BCCI Retirement Policy / ବିଦେଶୀ ଲିଗ୍ ଖେଳିଲେ ୫ବର୍ଷ ବ୍ୟାନ୍ ହେବେ କ୍ରିକେଟର; BCCIର ନୂଆ ମାଷ୍ଟରପ୍ଲାନ୍

ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ନିଜ ଖେଳାଳିଙ୍କ ଲାଗି ନୂଆ ଅବସରକାଳୀନ ନୀତି ଆଣିବାକୁ ଯୋଜନା କରୁଛି । ନିକଟରେ ଆପେକ୍ସ କାଉନସିଲର ଏକ ଗୁରୁତ୍ଵପୂର୍ଣ୍ଣ ବୈଠକରେ ଏହି ଚିନ୍ତାଜନକ ପ୍ରସଙ୍ଗ ଉପରେ ବହୁ ସମୟ ଧରି ଆଲୋଚନା ହୋଇଛି । କିଛି ଭାରତୀୟ କ୍ରିକେଟର ବିଦେଶୀ ଲିଗର ଆକର୍ଷଣୀୟ ପ୍ରସ୍ତାବ ଲାଗି ସମୟ ପୂର୍ବରୁ ଅନ୍ତର୍ଜାତୀୟ କିମ୍ବା ଘରୋଇ କ୍ରିକେଟ ଓ ଆଇପିଏଲରୁ ସନ୍ନ୍ୟାସ ଘୋଷଣା କରୁଛନ୍ତି । ସେହି କ୍ରିକେଟରଙ୍କ ଉଦ୍ଦେଶ୍ୟରେ ଏପରି କଠୋର ନୀତି ଆଣିବାକୁ ଯାଉଛି ବିସିସିଆଇ ।

• ଆପେକ୍ସ କାଉନସିଲ ବୈଠକରେ ନିଷ୍ପତ୍ତି

ବିସିବିଆଇ ନିୟମ ଅନୁସାରେ, ଯେକୌଣସି ଆକ୍ଟିଭ ଭାରତୀୟ କ୍ରିକେଟର, ଯିଏକି ଅନ୍ତର୍ଜାତୀୟ କିମ୍ବା ଘରୋଇ ବା ଆଇପିଏଲ ସହିତ ଜଡ଼ିତ ତାଙ୍କୁ ବିଦେଶୀ ଟି-୨୦ ଫ୍ରାଞ୍ଚାଇଜରେ ଖେଳିବାକୁ ଅନୁମତି ଦିଆଯିବ ନାହିଁ । ଖେଳାଳି ସେତେବେଳେ ବିଦେଶୀ ଲିଗରେ ଅଂଶଗ୍ରହଣ କରିପାରିବେ, ଯେତେବେଳେ ସେମାନେ ଭାରତୀୟ କ୍ରିକେଟର ସମସ୍ତ ଫର୍ମାଟ ଓ ଆଇପିଏଲରୁ ସମ୍ପୂର୍ଣ୍ଣ ଭାବେ ସନ୍ନ୍ୟାସ ନେବାକୁ ପଡ଼ିବ ।

ଅନ୍ତର୍ଜାତୀୟ ଏବଂ IPLରୁ ଅବସର ନେବା ପରେ ବିଦେଶୀ ଲିଗରେ ଖେଳିଥିବା ପ୍ରମୁଖ ଭାରତୀୟ ଖେଳାଳି ହେଉଛନ୍ତି:
ରବିଚନ୍ଦ୍ରନ ଅଶ୍ୱିନ: ସିଡନୀ ଥଣ୍ଡର (ବିଗ୍ ବ୍ୟାସ୍ ଲିଗ୍-ବିବିଏଲ୍) ସହିତ ଚୁକ୍ତି ସ୍ୱାକ୍ଷର କରିଥିବା ପ୍ରଥମ ଭାରତୀୟ ପୁରୁଷ ଖେଳାଳି ।
ଯୁବରାଜ ସିଂହ: ଅବସର ପରେ ସେ ଗ୍ଲୋବାଲ୍ ଟି-୨୦ କାନାଡା ଏବଂ ଟି-୧୦ ଲିଗରେ ଖେଳିଥିବା ଭାରତର ପ୍ରଥମ ଖେଳାଳିମାନଙ୍କ ମଧ୍ୟରୁ ଜଣେ ଥିଲେ ।
ଶିଖର ଧାୱନ: ଅବସର ଘୋଷଣା କରିବା ପରେ ବିଦେଶୀ ଟି-୨୦ ଲିଗରେ (ଯେପରିକି ଲିଜେଣ୍ଡସ୍ ଲିଗ୍ କ୍ରିକେଟ୍ ଏବଂ ବିଦେଶୀ ଟି-୨୦ ଫ୍ରାଞ୍ଚାଇଜ୍) ଅଂଶଗ୍ରହଣ କରିଥିବା ପ୍ରମୁଖ ଖେଳାଳିମାନଙ୍କ ମଧ୍ୟରୁ ଜଣେ।
ଦିନେଶ କାର୍ତ୍ତିକ: ଅବସର ନେବା ପରେ ବିଦେଶୀ ଲିଗ୍ ଖେଳୁଛନ୍ତି ।
ଇରଫାନ ପଠାନ ଓ ୟୁସୁଫ ପଠାନ: ଏହି ଦୁଇ ଭାଇ ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ଲଙ୍କା ପ୍ରିମିୟର ଲିଗ୍ (LPL) ଓ ଆବୁଧାବି ଟି୧୦ ଲିଗ୍ ପରି ବିଦେଶୀ ଲିଗ୍ ଖେଳିଛନ୍ତି।
ମୁନାଫ ପଟେଲ ଓ ପ୍ରବୀଣ ତାମ୍ବେ: ଅବସର ପରେ ସେମାନେ ଲଙ୍କା ପ୍ରିମିୟର ଲିଗ୍ ଏବଂ କାରିବିଆନ ପ୍ରିମିୟର ଲିଗ୍ (ସିପିଏଲ୍) ଭଳି ବିଦେଶୀ ଲିଗ୍ ଖେଳିଛନ୍ତି।
ଉନ୍ମୁକ୍ତ ଚାନ୍ଦ: ସେ ଆମେରିକାର ମେଜର ଲିଗ୍ କ୍ରିକେଟ୍ (MLC) ଏବଂ ଅନ୍ୟାନ୍ୟ ବିଦେଶୀ ଲିଗ୍ ଖେଳିବା ପାଇଁ ଭାରତୀୟ ଘରୋଇ କ୍ରିକେଟ୍ ଏବଂ BCCI ଚୁକ୍ତି ଛାଡି ଦେଇଛନ୍ତି।

• ବିସିସିଆଇର ମାଷ୍ଟର ପ୍ଲାନ୍

ରିପୋର୍ଟ ଅନୁସାରେ, ଆପେକ୍ସ କାଉନସିଲର ବୈଠକରେ ବିଦେଶୀ ଲିଗର ପ୍ରତି ଭାରତୀୟ ଖେଳାଳିଙ୍କ ବଢୁଥିବା ଅଂଶଗ୍ରହଣକୁ ରୋକିବା ଲାଗି ଏକ କୁଲିଂ-ଅଫ୍ ପିରିୟଡ୍ ଆଣିବା ଉପରେ ବିଚାର କରାଯାଉଛି । ଚର୍ଚ୍ଚା ଅନୁସାରେ, ଯଦି କୌଣସି ଭାରତୀୟ ଖେଳାଳି ସନ୍ନ୍ୟାସ ନେବା ପରେ ତୁରନ୍ତ ବିଦେଶୀ ଲିଗରେ ଖେଳୁଛି, ତେବେ ପୁଣି ଥରେ ଭାରତୀୟ କ୍ରିକେଟ ସିଷ୍ଟମକୁ ଫେରିବା ଲାଗି ଅତିକମରେ ୫ ବର୍ଷ ଅପେକ୍ଷା କରିବାକୁ ପଡ଼ିବ । ଅର୍ଥାତ ଉକ୍ତ ଖେଳାଳି ଆସନ୍ତା ୫ ବର୍ଷ ପର୍ଯ୍ୟନ୍ତ ଭାରତୀୟ କ୍ରିକେଟର ଅଂଶ ହୋଇପାରିବ ନାହିଁ । ଏହି ନିୟମ ଆଣିବାର ଉଦ୍ଦେଶ୍ୟ ହେଉଛି ଖେଳାଳିଙ୍କୁ ଏହି ବାର୍ତ୍ତା ଦେବା ଯେ ସେମାନେ ସନ୍ନ୍ୟାସ ଘୋଷଣା କରିବା ସମୟରେ ଭାବିଚିନ୍ତି ନିଷ୍ପତ୍ତି ନିଅନ୍ତୁ ।

ପଢନ୍ତୁ ଏହି ଖବର: କିଏ ମାନବ ସୁଥାର ? କଲେ ଟେଷ୍ଟ ଡେବ୍ୟୁ, ରୋ-କୋଙ୍କୁ ବି ଅସୁବିଧାରେ ପକାଇଛନ୍ତି

ବୋର୍ଡ ଚାହୁଁଛି ଯେ ଦେଶର ପ୍ରମୁଖ ତଥା ଅଭିଜ୍ଞ କ୍ରିକେଟରମାନେ ଅଧିକ ସମୟ ପର୍ଯ୍ୟନ୍ତ ଭାରତୀୟ ଘରୋଇ ଢାଞ୍ଚା ଓ ଆଇପିଏଲର ପ୍ରତିଷ୍ଠା ବଜାୟ ରଖିବା ଲାଗି ନିଜର ଗୁରୁତ୍ଵପୂର୍ଣ୍ଣ ଯୋଗଦାନ କରନ୍ତୁ । ଶେଷରେ ଏହି ନୀତି ଲାଗୁ କରିବା ପୂର୍ବରୁ ଏହାର ଆଇନଗତ ଦିଗଗୁଡ଼ିକୁ ୟାଞ୍ଚ କରିବା ଦାୟିତ୍ଵ ବିସିସିଆଇ ଅଧ୍ୟକ୍ଷ ଓ ସଚିବଙ୍କୁ ପ୍ରଦାନ କରାଯାଇଛି ।