ନୂଆଦିଲ୍ଲୀ: ଭାରତୀୟ ମହିଳା କ୍ରିକେଟ ଦଳର ଅଧିନାୟକ ପଦକୁ ଅଲବିଦା କହିଲେ ହରମନପ୍ରୀତ କୌର । କ୍ରିକେଟ୍ର ୩ଟି ଫର୍ମାଟର ଅଧିନାୟକ ପଦରୁ ସେ ଇସ୍ତଫା ଦେଇଥିବା ଘୋଷଣା କରିଛନ୍ତି । ୨୦୨୨ ଜୁନରେ ମିତାଲି ରାଜଙ୍କ ଅବସର ପରେ ହରମନପ୍ରୀତ କୌର ସମସ୍ତ ଫର୍ମାଟରେ ଭାରତୀୟ ଦଳର ଅଧିନାୟିକା ହୋଇଥିଲେ । ତାଙ୍କ ଅଧିନାୟକତ୍ୱରେ ଭାରତୀୟ ମହିଳା ଦଳ ପ୍ରଥମ ଥର ପାଇଁ ବିଶ୍ୱ ଚାମ୍ପିଅନ ହୋଇ ୨୦୨୫ ଦିନିକିଆ ବିଶ୍ୱକପ୍ ଜିତିଥିଲା । ଟିମ୍ ଇଣ୍ଡିଆ ଫାଇନାଲରେ ଦକ୍ଷିଣ ଆଫ୍ରିକା ଏବଂ ସେମିଫାଇନାଲରେ ଅଷ୍ଟ୍ରେଲିଆ ଭଳି ଶକ୍ତିଶାଳୀ ଦଳକୁ ପରାସ୍ତ କରିଥିଲା । ହରମନପ୍ରୀତ କୌର ମଧ୍ୟ ଭାରତକୁ ଲଗାତାର ଦୁଇଟି ଏସୀୟ କ୍ରୀଡା ସ୍ୱର୍ଣ୍ଣ ପଦକ ଦେଇଛନ୍ତି ।
- ଇନଷ୍ଟା ପୋଷ୍ଟରେ ଦେଲେ ସୂଚନା
ହରମନପ୍ରୀତ କୌର ଏକ ଇନଷ୍ଟାଗ୍ରାମ ପୋଷ୍ଟ ମାଧ୍ୟମରେ ଅଧିନାୟକ ପଦ ଛାଡିବା ନିଷ୍ପତ୍ତି ଘୋଷଣା କରି ଲେଖିଛନ୍ତି, "ଆଜି ମୁଁ ସମସ୍ତ ଫର୍ମାଟରୁ ଭାରତୀୟ ମହିଳା କ୍ରିକେଟ ଦଳର ଅଧିନାୟକ ପଦ ଛାଡୁଛି । ଏହା ଏକ ସହଜ ନିଷ୍ପତ୍ତି ନୁହେଁ । ମୁଁ ଏହି ଦଳ ଏବଂ ଭାରତୀୟ ମହିଳା କ୍ରିକେଟକୁ ସବୁକିଛି ଦେଇଛି । ମୋର ରକ୍ତ, ମୋର ଝାଳ, ମୋର ସମୟ । ଏପରି କିଛି ମୁହୂର୍ତ୍ତ ଥିଲା ଯେତେବେଳେ ମୋତେ ମୋର ବ୍ୟକ୍ତିଗତ ପ୍ରଦର୍ଶନ, ମୋର ଅଭିବୃଦ୍ଧି ଏବଂ ମୁଁ ନିଜ ପାଇଁ ଯାହା ଚାହୁଁଥିଲି ତାହା ଛାଡ଼ିବାକୁ ପଡିଲା, କାରଣ ମୁଁ ବିଶ୍ୱାସ କରୁଥିଲି ଯେ ଦଳ ପ୍ରଥମେ ସର୍ବୋପରି ।"
- "ଜଣେ ଅଧିନାୟକ ଭାବରେ କଷ୍ଟକର ନିଷ୍ପତ୍ତି ନେବାକୁ ପଡ଼େ"
ହରମନପ୍ରୀତ କୌର ଆଗକୁ ଲେଖିଛନ୍ତି, "ଜଣେ ଅଧିନାୟକ ଭାବରେ ଅନେକ କଷ୍ଟକର ନିଷ୍ପତ୍ତି ନେବାକୁ ପଡିଥିଲା । ଯେଉଁ ନିଷ୍ପତ୍ତିଗୁଡ଼ିକ ସବୁବେଳେ ସହଜ ନଥିଲା । ମୁଁ ନେଇଥିବା ପ୍ରତ୍ୟେକ ନିଷ୍ପତ୍ତି ଗୋଟିଏ ଲକ୍ଷ୍ୟ ଦ୍ୱାରା ପରିଚାଳିତ ହୋଇଥିଲା: ଏହି ଦଳକୁ ଉନ୍ନତ କରିବା ଏବଂ ଅନ୍ୟ ଖେଳାଳିମାନଙ୍କୁ ଆଗକୁ ବଢ଼ିବାରେ ସାହାଯ୍ୟ କରିବା ଏବଂ ସୁଯୋଗ ଦେବା । ମୁଁ ଏହା ସବୁ ଦେଖିଛି । ଖରାପ ସମୟ ସହିତ ମୁଁ ଭଲ ସମୟ ମଧ୍ୟ ଦେଖଛି । ବିଜୟ, ଉତ୍ସବ ଏବଂ ନିଜ ଦେଶକୁ ଉପସ୍ଥାପନ କରିବାର ଗର୍ବ ଏବଂ ସେହି ମୁହୂର୍ତ୍ତି ଯେତେବେଳେ ସବୁ ବଳିଦାନ ସଫଳ ହୁଏ ।"
- "ଶାନ୍ତିର ସହ ଅଧିନାୟକ ପଦ ଛାଡୁଛି"
ପୂର୍ବତନ ଭାରତୀୟ ଅଧିନାୟିକା ଲେଖିଛନ୍ତି, "ଆଜି ମୁଁ ଭାରାକ୍ରାନ୍ତ ହୃଦୟରେ ଅଧିନାୟକ ପଦ ଛାଡି ଦେଉଛି, କିନ୍ତୁ ଶାନ୍ତିର ସହ ମଧ୍ୟ । କାରଣ ମୁଁ ପ୍ରକୃତରେ ବିଶ୍ୱାସ କରେ ଯେ ମୋ ଦଳ ଏକ ଭଲ ସ୍ଥାନରେ ଅଛି । ମୁଁ ଭାବୁଛି ମୁଁ ମୋର କର୍ତ୍ତବ୍ୟ ପାଳନ କରିଛି । ମୁଁ ଏହି ଦଳକୁ ମୋର ସର୍ବସ୍ୱ ଦେଇଛି । ମୁଁ ଗର୍ବର ସହିତ ଦାୟିତ୍ୱ ଗ୍ରହଣ କରିଛି ଏବଂ ଭାରତୀୟ ମହିଳା କ୍ରିକେଟର ନେତୃତ୍ୱ ନେବାର ଏହି ବିଶେଷ ସୁଯୋଗ ପାଇଁ ମୁଁ ସର୍ବଦା କୃତଜ୍ଞ ରହିବି ।"
ହରମନପ୍ରୀତ କହିଛନ୍ତି ଯେ ତାଙ୍କ ପାଇଁ ଆଗକୁ ବଢ଼ିବାର ସମୟ ଆସିଛି । ସେ ଲେଖିଛନ୍ତି, "ଆଜି ଅଧିନାୟକତ୍ୱ ଶେଷ ହୋଇପାରେ, କିନ୍ତୁ ଭାରତୀୟ କ୍ରିକେଟ୍ ପ୍ରତି ମୋର ପ୍ରେମ କେବେ ଶେଷ ହେବ ନାହିଁ। ପ୍ରତ୍ୟେକ ସାଥୀ, ପ୍ରଶିକ୍ଷକ, ସହାୟକ କର୍ମଚାରୀ, ପରିଚାଳନା, ବିସିସିଆଇ, ପରିବାର ସଦସ୍ୟ ଏବଂ ପ୍ରତ୍ୟେକ ପ୍ରଶଂସକଙ୍କୁ ଧନ୍ୟବାଦ ଯେଉଁମାନେ ଦୁଃଖ ସମୟରେ ମୋ ସହିତ ଠିଆ ହୋଇଥିଲେ । ଅଧିନାୟକତ୍ୱ ଶେଷ ହୋଇଛି, କିନ୍ତୁ ଯାତ୍ରା ଜାରି ରହିଛି ।"
ପଢନ୍ତୁ ଏହି ଖବର: ଆଜିଠୁ ଭାରତ ଏବଂ ଓ୍ବେଷ୍ଟଇଣ୍ଡିଜ୍ ଟି-୨୦ ସିରିଜ୍; ପ୍ରଥମ ମ୍ୟାଚ୍ର ଜାଣନ୍ତୁ ପ୍ଲେଇଙ୍ଗ-୧୧
- ହରମନପ୍ରୀତଙ୍କ କ୍ୟାପ୍ଟେନ୍ସି ରେକର୍ଡ
ମହିଳା ଟି୨୦ ଅନ୍ତର୍ଜାତୀୟରେ ହରମନପ୍ରୀତ କୌର ଅଧିନାୟିକା ଭାବେ ୧୫୫ ମ୍ୟାଚ୍ରୁ ୯୨ଟି ମ୍ୟାଚ୍ ଜିତିଛନ୍ତି ଏବଂ ୫୭ ମୁକାବିଲା ହାରିଛନ୍ତି ଏବଂ ଗୋଟିଏ ମ୍ଯାଚ୍ ଟାଇ ଓ ୫ ମ୍ୟାଚ୍ର ଫଳ ବାହାରିନାହିଁ । ତାଙ୍କର ବିଜୟ ପ୍ରତିଶତ ୫୯.୩୫ ଥିବାବେଳେ ହାରିବା ପ୍ରତିଶତ ୩୬.୭୭ ରହିଛି । ସେହିପରି ଦିନିକିଆ କ୍ରିକେଟରେ ସେ ୫୧ ମ୍ୟାଚ୍ରେ ଭାରତ ପାଇଁ କ୍ୟାପ୍ଟେନ୍ସି କରିଛନ୍ତି, ଯେଉଁଥିରେ ୩୦ଟି ମୁକାବିଲା ଜିତିଛନ୍ତି ଓ ୧୯ଟିରେ ହାରିଛନ୍ତି । ଦିନିକିଆରେ ତାଙ୍କ କ୍ୟାପ୍ଟେନ୍ସିରେ ଭାରତର ବିଜୟ ପ୍ରତିଶତ ୫୮.୮୨% ରହିଛି । ଅନ୍ୟପଟେ ଟେଷ୍ଟ କ୍ରିକେଟରେ ସେ ଭାରତ ପାଇଁ ୫ଟି ମ୍ୟାଚ୍ରେ ଅଧିନାୟକ ଦାୟିତ୍ଵ ସମ୍ଭାଳିଛନ୍ତି ଯେଉଁଥିରେ ଭାରତ ୪ଟି ମ୍ୟାଚ୍ ଜିତିଛି । ଟେଷ୍ଟ କ୍ରିକେଟରେ ତାଙ୍କ ଅଧିନାୟକତ୍ଵରେ ଭାରତର ବିଜୟ ପ୍ରତିଶତ ରହିଛି ୮୦% ।
