Harbhajan On Gambhir / ଗୌତମ ଗମ୍ଭୀରଙ୍କୁ କାହିଁକି ସବୁବେଳେ ଟାର୍ଗେଟ୍ କରାଯାଏ ? ଅସଲ କଥା କହିଲେ ହରଭଜନ

ଲଗାତାର ଭାରତୀୟ କ୍ରିକେଟ୍ ଟିମର ହେଡ୍ କୋଚ୍ ଗୌତମ ଗମ୍ଭୀରଙ୍କୁ ନେଇ ସମାଲୋଚନା କରାଯାଉଛି । ତେବେ ଏହାର ଅସଲ କାରଣ କଣ ତାର ଖୁଲାସା କରିଛନ୍ତି ପୂର୍ବତନ ଭାରତୀୟ ସ୍ପିନର ହରଭଜନ ସିଂହ । ସେ କହିଛନ୍ତି ଯେ ତାଙ୍କ ସାଥୀ ଖେଳାଳିଙ୍କ 'ଅପ୍ରିୟ ସତ କଥା' କହିବାଟା ଅନେକଙ୍କୁ ପସନ୍ଦ ଆସେନାହିଁ । ଭଜି ଦୀର୍ଘ ସମୟ ଧରି ଗମ୍ଭୀରଙ୍କୁ ଜାଣିଛନ୍ତି । ତାଙ୍କର ମନରେ ଯାହା ଥାଏ, ସେ କହିଦିଅନ୍ତି ବୋଲି ହରଭଜନ କହିଛନ୍ତି ।

ଗମ୍ଭୀରଙ୍କ କୋଚିଙ୍ଗରେ ଭାରତ ଟି-୨୦ ବିଶ୍ଵକପ୍, ଚାମ୍ପିଆନ୍ସ ଟ୍ରଫି ଓ ଏସିଆ କପ୍ ଜିତିଛି । ମାତ୍ର ଟେଷ୍ଟ ଟିମ୍‌କୁ ଅଷ୍ଟ୍ରେଲିଆ, ନ୍ଯୁଜିଲାଣ୍ଡ ଓ ଦକ୍ଷିଣ ଆଫ୍ରିକା ବିରୋଧରେ ବଡ଼ ପରାଜୟର ସାମ୍ନା କରିବାକୁ ପଡ଼ିଛି । ଏଥିମଧ୍ୟରେ ଶେଷ ୨ ସିରିଜରେ ଭାରତ ଘରୋଇ ମାଟିରେ କ୍ଲିନ୍ ସ୍ଵିପ୍‌ରେ ଶୋଚନୀୟ ପରାଜୟ ବରଣ କରିଥିଲା । ଏହାପରେ ହେଡ୍ କୋଚ୍ ଗୌତମ ଗମ୍ଭୀରକୁ ସମସ୍ତ ଦିଗରୁ ସମାଲୋଚନାର ଶିକାର ହେବାକୁ ପଡୁଛି । ବିଶେଷ କରି ଟେଷ୍ଟ ଟିମକୁ ନେଇ ଗମ୍ଭୀରଙ୍କୁ କ୍ରୀଡ଼ା ପ୍ରଶଂସକ ଓ ବିଶେଷଜ୍ଞ ଟିମ କଡ଼ା ପ୍ରତିକ୍ରିୟା ଦେଉଛନ୍ତି ।

• କାହିଁକି ଗମ୍ଭୀରଙ୍କୁ ନେଇ ଏତେ ଆଲୋଚନା ?

ଯେତେବେଳେ ଗମ୍ଭୀରଙ୍କୁ କାହିଁକି ଏତେ ଟାର୍ଗେଟ୍ କରାଯାଉଛି ବୋଲି ହରଭଜନଙ୍କୁ ନିକଟ ଏକ ସାକ୍ଷାତକାରରେ ପଚରାଯାଇଥିଲା, ସେତେବେଳେ ସେ କହିଥିଲେ, "ମୁଁ ଜାଣିପାରୁନାହିଁ ଯେ ଯେତେବେଳେ ଟିମ ଖରାପ ପ୍ରଦର୍ଶନ କରୁଛି ସେତେବେଳେ ସର୍ବଦା କୋଚ୍‌କୁ କାହିଁକି ଦୋଷୀ ବୋଲି ଧରାଯାଏ । ମୁଁ ଗୌତମଙ୍କୁ ଯେତିକି ଜାଣିଛି, ସେ ଜଣେ ଭଲ ଖେଳାଳି ଏବଂ ସେ ସର୍ବଦା ନିଜ ଟିମକୁ ପ୍ରାଧାନ୍ୟ ଦେଇଥାନ୍ତି ।"

• ଗମ୍ଭୀରଙ୍କ ବନ୍ଧୁ କିଏ କହିଲେ ହରଭଜନ

ହରଭଜନ ପୁରୁଣା ଦିନକୁ ମନେ ପକାଇ କହିଥିଲେ ଯେ ଯେତେବେଳେ ଗମ୍ଭୀର ଟିମକୁ ଆସିଥିଲେ, ସେତେବେଳେ ସେ ବହୁତ କମ କଥା ହେଉଥିଲେ । ଧୀରେ ଧୀରେ ଡ୍ରେସିଂ ରୁମରେ ସମସ୍ତଙ୍କ ସହ ମିଶିବା ପରେ ସେ ନିଜର ଏକ ଛୋଟ ଫ୍ରେଣ୍ଡ ଗ୍ରୁପ୍ ତିଆରି କରିଥିଲେ । ଯେତେବେଳେ ସେ ଜଣେ ଯୁବ ଖେଳାଳି ଭାବେ ଟିମକୁ ଆସିଥିଲେ, ସେତେବେଳେ ସେ ଖୁବ କମ ଲୋକଙ୍କ ସହ କଥା ହେଉଥିଲେ । ସେତେବେଳେ ତାଙ୍କ ସାଙ୍ଗମାନଙ୍କ ମଧ୍ୟରେ ଥିଲେ ବିରେନ୍ଦ୍ର ସେହୱାଗ୍‍, ଅମିତ ମିଶ୍ରା ଓ ମୁନାଫ ପଟେଲ୍ ।

ପଢନ୍ତୁ ଏହି ଖବର: ବିବାହ ପ୍ରତିଶ୍ରୁତି ଦେଇ ଦୁଷ୍କର୍ମ, ରେକର୍ଡ କଲେ ଅନ୍ତରଙ୍ଗ ମୁହୂର୍ତ୍ତର ଦୃଶ୍ୟ; ଗିରଫ ହେଲେ କ୍ରିକେଟର

• ଗମ୍ଭୀରଙ୍କ ବ୍ୟବହାରକୁ ନେଇ କଣ କହିଲେ ଭଜି ?

ହରଭଜନ ସିଂ ଗମ୍ଭୀରଙ୍କ ବ୍ୟବହାରକୁ ନେଇ କହିଥିଲେ, "ସେ ଜଣେ ବହୁତ ଭଲ ବ୍ୟକ୍ତି । ଜଣେ ସାଧାସିଧା ମଣିଷ । ଅନେକଙ୍କୁ ଗୌତମଙ୍କ କଥା କଟୁ ଲାଗେ । ମାତ୍ର ସେ ଯାହା କୁହନ୍ତି, ତାହା ବାସ୍ତବରେ ଅପ୍ରିୟ ସତକଥା କୁହନ୍ତି । ଅନେକ ଲୋକ ତାହାକୁ ଗ୍ରହଣ କରିପାରନ୍ତି ନାହିଁ । ତାଙ୍କର କଥା କହିବା ଶୈଳୀ ହୁଏତ ଲୋକଙ୍କୁ ହଜମ ହୁଏ ନାହିଁ ।" ସେ ଆହୁରି କହିଥିଲେ ଯେ କେବଳ କିଛି ଧାରଣାକୁ ନେଇ ଗମ୍ଭୀରଙ୍କୁ ଖରାପ ଭାବିବା ଉଚିତ ନୁହେଁ । କ୍ରିକେଟ୍ କିପରି ଖେଳାଯାଏ ତାଙ୍କୁ ବହୁତ ଭଲ ଭାବେ ଜଣା ବୋଲି ଭଜି କହିଛନ୍ତି ।