Boxing Gold Medal / ବକ୍ସିଂରେ ପ୍ରୀତିଙ୍କୁ ସ୍ଵର୍ଣ୍ଣ ପଦକ; ଭାବବିହ୍ଵଳ ହେଲେ ମାଆ, ବଖାଣିଲେ ସଂଘର୍ଷର କାହାଣୀ

ଭାରତର ସୁନା ଝିଅ ପ୍ରୀତି ପାୱାର କମନୱେଲଥ ଗେମ୍ସରେ ସ୍ୱର୍ଣ୍ଣ ପଦକ ଜିତିଛନ୍ତି । ସେ ଫାଇନାଲରେ କାନାଡାର ଡେଲଗାଡୋ ସାଭାନାଙ୍କୁ ଅତି ସହଜରେ ପରାସ୍ତ କରି ନିଜ ନାଁରେ ଏହି ସଫଳତା ସାଉଣ୍ଟିଛନ୍ତି । ପ୍ରୀତି ତାଙ୍କ ମୁକାବିଲାର ସମସ୍ତ ତିନୋଟି ରାଉଣ୍ଡରେ ଆଗୁଆ ରହିଥିଲେ ଏବଂ ସମସ୍ତ ୫ଜଣ ବିଚାରକ ତାଙ୍କ ସପକ୍ଷରେ ରାୟ ଦେଇଥିଲେ । ଏହା ପ୍ରଥମ ଥର ହୋଇଛି ଯେତେବେଳେ ୨୨ ବର୍ଷୀୟା ପ୍ରୀତି କମନୱେଲଥ ଗେମ୍ସରେ କୌଣସି ଏକ ପଦକ ଜିତିଛନ୍ତି । ତେବେ ଝିଅ ଦେଶ ପାଇଁ ସ୍ଵର୍ଣ୍ଣ ପଦକ ଜିତିବା ପରେ ସଂଘର୍ଷଣର କାହାଣୀ ବଖାଣିଛନ୍ତି ପ୍ରୀତିଙ୍କ ମାଆ ।

• ସମସ୍ତ ଖେଳାଳିଙ୍କ ଉପରେ ଭାରି ପଡ଼ିଲେ

ପ୍ରୀତି ପାୱାର ତାଙ୍କ ସମସ୍ତ ପ୍ରତିଦ୍ୱନ୍ଦ୍ୱୀଙ୍କ ଉପରେ ଭାରି ପଡ଼ିଥିଲେ ଓ ସେମାନଙ୍କୁ ସହଜରେ ପରାସ୍ତ କରି ସ୍ୱର୍ଣ୍ଣ ପଦକ ଜିତିଛନ୍ତି । ସେ ପ୍ରଥମ ରାଉଣ୍ଡରେ ମଲାୱିର ଜଣେ ଖେଳାଳିଙ୍କୁ ନକ୍ ଆଉଟ୍ କରିଦେଇଥିଲେ । ତା’ପରେ ସେ ସମାନ ଢଙ୍ଗରେ ଉତ୍ତର ଆୟରଲ୍ୟାଣ୍ଡ ଏବଂ ଜାମ୍ବିଆର ଖେଳାଳିଙ୍କୁ ମଧ୍ୟ ପରାସ୍ତ କରି ଫାଇନାଲରେ ପହଞ୍ଚିଥିଲେ।

• ବିଶ୍ଵର ନମ୍ବର-୧ ବକ୍ସର ପରି ଖେଳିଲେ

ପ୍ରୀତି ପ୍ରଥମ ରାଉଣ୍ଡରୁ ହିଁ କାନାଡିଆନ ବକ୍ସରଙ୍କୁ ପଞ୍ଚ୍ ମାରିବାର ସୁଯୋଗ ଦେଇ ନଥିଲେ। ପ୍ରୀତି ବିଶ୍ୱରେ ତୃତୀୟ ସ୍ଥାନରେ ଥିବା ସତ୍ତ୍ଵେ ଜଣେ ବିଶ୍ୱ ଚାମ୍ପିଅନ ପରି ପ୍ରଦର୍ଶନ କରିଛନ୍ତି । ଗତ ବର୍ଷ ସେ ବିଶ୍ୱ ବକ୍ସିଂ କପରେ ସ୍ୱର୍ଣ୍ଣ ପଦକ ଜିତିଥିଲେ । ନୂତନ କମନୱେଲଥ କ୍ରୀଡ଼ାରେ ମୋଟ ୧୪ ଜଣ ଭାରତୀୟ ବକ୍ସର ଅଂଶଗ୍ରହଣ କରିଥିଲେ, ଯେଉଁଥିରୁ ୧୦ ଜଣ ଫାଇନାଲରେ ପ୍ରବେଶ କରିଛନ୍ତି ।

• ମାଆ ବଖାଣିଲେ ପ୍ରୀତିଙ୍କ ସଂଘର୍ଷର କାହାଣୀ

ଏପଟେ ପ୍ରୀତି ସ୍ଵର୍ଣ୍ଣ ପଦକ ଜିତିବା ପରେ ସେପଟେ ହରିୟାଣା ରୋହତକରେ ଖୁସିର ମାହୋଲ ଦେଖିବାକୁ ମିଳିଛି । ତାଙ୍କର ଏହି ଐତିହାସିକ ସଫଳତାରେ ମାଆ ଓ ଭଉଣୀ ଭାବବିହ୍ଵଳ ହୋଇପଡ଼ିଛନ୍ତି ଓ ପରସ୍ପରକୁ ମିଠା ଖୁଆଇଥିବା ନଜର ଆସିଛନ୍ତି । ପ୍ରୀତି ଗୋଲ୍ଡ ମେଡାଲ ଜିତିବା ପରେ ତାଙ୍କର ବର୍ଷ ବର୍ଷର ପରିଶ୍ରମକୁ ମନେ ପକାଇଛନ୍ତି ମାଆ । ତାଙ୍କ ମାଆ କହିଛନ୍ତି ଯେ ପ୍ରଥମରୁ ଝିଅକୁ ବକ୍ସିଂ ଆଦୌ ପସନ୍ଦ ନଥିଲା । କିନ୍ତୁ ତାଙ୍କର ଦାଦା ଜଣେ ବକ୍ସିଂ କୋଚ୍ । ତାଙ୍କ କହିବା ପରେ ପ୍ରୀତି ବକ୍ସିଂ ଶିଖିଥିଲେ । ଏହାପରେ ସେ ଆଉ ପଛକୁ ଚାହିଁନଥିଲେ । ଜଣେ ଚମତ୍କାର ବକ୍ସର ହେବା ଲାଗି ସେ ଦିନରାତି ପରିଶ୍ରମ କରିଥିଲେ । ଯାହାର ଫଳ ଆଜି ତାକୁ ମିଳିଛି ବୋଲି ତାଙ୍କ ମାଆ କହିଛନ୍ତି ।

#WATCH | Rohtak, Haryana: Indian boxer Preeti Pawar clinched gold medal in the Women's 54kg category at Commonwealth Games

Her mother Salin Devi says, "It feels wonderful; I am truly happy. In the beginning, Preeti didn't really like the sport. She got into it because her uncle… pic.twitter.com/YKdU9XPT1Y

— ANI (@ANI) August 1, 2026

ପଢନ୍ତୁ ଏହି ଖବର: କମନୱେଲଥ ଗେମ୍ସରେ ଭାରତର ଡବଲ ଧମାକା... ନୀରଜଙ୍କୁ ରୌପ୍ୟ, ଯଶବୀରଙ୍କୁ ବ୍ରୋଞ୍ଜ

• ଭାରତର ଷଷ୍ଠ ସ୍ୱର୍ଣ୍ଣ ପଦକ

ପ୍ରୀତି ପାୱାର ୨୦୨୬ କମନୱେଲଥ ଗେମ୍ସରେ ଭାରତ ପାଇଁ ପ୍ରଥମ ବକ୍ସିଂ ପଦକ ଜିତିଛନ୍ତି । ଦ୍ଵିତୀୟ ସ୍ଵର୍ଣ୍ଣ ପଦକ ଆଣିଛନ୍ତି ଜାସ୍ମିନ୍ ଲାମ୍ବୋଡିଆ । ଯାହାଦ୍ଵାରା ଭାରତ ପାଖରେ ଏବେ ମୋଟ ୭ଟି ସ୍ୱର୍ଣ୍ଣ ପଦକ ଅଛି । ଭାରତ ଏବେ ୭ଟି ସ୍ୱର୍ଣ୍ଣ, ୧୨ଟି ରୌପ୍ୟ ଏବଂ ୬ଟି କାଂସ୍ୟ ପଦକ ସହିତ ପଦକ ତାଲିକାରେ ଷଷ୍ଠ ସ୍ଥାନରେ ଅଛି। ପ୍ରୀତି ପାୱାର ପ୍ରଥମ ଥର ପାଇଁ ୨୦୨୨ ଏସୀୟ କ୍ରୀଡ଼ାରେ ବ୍ରୋଞ୍ଜ ପଦକ ଜିତି ନିଜର ସ୍ଵତନ୍ତ୍ର ପରିଚୟ ସୃଷ୍ଟି କରିଥିଲେ । ସେ ୨୨ ବର୍ଷରୁ କମ୍ ଏସୀୟ ଚାମ୍ପିଅନସିପ୍ ଏବଂ ବିଶ୍ୱ ବକ୍ସିଂ କପରେ ମଧ୍ୟ ସ୍ୱର୍ଣ୍ଣ ପଦକ ଜିତିଛନ୍ତି ।