Videos
|
Sports

KL Rahul Century / କେଏଲ୍ ରାହୁଲଙ୍କ ଐତିହାସିକ ଶତକ; ଯାହା କରିପାରିନଥିଲେ କୌଣସି ଭାରତୀୟ ଓପନର

Debashree Debasmita Sahoo
Browse all articles by Debashree Debasmita Sahoo
·40 mins ago·3 min read
କେଏଲ୍ ରାହୁଲଙ୍କ ଐତିହାସିକ ଶତକ; ଯାହା କରିପାରିନଥିଲେ କୌଣସି ଭାରତୀୟ ଓପନର
KL Rahul Century in SENA countries

Key Points

ନ୍ୟୁଜିଲାଣ୍ଡ ବିପକ୍ଷରେ ୱେଲିଂଟନ୍ ଟେଷ୍ଟ ମ୍ୟାଚ୍‌ର ତୃତୀୟ ଦିନ
କେଏଲ ରାହୁଲଙ୍କ ଦମଦାର ଶତକ ମାରି
ପ୍ରଥମ ଭାରତୀୟ ଓପନର ଭାବେ ରେକର୍ଡ
ୱେଲିଂଟନ (ନ୍ୟୁଜିଲାଣ୍ଡ): ଆଜି ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ବେସିନ୍ ରିଜର୍ଭ ଷ୍ଟାଡିୟମରେ ଖେଳାଯାଉଥିବା ଦୁଇଟି ଟେଷ୍ଟ ସିରିଜର ପ୍ରଥମ ମ୍ୟାଚ୍‌ର ତୃତୀୟ ଦିନ । ଗର୍ଜିଲା ଟିମ୍ ଇଣ୍ଡିଆର ଓପନିଂ ବ୍ୟାଟ୍ସମ୍ୟାନ୍ କେଏଲ ରାହୁଲ ବ୍ୟାଟ୍ । ଚମତ୍କାର ଶତକ ହାସଲ କରିଛନ୍ତି ରାହୁଲ । ଦ୍ୱିତୀୟ ଦିନର ଖେଳ ଶେଷରେ ରାହୁଲ ୫୨ ରନରେ ଅପରାଜିତ ଥିଲେ, ଏହା ପରେ ସେ ତୃତୀୟ ଦିନରେ ମଧ୍ୟ ତାଙ୍କର ଚମତ୍କାର ବ୍ୟାଟିଂ ଜାରି ରଖି ଏକ ଦମଦାର ଶତକ ହାସଲ କରିଛନ୍ତି । ଏହି ଟେଷ୍ଟ ହାସଲ କରି ସେ ସେନା ଦେଶରେ ଏକ ବିରଳ ରେକର୍ଡ ହାସଲ କରିଛନ୍ତି ।

  • SENA ଦେଶର ଟେଷ୍ଟ ଶତକ ହାସଲ କରିଥିବା ପ୍ରଥମ ଭାରତୀୟ ଓପନର୍
ଆଜି ତୃତୀୟ ଦିନର ଦ୍ୱିତୀୟ ସେସନରେ ତାଙ୍କ ଟେଷ୍ଟ କ୍ୟାରିୟରର ୧୩ତମ ଶତକ ପୂରଣ କରିଛନ୍ତି । ଏହି ଶତକ ସହିତ, କେଏଲ ରାହୁଲ ଏକ ଅନନ୍ୟ ସଫଳତା ହାସଲ କରିବାରେ ସଫଳ ହୋଇଛନ୍ତି, ଯାହା ଏପର୍ଯ୍ୟନ୍ତ ଅନ୍ୟ କୌଣସି ଭାରତୀୟ ଓପନିଂ ବ୍ୟାଟ୍ସମ୍ୟାନ୍ ଟେଷ୍ଟ କ୍ରିକେଟରେ ହାସଲ କରିପାରି ନଥିଲେ । ରାହୁଲ ଏବେ ସେନା ଦେଶରେ ଓପନିଂ ବ୍ୟାଟ୍ସମ୍ୟାନ୍ ଭାବରେ ଅତି କମରେ ଗୋଟିଏ ଟେଷ୍ଟ ଶତକ ହାସଲ କରିଥିବା ପ୍ରଥମ ଭାରତୀୟ ଖେଳାଳି ହୋଇଛନ୍ତି ।
  • SENA ଦେଶ ମାନେ କଣ ?
ଏଠାରେ କହିରଖୁଛୁ କି, କ୍ରିକେଟ ଜଗତରେ SENA ଦେଶ କହିଲେ ଏସିଆ ବାହାରେ ଥିବା ଚାରୋଟି ପ୍ରମୁଖ ଟେଷ୍ଟ ଖେଳୁଥିବା ଦେଶ, ଯେପରିକି ଦକ୍ଷିଣ ଆଫ୍ରିକା, ଇଂଲଣ୍ଡ, ନ୍ୟୁଜିଲାଣ୍ଡ ଏବଂ ଅଷ୍ଟ୍ରେଲିଆକୁ ବୁଝାଏ । ଏହି ଚାରିଟି ଦେଶରେ ବ୍ୟାଟିଂ କରିବା ବିଶ୍ୱ କ୍ରିକେଟରେ ଏକ ସହଜ କାମ ନୁହେଁ । ଏସୀୟ ଓପନିଂ ବ୍ୟାଟ୍ସମ୍ୟାନ୍ ଭାବରେ ରାହୁଲ ବର୍ତ୍ତମାନ ପୂର୍ବତନ ପାକିସ୍ତାନୀ ବ୍ୟାଟ୍ସମ୍ୟାନ୍ ସଇଦ ଅନୱରଙ୍କ ପରେ କେବଳ ଦ୍ୱିତୀୟ ଓପନିଂ ବ୍ୟାଟ୍ସମ୍ୟାନ୍ ଯିଏ ଏହି ଚାରିଟି ଦେଶରେ ଶତକ ହାସଲ କରିବାରେ ସଫଳ ହୋଇଛନ୍ତି।

  • ନ୍ୟୁଜିଲାଣ୍ଡରେ ପ୍ରଥମ ଟେଷ୍ଟ ଶତକ ହାସଲ କଲେ ରାହୁଲ
ଏହି ନ୍ୟୁଜିଲାଣ୍ଡ ଗସ୍ତ କେ.ଏଲ. ରାହୁଲଙ୍କ ପାଇଁ ଜଣେ ଓପନିଂ ବ୍ୟାଟ୍ସମ୍ୟାନ୍ ଭାବରେ ବହୁତ ଗୁରୁତ୍ୱପୂର୍ଣ୍ଣ ଥିଲା । ତେବେ ରାହୁଲ ଏକ ଶତକ ହାସଲ କରି ଏହାକୁ ବହୁତ ଚମତ୍କାର ଭାବରେ ଆରମ୍ଭ କରିଛନ୍ତି । ଖବର ଲେଖାଯିବା ଯାଏଁ ୨୬୫ ବଲରେ ୧୨୪ ରନ ସଂଗ୍ରହ କରିବା ସହ ରାହୁଲ ଅପରାଜେୟ ରହିଛନ୍ତି । ପ୍ରଥମ ଇନିଂସରେ ନ୍ୟୁଜିଲାଣ୍ଡ ୩୬୮ ରନ୍ କରିଥିବା ବେଳେ ଭାରତ ଦ୍ୱିତୀୟ ଇନିଂସରେ ଦୃଢ଼ ଜବାବ ଦେଇଛି । ଯଶସ୍ୱୀ ଜୟସ୍ୱାଲ ୮୫ ରନ୍‌ର ଉପଯୋଗୀ ଇନିଂସ ଖେଳି ଆଉଟ୍ ହୋଇଥିବା ବେଳେ ରାହୁଲ ଓ ଦେବଦତ୍ତ ପାଡିକଲ ଭାରତର ଇନିଂସକୁ ଆଗକୁ ବଢ଼ାଇଥିଲେ । ରାହୁଲ ଧୈର୍ଯ୍ୟପୂର୍ଣ୍ଣ ବ୍ୟାଟିଂ ସହ ଆବଶ୍ୟକ ସମୟରେ ଆକ୍ରମଣାତ୍ମକ ସଟ୍ ଖେଳିଛନ୍ତି । ବିଶେଷ କରି ଗ୍ଲେନ୍ ଫିଲିପ୍ସଙ୍କ ବଲ୍‌କୁ ଲଙ୍ଗ୍ ଅନ୍ ଉପରେ ଛକା ମାରି ନିଜ ଆକ୍ରମଣାତ୍ମକ ମନୋଭାବ ଦେଖାଇଥିଲେ । ଅନ୍ୟପଟେ ପାଡିକଲ ମଧ୍ୟ ଅର୍ଦ୍ଧଶତକ ହାସଲ କରି ତାଙ୍କୁ ଉତ୍ତମ ସହଯୋଗ କରିଥିଲେ । ପାଡିକଲ ୮୦ ରନ୍ କରି ଆଉଟ୍ ହୋଇସାରିଥିବାବେଳେ ଏବେ ରାହୁଲଙ୍କ ସହ କ୍ରିଜରେ ଅଛନ୍ତି ଶୁଭମନ ଗିଲ୍ ।

ପଢନ୍ତୁ ଏହି ଖବର: ସିରାଜଙ୍କୁ କାହିଁକି ମିଳିଲାନି ଟିମ୍‌ରେ ସ୍ଥାନ ? ମୁହଁ ଖୋଲିଲେ ଟିମ୍ ଇଣ୍ଡିଆର ବ୍ୟାଟିଂ କୋଚ୍‌, କହିଲେ...

  • ରାହୁଲ ଗାଭାସ୍କରଙ୍କ ସହ ସମାନ
ଭାରତୀୟ ଖେଳାଳି ଭାବେ SENA ଦେଶରେ ସର୍ବାଧିକ ଶତକ, ସଚିନ ତେନ୍ଦୁଲକରଙ୍କ ନାମରେ ରହିଛି, ସେ ମୋଟ ୧୭ଟି ଶତକ ହାସଲ କରିଛନ୍ତି । ବିରାଟ କୋହଲି ୧୨ଟି ଶତକ ସହିତ ଦ୍ୱିତୀୟ ସ୍ଥାନରେ ଅଛନ୍ତି, ଯେତେବେଳେ ରାହୁଲ ଦ୍ରାବିଡ ୧୦ଟି ଶତକ ସହିତ ତୃତୀୟ ସ୍ଥାନରେ ଅଛନ୍ତି । କେଏଲ ରାହୁଲ ଏବେ ଏହି ତାଲିକାରେ ଚତୁର୍ଥ ସ୍ଥାନରେ ସୁନୀଲ ଗାଭାସ୍କରଙ୍କ ସହ ସମାନ । ରାହୁଲ ଏବେ ସମସ୍ତ ଚାରିଟି ସେନା ଦେଶରେ ଶତକ ହାସଲ କରିବାରେ ପଞ୍ଚମ ଭାରତୀୟ ଖେଳାଳି ହୋଇପାରିଛନ୍ତି ।

  • କେଉଁ ଦେଶରେ କେତେ ଶତକ ?
କେ. ଏଲ. ରାହୁଲ ଅଷ୍ଟ୍ରେଲିଆରେ ୧୦ଟି ଟେଷ୍ଟ ମ୍ୟାଚ୍ ଖେଳିଥିବାବେଳେ କେବଳ ଗୋଟିଏ ଶତକ ହାସଲ କରିଛନ୍ତି । ଏବେ ନ୍ୟୁଜିଲ୍ୟାଣ୍ଡରେ ସେ ନିଜର ପ୍ରଥମ ଶତକ ହାସଲ କରିଛନ୍ତି । ଏହାବ୍ୟତୀତ ରାହୁଲ ଇଂଲଣ୍ଡରେ ୪ ଓ ଦକ୍ଷିଣ ଆଫ୍ରିକାରେ ଏଯାବତ୍ ୨ଟି ଶତକ ହାସଲ କରିଛନ୍ତି।
୪ ଶତକ- ଇଂଲଣ୍ଡ
୨ ଶତକ- ଦକ୍ଷିଣ ଆଫ୍ରିକା
୧ ଶତକ- ନ୍ୟଜିଲ୍ୟାଣ୍ଡ
୧ ଶତକ- ଅଷ୍ଟ୍ରେଲିଆ

ଏହାବ୍ୟତୀତ ଭାରତ ପାଇଁ ସର୍ବାଧିକ ଟେଷ୍ଟ ଶତକ ହାସଲ କରିଥିବା ବ୍ୟାଟ୍ସମ୍ୟାନ୍ ତାଲିକାରେ ରାହୁଲ ଏବେ ରୋହିତ ଶର୍ମା, ଅଜିଙ୍କ୍ୟ ରାହାଣେ ଓ ମୁରଲୀ ବିଜୟଙ୍କୁ ପଛରେ ପକାଇଛନ୍ତି । ଏବେ ରାହୁଲଙ୍କ ନାମରେ ସେନା ଦେଶରେ ୮ଟି ଟେଷ୍ଟ ଶତକ ସହ ମୋଟ ୧୩ଟି ଟେଷ୍ଟ ଶତକ ରହିଛି ।


Argus News App

📱 Get Argus News App

✨
📰 60 Word News🎬 Argus Podcast📺 Live TV and Breaking News🔔 Free Notification Alerts
Download Free: