Gambhir vs Laxman / ଏହି ଖେଳାଳିଙ୍କ ପାଇଁ ଗମ୍ଭୀର ଓ ଲକ୍ଷ୍ମଣଙ୍କ ମଧ୍ୟରେ କଥା କଟାକଟି; ସେ କିଏ ?

କ୍ରିକେଟ୍ ଜଗତରୁ ଆସିଲା ଏକ ବଡ଼ ଖବର । ବର୍ତ୍ତମାନର ଭାରତୀୟ କ୍ରିକେଟ୍ ଦଳର ପ୍ରଶିକ୍ଷକ ଗୌତମ ଗମ୍ଭୀର ଏବଂ ଏସୀୟ କ୍ରୀଡ଼ାର ପ୍ରଶିକ୍ଷକ ଭିଭିଏସ ଲକ୍ଷ୍ମଣ ଜଣେ ଖେଳାଳିଙ୍କୁ ନେଇ ଯୁକ୍ତିତର୍କ କରିଛନ୍ତି । ସେହି ଖେଳାଳି ଆଉ କେହି ନୁହଁନ୍ତି ବରଂ ଭାରତୀୟ ସ୍ପିନ୍ ଅଲରାଉଣ୍ଡର ୱାଶିଂଟନ୍ ସୁନ୍ଦର । ତେବେ ସୁନ୍ଦରଙ୍କୁ ନେଇ କାହିଁକି ଯୁକ୍ତିତର୍କ କଲେ ଏହି ଦୁଇ କିମ୍ବଦନ୍ତୀ କ୍ରିକେଟର, ତାକୁ ନେଇ ବେଶ ଚର୍ଚ୍ଚା ହେଉଛି ।

• କାହିଁକି ହେଲା ଯୁକ୍ତିତର୍କ ?

ଗୌତମ ଗମ୍ଭୀର ବର୍ତ୍ତମାନ ୱେଷ୍ଟଇଣ୍ଡିଜ୍ ବିପକ୍ଷ ଦିନିକିଆ ସିରିଜ୍ ଉପରେ ଧ୍ୟାନ ଦେଉଛନ୍ତି । ସେପଟେ ଭିଭିଏସ ଲକ୍ଷ୍ମଣଙ୍କୁ ୨୦୨୬ ଏସୀୟ କ୍ରୀଡ଼ା ପାଇଁ ଭାରତୀୟ ଦଳର ପ୍ରଶିକ୍ଷକ ନିଯୁକ୍ତ କରାଯାଇଛି । ଗମ୍ଭୀର ଚାହୁଁଥିଲେ ଯେ ସୁନ୍ଦରଙ୍କୁ ୱେଷ୍ଟଇଣ୍ଡିଜ୍ ବିପକ୍ଷ ଦିନିକିଆ ସିରିଜ୍ ପାଇଁ ଭାରତୀୟ ଦଳରେ ସାମିଲ କରାଯାଉ, କାରଣ ଭ୍ରମଣକାରୀ ଦଳରେ ଅନେକ ବାମହାତୀ ବ୍ୟାଟସମ୍ୟାନ୍ ଅଛନ୍ତି । ସେପଟେ କିନ୍ତୁ ଲକ୍ଷ୍ମଣ ଏସୀୟ କ୍ରୀଡ଼ାର ଗୁରୁତ୍ୱ ଯୋଗୁଁ ସୁନ୍ଦରଙ୍କୁ ଛାଡ଼ିବାକୁ ଚାହୁଁନଥିଲେ । ଶେଷରେ ମ୍ୟାନେଜମେଣ୍ଟ ଟିମ ନୀତିଶ କୁମାର ରେଡ୍ଡୀଙ୍କୁ ଛାଡ଼ିବାକୁ ନିଷ୍ପତ୍ତି ନେଇଛି ।

• ରେଡ୍ଡୀ ODIରେ ଏବଂ ସୁନ୍ଦର ଏସୀୟ କ୍ରୀଡ଼ାରେ ଚମକିବେ

ବର୍ତ୍ତମାନର ପରିସ୍ଥିତି ଏପରି ଯେ ନୀତିଶ କୁମାର ରେଡ୍ଡୀ ୱେଷ୍ଟଇଣ୍ଡିଜ୍ ବିପକ୍ଷ ODI ସିରିଜରେ ଖେଳିବେ । ସେପଟେ ୱାଶିଂଟନ ସୁନ୍ଦର ଏସୀୟ କ୍ରୀଡ଼ାରେ ଭାରତୀୟ ଦଳ ପାଇଁ ପଦକ ଜିତିବାକୁ ଚେଷ୍ଟା କରିବେ । ନୀତିଶ କୁମାର ରେଡ୍ଡୀ ୩ଟି ଫର୍ମାଟରେ ଭାରତୀୟ ଦଳ ପାଇଁ ଖେଳିଛନ୍ତି । ସେ ଡାହାଣ ହାତରେ ବ୍ୟାଟିଂ କରନ୍ତି ଏବଂ ଡାହାଣ ହାତ ମଧ୍ୟମ ଗତିରେ ବୋଲିଂ କରନ୍ତି । ସେପଟେ ସୁନ୍ଦର ୩ଟି ଫର୍ମାଟରେ ବ୍ଲୁ ଦଳର ମଧ୍ୟ ଅଂଶ । ସେ ବାମ ହାତରେ ବ୍ୟାଟିଂ କରନ୍ତି ଏବଂ ଡାହାଣ ହାତ ଅଫ୍-ସ୍ପିନ୍ ବୋଲିଂ କରନ୍ତି । ସେ ଘରୋଇ କ୍ରିକେଟରେ ତାମିଲନାଡୁ ଏବଂ ଇଣ୍ଡିଆନ ପ୍ରିମିୟର ଲିଗରେ ଗୁଜରାଟ ଟାଇଟାନ୍ସର ପ୍ରତିନିଧିତ୍ୱ କରନ୍ତି ।

ୱେଷ୍ଟଇଣ୍ଡିଜ୍ ବିପକ୍ଷରେ ODI ସିରିଜ ପାଇଁ ଭାରତର ୧୫ ଜଣିଆ ଦଳ
ଶୁଭମନ ଗିଲ (ଅଧିନାୟକ), ରୋହିତ ଶର୍ମା, ବିରାଟ କୋହଲି, କେ.ଏଲ୍ ରାହୁଲ (ୱିକେଟ୍ ରକ୍ଷକ), ଋତୁରାଜ ଗାଇକୱାଡ, ଧ୍ରୁବ ଜୁରେଲ (ରିଜର୍ଭ ୱିକେଟ୍ କିପର), ନିତୀଶ କୁମାର ରେଡ୍ଡୀ, ରବୀନ୍ଦ୍ର ଜାଡେଜା, କୁଲଦୀପ ଯାଦବ, ପ୍ରସୀଦ୍ଧ କୃଷ୍ଣ, ଗୁରନୁର ବରାଡ୍, ମହମ୍ମଦ ସିରାଜ, ଆକିବ ନବି ଡାର, ଯଶସ୍ଵୀ ଜୈସୱାଲ ଓ ନମନ ଧୀର ।

ପଢନ୍ତୁ ଏହି ଖବର: ଡେବ୍ୟୁ ମ୍ୟାଚ୍‌ରେ ଚାଲିଲାନି ସେହୱାଗଙ୍କ ପୁଅଙ୍କ ବ୍ୟାଟ୍, ବାପାଙ୍କ ସାମ୍ନାରେ ଫ୍ଲପ୍

ଏସୀୟ କ୍ରୀଡା ୨୦୨୬ ପାଇଁ ଭାରତୀୟ ପୁରୁଷ ଦଳ
ଶ୍ରେୟସ୍ ଆୟର (ଅଧିନାୟକ), ଅଭିଷେକ ଶର୍ମା, ବୈଭବ ସୂର୍ଯ୍ୟବଂଶୀ, ସଞ୍ଜୁ ସାମସନ୍ (ୱିକେଟ୍ କିପର), ଈଶାନ୍ କିଶାନ୍ (ୱିକେଟ୍ କିପର), ତିଲକ ବର୍ମା (ଉପ-ଅଧିନାୟକ), ଶିବମ୍ ଦୁବେ, ଅକ୍ଷର ପଟେଲ, ୱାଶିଂଟନ୍ ସୁନ୍ଦର, ବିପ୍ରଜ ନିଗମ, ରବି ବିଷ୍ଣୋଇ, ଜସପ୍ରୀତ ବୁମରାହ, ଅର୍ଶଦୀପ ସିଂହ ଓ ୟଶ ଠାକୁର ।