ଜୁନ୍‌ ୧୨ରୁ ଆରମ୍ଭ ହୋଇଛି ଆଇସିସି ମହିଳା ଟି-୨୦ ବିଶ୍ବକପ୍‌ । ଏହି ମେଗା ଟୁର୍ଣ୍ଣାମେଣ୍ଟର ଉଦଘାଟନୀ ମ୍ୟାଚ୍‌ରେ ମୁହାଁମୁହିଁ ହୋଇଥିଲେ ଇଂଲଣ୍ଡ ଓ ଶ୍ରୀଲଙ୍କା । ଏହି ମ୍ୟାଚ୍‌ରେ ଆୟୋଜକ ଇଂଲଣ୍ଡ ଦମଦାର ପ୍ରଦର୍ଶନ କରି ଶ୍ରୀଲଙ୍କାକୁ ୮୭ ରନ୍‌ରେ ପରାସ୍ତ କରିଥିଲା ।

ବର୍ମିଂହାମର ଏଜବାଷ୍ଟନରେ ଅନୁଷ୍ଠିତ ଏହି ମ୍ୟାଚରେ ଇଂଲଣ୍ଡର ବିଜୟର ତାରକା ଥିଲେ ଡାନି ୱାଟ୍-ହଜ୍ । ଯିଏ ୬୨ ବଲରୁ ଅପରାଜିତ ୧୦୫ ରନର ବିସ୍ଫୋରକ ଇନିଂସ ଖେଳିଥିଲେ । ଡାନି ୱାଟ୍-ହଜ୍ ମହିଳା ବିଶ୍ୱକପରେ ଶତକ ହାସଲ କରିଥିବା ଦ୍ୱିତୀୟ ଇଂଲଣ୍ଡ ବ୍ୟାଟ୍ସମ୍ୟାନ୍ । ପୂର୍ବରୁ ଇଂଲଣ୍ଡର ହାଇଦର୍‌ ନାଇଟ୍‌ ୨୦୨୦ ସଂସ୍କରଣରେ ଥାଇଲ୍ୟାଣ୍ଡ ବିପକ୍ଷରେ ୧୦୮* ରନ କରିଥିଲେ ।

ଶୁକ୍ରବାର ଖେଳାଯାଇଥିବା ମ୍ୟାଚ୍‌ରେ ଡାନି ୱାଟ୍-ହଜ୍ ମଧ୍ୟ ଓପନିଂ ପାର୍ଟନର ଏମି ଜୋନ୍ସଙ୍କଠାରୁ ଉତ୍କୃଷ୍ଟ ସମର୍ଥନ ପାଇଥିଲା। ଏମି ଜୋନ୍ସ ୩୮ ବଲ୍ ରୁ ୪ଟି ଚୌକା ଏବଂ ଗୋଟିଏ ଛକା ମାରି ୫୩ ରନ୍ କରି ଆଉଟ୍ ହୋଇଥିଲେ । ଦୁଇ ବ୍ୟାଟ୍ସମ୍ୟାନ୍ ପ୍ରଥମ ୱିକେଟ୍ ପାଇଁ ୧୩୫ ରନ୍ କରି ଶ୍ରୀଲଙ୍କା ବୋଲରଙ୍କ ଉପରେ ଚାପ ପକାଇଥିଲେ । ଇଂଲଣ୍ଡ ନିର୍ଦ୍ଧାରିତ ୨୦ ଓଭରରେ ୨୧୯ ରନ୍ କରିଥିଲା ।

ଅଧିକ ପଢ଼ନ୍ତୁ: ଇତିହାସ ରଚିଲେ ରୋହିତ ଶର୍ମା, ଭାଙ୍ଗିଲେ ୩୭ ବର୍ଷ ପୁରୁଣା ରେକର୍ଡ

୨୨୦ ରନ୍ ର ଲକ୍ଷ୍ୟ ପିଛା କରି ଶ୍ରୀଲଙ୍କା ଆରମ୍ଭରୁ ବ୍ୟାକଫୁଟ୍‌ରେ ରହିଥିଲା । ଇଂଲଣ୍ଡର ବୋଲରମାନେ ନିୟମିତ ବ୍ୟବଧାନରେ ୱିକେଟ୍ ନେଇଥିଲେ ଏବଂ ଶ୍ରୀଲଙ୍କାକୁ ମାତ୍ର ୧୩୨ ରନ୍‌ରେ ଅଲଆଉଟ୍‌ କରିଥିଲେ । ଡାନି ୱାଟ୍‌ଙ୍କୁ ତାଙ୍କର ଚମତ୍କାର ଇନିଂସ ପାଇଁ 'ପ୍ଲେୟାର ଅଫ୍ ଦି ମ୍ୟାଚ୍' ପୁରସ୍କାର ମିଳିଥିଲା ।

ଓ୍ବାଟ୍‌ ବିରାଟ କୋହଲିଙ୍କୁ କରିଥିଲେ ପ୍ରପୋଜ୍‌

ତେବେ ୨୦୧୪ ମସିହା ଏପ୍ରିଲରେ ଡାନି ୱାଟ୍ ସୋସିଆଲ ମିଡିଆ ପ୍ଲାଟଫର୍ମ ଟ୍ୱିଟରରେ(ବର୍ତ୍ତମାନ X) ପୋଷ୍ଟ କରି ଲେଖିଥିଲେ, "କୋହଲି, ମୋତେ ବିବାହ କର ।" ତାଙ୍କର ପୋଷ୍ଟ ଶୀଘ୍ର ଭାଇରାଲ୍ ହୋଇଗଲା ଏବଂ କ୍ରିକେଟ୍ ଜଗତରେ ଏକ ପ୍ରମୁଖ ଆଲୋଚନାର ବିଷୟ ପାଲଟିଲା ।

Kholi marry me!!!

— Danielle Wyatt-Hodge (@Danni_Wyatt) April 4, 2014

ବିରାଟ କୋହଲି ଏବଂ ୱାଟ୍ ପରେ ସାକ୍ଷାତ କରିଥିଲେ । କୋହଲି ତାଙ୍କୁ ଟ୍ୱିଟରରେ ଏପରି କଥା ନ କହିବାକୁ କହିଥିଲେ କାରଣ ଲୋକମାନେ ଏହାକୁ ଗମ୍ଭୀରତାର ସହ ନିଅନ୍ତି । ଏହି ଘଟଣା ପରେ ଧୀରେ ଧୀରେ ଉଭୟଙ୍କ ମଧ୍ୟରେ ଏକ ବନ୍ଧୁତ୍ବ ସୃଷ୍ଟି ହୋଇଥିଲା । ସେହି ବର୍ଷ ବିରାଟ କୋହଲି ଡାନି ୱାୟଟ୍‌ଙ୍କୁ ଏକ ବ୍ୟାଟ୍ ମଧ୍ୟ ଉପହାର ଦେଇଥିଲେ ।