁ ମ୍ଯାଚ୍ ରୋମାଞ୍ଚକର ହୋଇଥିଲା । ଶେଷରେ ପାକିସ୍ତାନକୁ ପାଣି ପିଆଇ ଭାରତୀୟ ଦଳ ବମ୍ଫର ବିଜୟ ହାସଲ କରି ଫ୍ଯାନ୍ସଙ୍କ ମନ ଖୁସି କରିଛନ୍ତି ।

ଭାରତୀୟ ଦଳର ଶାଦାବ ଜକାତି ଏବଂ ସୁବୋଧ ଭାଟି ଦୁଇଟି ଲେଖାଏଁ ୱିକେଟ ନେଇଥିଲେ । ଏହି ମ୍ୟାଚ୍‌ରେ ଋଷି ଧୱନ ୫୦ ରନର ଏକ ଚମତ୍କାର ଇନିଂସ ଖେଳିଥିଲେ । ସେ ବୋଲିଂ ବେଳେ ମଧ୍ୟ ଗୋଟିଏ ୱିକେଟ ନେଇଥିଲେ । ଏହି ଟୁର୍ଣ୍ଣାମେଣ୍ଟରେ ଏହା ଇଣ୍ଡିଆନ୍ ରୟାଲ୍ସର ଲଗାତାର ଦ୍ୱିତୀୟ ବିଜୟ । ପୂର୍ବରୁ ଭାରତୀୟ ଦଳ ବାଂଲାଦେଶ ଟାଇଗର୍ସକୁ ମଧ୍ୟ ପରାସ୍ତ କରି ବିଜୟ ହାସଲ କରିଥିଲା ।

• ପାକିସ୍ତାନ ପାନ୍ଥର୍ସର ପ୍ରଦର୍ଶନ କିପରି ଥିଲା?

ଇଣ୍ଡିଆନ୍ ରୟାଲ୍ସ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା । ଫଳରେ ପ୍ରଥମେ ବ୍ୟାଟିଂ କରିବାକୁ ଆସିଥିବା ପାକିସ୍ତାନ ପାନ୍ଥର୍ସର ଆରମ୍ଭ ଭଲ ନଥିଲା । ଓପନର ମହମ୍ମଦ ୟାସିର ମାତ୍ର ୬ ରନ କରି ପାଭିଲିୟନ ଫେରିଥିଲେ । ଏହାପରେ ଅଧିନାୟକ ଇମ୍ରାନ ନାଜିର ୨୯ ବଲରେ ସର୍ବାଧିକ ୪୭ ରନର ଇନିଂସ ଖେଳିଥିଲେ । ଏହି ଇନିଂସରେ ସେ ୬ଟି ଚୌକା ଏବଂ ୩ଟି ଛକା ମାରିଥିଲେ । ଇବରାର ଅଟ୍ଟା ଏବଂ ତୌଫିକ୍ ଉମର ୩୯-୩୯ ରନ କରିଥିଲେ । ସେପଟେ ୟାସିର ଶାହ ୧୦ ରନ ସ୍କୋରକାର୍ଡରେ ଯୋଡ଼ିଥିଲେ । ପାକିସ୍ତାନ ପାନ୍ଥର୍ସ ଦଳ ୨୦ ଓଭରରେ ୬ଟି ୱିକେଟ ହରାଇ ୧୬୭ ରନ କରିପାରିଥିଲା ।

• ଗର୍ଜିଲା ଋଷି ଧୱନଙ୍କ ବ୍ୟାଟ୍

ଟାର୍ଗେଟକୁ ପିଛା କରି ଇଣ୍ଡିଆନ୍ ରୟାଲ୍ସ ୧୭.୪ ଓଭରରେ ୮ ୱିକେଟ୍ ହରାଇ ୧୭୧ ରନ୍ କରି ବିଜୟୀ ହୋଇଥିଲା । ଅଧିନାୟକ ନମନ ଓଝା ମଧ୍ୟ ଏହି ମ୍ୟାଚ୍‌ରେ ଭଲ ପ୍ରଦର୍ଶନ କରିପାରି ନଥିଲେ । ସେ ମାତ୍ର ୪ ରନ୍ କରି ପାଭିଲିୟନ୍ ଫେରିଥିଲେ । ଅଭିଷେକ ଜଲୋଟା ୧୯ ବଲ୍‌ରେ ୩୦ ରନ୍ କରିଥିଲେ । ଅଲରାଉଣ୍ଡର ଋଷି ଧୱନ ୩୩ ବଲ୍‌ରେ ୫୦ ରନ୍ କରିଥିଲେ । ଧୱନ ତାଙ୍କ ଇନିଂସରେ ୫ଟି ଚୌକା ଏବଂ ୨ଟି ଛକା ମାରିଥିଲେ।

ପଢନ୍ତୁ ଏହି ଖବର: ଡବଲ୍ ସେଞ୍ଚୁରୀକୁ ୯୧ ବଲ୍‌ରେ ୨୫ ଛକା; ଅଭିଷେକ ଶର୍ମାଙ୍କ ଧୂଆଁଦାର ବ୍ୟାଟିଂରେ କମ୍ପିଲା ମୈଦାନ

ସେହିପରି ସରୁଲ କନୱାର ୨୯ ବଲ୍‌ରେ ୪୬ ରନ୍ ଯୋଗଦାନ ଦେଇଥିଲେ । ତାଙ୍କର ଏହି ଇନିଂସରେ ୩ଟି ଚୌକା ଏବଂ ୪ଟି ଛକା ମାରିଥିଲେ । ଅନୁରିତ ସିଂହ ୬ ବଲ୍‌ରେ ଅପରାଜିତ ୧୬ ରନ୍ କରି ବିଜୟ ସୁନିଶ୍ଚିତ କରିଥିଲେ । ଏହି ଚମତ୍କାର ଇନିଂସ ଯୋଗୁଁ ଇଣ୍ଡିଆନ୍ ରୟାଲ୍ସ ଏକ ରୋମାଞ୍ଚକର ବିଜୟ ହାସଲ କରି ଲଗାତାର ଦୁଇଟି ମ୍ଯାଚ୍ ଜିତିଛି ।