ଢାକା: ଆଇସିସି ପୁରୁଷ ଟି-ଟ୍ଵେଣ୍ଟି ବିଶ୍ଵକପ୍ ୨୦୨୬ ଖେଳିବାକୁ ବାଂଲାଦେଶ ଟିମ୍ ଭାରତ ଆସିବ ନାହିଁ । ବାଂଲାଦେଶର ଖେଳ ପରାମର୍ଶଦାତା ଆସିଫ ନଜଋଲ ରବିବାର ସୋସିଆଲ୍ ମିଡିଆରେ ଏନେଇ ସ୍ପଷ୍ଟ କରିଛନ୍ତି । ନଜଋଲ କହିଛନ୍ତି, "ବାଂଲାଦେଶ କ୍ରିକେଟ୍ ବୋର୍ଡ (BCB) ବୈଠକ ପରେ ଏହି ବଡ଼ ନିଷ୍ପତ୍ତି ନେଇଛି ।"

ତେବେ ଅନ୍ତର୍ଜାତୀୟ କ୍ରିକେଟ୍ କାଉନସିଲ୍ (ICC) ଏହି ପ୍ରସଙ୍ଗରେ କେଉଁ ପ୍ରକାର ଆଭିମୁଖ୍ୟ ଗ୍ରହଣ କରୁଛି ଦେଖିବାର କଥା । କାରଣ ବିଶ୍ଵକପ୍ ଭଳି ଇଭେଣ୍ଟର କାର୍ଯ୍ୟସୂଚୀ ଅନେକ କିଛି ଆଇସିସି ପ୍ରସ୍ତୁତ କରିଥାଏ ।

ଏଥିସହ ପଢ଼ନ୍ତୁ: କେଁ ପୁରାଇଲା ବାଂଲାଦେଶ; ଭାରତ ବଦଳରେ ବିଶ୍ଵକପ୍‌ର ସବୁ ମ୍ୟାଚ୍ ଶ୍ରୀଲଙ୍କାରେ କରିବାକୁ ଦାବି

ଆସିଫ ନଜଋଲ ଫେସବୁକ୍ ଆକାଉଣ୍ଟରେ ଲେଖିଛନ୍ତି, "ବାଂଲାଦେଶ ବିଶ୍ଵକପ୍ ଖେଳିବାକୁ ଭାରତ ଯିବ ନାହିଁ । ବାଂଲାଦେଶ କ୍ରିକେଟ୍ ବୋର୍ଡ ନେଇଥିବା ନିଷ୍ପତ୍ତିକୁ ସ୍ଵାଗତ କରୁଛି । ଏଭଳି ନିଷ୍ପତ୍ତି ଭାରତୀୟ କ୍ରିକେଟ୍ ବୋର୍ଡର ଆକ୍ରମଣାତ୍ମକ ସାମ୍ପ୍ରଦାୟିକ ନୀତିର ଜବାବରେ ନିଆଯାଇଛି ।"

ବାଂଲାଦେଶର ପେସ୍‌ର ମୁସ୍ତାଫିଜୁର ରହମାନଙ୍କୁ ଆଇପିଏଲ୍‌ରୁ ମୁକ୍ତ କରିବା ପରେ ବାଂଲାଦେଶ କ୍ରିକେଟ୍ ବୋର୍ଡର ଏଭଳି ନିଷ୍ପତ୍ତି ନେଇଛି । ମୁସ୍ତାଫିଜୁର ରହମାନଙ୍କୁ ରିଲିଜ୍ କରିବା ଲାଗି କୋଲକାତା ନାଇଟ୍ ରାଇଡର୍ସକୁ ନିର୍ଦ୍ଦେଶ ଦେଇଥିଲା ବିସିସିଆଇ । ଏହା ପରେ ମୁସ୍ତାଫିଜୁର ରହମାନଙ୍କୁ କେକେଆର୍ ମୁକ୍ତ କରିଥିଲା ।

ଗତମାସରେ ହୋଇଥିବା ଆଇପିଏଲ୍ ନିଲାମୀରେ କୋଲକାତା ନାଇଟ୍ ରାଇଡର୍ସ ମୁସ୍ତାଫିଜୁର ରହମାନଙ୍କୁ ୯.୨୦ କୋଟିରେ କିଣିଥିଲା । ଗତ ସପ୍ତାହ ମଧ୍ୟରେ ବାଂଲାଦେଶରେ ୪ ଜଣ ହିନ୍ଦୁଙ୍କ ଆକ୍ରମଣ ପରେ ଆଇପିଏଲ୍‌ରେ ବାଂଲାଦେଶୀ ଖେଳାଳି ଖେଳିବା ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଯାହା ପରେ ବଡ଼ ନିଷ୍ପତ୍ତି ନେଇଥିଲା ବିସିସିଆଇ ।

ଶୁକ୍ରବାର ବାଂଲାଦେଶ କ୍ରିକେଟ୍ ବୋର୍ଡ ତାର ଘରୋଇ ଓ ଅନ୍ତର୍ଜାତୀୟ କାର୍ଯ୍ୟକ୍ରମ ଘୋଷଣା କରିଛି । ଯେଉଁଥିରେ ଭାରତ ବିପକ୍ଷରେ ସୀମିତ ଓଭର୍ ସିରିଜ୍ ରହିଥିଲା । ଏହି ସିରିଜ୍ ୨୦୨୫ରୁ ହିଁ ପ୍ରସ୍ତାବିତ ଥିବାବେଳେ ପରେ ଏହାକୁ ଟାଳି ଦିଆଯାଇଛି ।

ଏଥିସହ ପଢ଼ନ୍ତୁ: ଧମକାଇଲେ ଟ୍ରମ୍ପ; 'ମେକ୍ସିକୋରୁ ନେଇ କଲୋମ୍ବିଆ ପର୍ଯ୍ୟନ୍ତ ଆମେରିକା କିଛି ବି କରିପାରେ...'

ଟି-ଟ୍ଵେଣ୍ଟି ବିଶ୍ଵକପ୍‌ର ଲିଗ୍ ମ୍ୟାଚ୍‌ରେ ବାଂଲାଦେଶ କୋଲକାତା ଓ ମୁମ୍ବାଇରେ ୪ଟି ମ୍ୟାଚ୍ ଖେଳିବା ନିର୍ଦ୍ଧାରିତ ହୋଇଛି । ନିର୍ଦ୍ଧାରିତ ସୂଚୀ ଅନୁସାରେ, ବାଂଲାଦେଶ ୭ ଫେବ୍ରୁଆରୀରେ ୱେଷ୍ଟଇଣ୍ଡିଜ୍ ବିପକ୍ଷରେ, ୯ ଫେବ୍ରୁଆରୀରେ ଇଟାଲି ବିପକ୍ଷରେ ୧୪ରେ ଇଂଲଣ୍ଡ ବିପକ୍ଷରେ ୩ଟି ଯାକ ମ୍ୟାଚ୍ କୋଲକାତାରେ ଖେଳାଯିବ । କିନ୍ତୁ ଏବେର ସ୍ଥିତିକୁ ବଦଳି ଯାଇଛି ।

ଆଇସିସିକୁ ପତ୍ର ଲେଖି ବାଂଲାଦେଶ ଟି-ଟ୍ଵେଣ୍ଟି ବିଶ୍ଵକପ୍‌ରେ ଦଳ ଖେଳିବାକୁ ଥିବା ମ୍ୟାଚ୍ ଶ୍ରୀଲଙ୍କାକୁ ସ୍ଥାନାନ୍ତରଣ ପାଇଁ ଦାବି କରିଛି । ବାଂଲାଦେଶ ସୁରକ୍ଷା କାରଣ ଓ ବର୍ତ୍ତମାନର ଉତ୍ତେଜନାକୁ ଦେଖି ସମସ୍ତ ମୁକାବିଲା ଶ୍ରୀଲଙ୍କାକୁ ସ୍ଥାନାନ୍ତରଣ କରିବାକୁ ଚାହୁଁଛି । ସୂଚନାଯୋଗ୍ୟ, ପାକିସ୍ତାନ ତାର ସମସ୍ତ ମ୍ୟାଚ୍ ପୂର୍ବରୁ ଶ୍ରୀଲଙ୍କାରେ ଖେଳିବାକୁ ନିର୍ଦ୍ଧାରଣ କରାଯାଇଛି ।