Rishav Pant Fitness / ନ୍ୟୁଜିଲାଣ୍ଡ ସିରିଜ୍ ପୂର୍ବରୁ ପନ୍ତଙ୍କୁ ଫିଟନେସ୍ ଝଟକା; ୨ ଦିନ ପରେ ପୁଣି ଅଗ୍ନିପରୀକ୍ଷା

ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜ୍ ପୂର୍ବରୁ ଟିମ୍ ଇଣ୍ଡିଆକୁ ବଡ଼ ଝଟକା । ଆହତରୁ ଫେରିବାକୁ ଅପେକ୍ଷା କରୁଥିବା ଷ୍ଟାର ୱିକେଟକିପର ବ୍ୟାଟର ଋଷଭ ପନ୍ତଙ୍କ ଫିଟନେସ୍ ନେଇ ବଢ଼ିଲା ଚିନ୍ତା । ବିସିସିଆଇର ସେଣ୍ଟର ଅଫ୍ ଏକ୍ସିଲେନ୍ସରେ ଫିଟନେସ୍ ଟେଷ୍ଟରେ ଫେଲ୍ ହୋଇଛନ୍ତି ପନ୍ତ । ତେବେ ଏହା ତାଙ୍କ ପାଇଁ ଶେଷ ସୁଯୋଗ ନୁହେଁ । ଆଉ ଦୁଇ ଦିନ ପରେ ମିଳିବ ଦ୍ୱିତୀୟ ସୁଯୋଗ । ଫିଟନେସ୍ ଟେଷ୍ଟ ପାସ୍ କଲେ ନ୍ୟୁଜିଲାଣ୍ଡ ଗସ୍ତରେ ତାଙ୍କ ଖେଳିବା ନେଇ ଆଶା ବଢ଼ିବ ।

ଋଷଭ ପନ୍ତ ଟେଷ୍ଟ କ୍ରିକେଟରେ ଭାରତର ଭରସାଯୋଗ୍ୟ ଚେହେରା । ମ୍ୟାଚ୍‌ର ଗତି ବଦଳାଇବାର କ୍ଷମତା ରଖୁଥିବା ଜଣେ ବ୍ୟାଟର । ଏବେ ସେହି ଋଷଭ ପନ୍ତଙ୍କ ଫିଟନେସ୍ ନେଇ ଚିନ୍ତାରେ ଟିମ୍ ଇଣ୍ଡିଆ। ଇରାନୀ କପ୍ ଖେଳୁଥିବା ସମୟରେ ଆହତ ହୋଇଥିଲେ ପନ୍ତ । ଏହାପରେ ତାଙ୍କୁ ଆଉ ପଡ଼ିଆରେ ଦେଖିବାକୁ ମିଳିନାହିଁ । ଆହତ କାରଣରୁ ରଣଜୀ ଟ୍ରଫି ସହ ପନ୍ତ ଇଣ୍ଡିଆ-ଏ ପାଇଁ ମଧ୍ୟ ଖେଳିପାରିନାହାନ୍ତି। ଏପଟେ ନଭେମ୍ବର ୧୯ରୁ ଆରମ୍ଭ ହେବାକୁ ଥିବା ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜ୍ ପାଇଁ ପନ୍ତଙ୍କୁ ଫିଟ୍ ଦେଖିବାକୁ ଚାହୁଁଛି ଟିମ୍ ମ୍ୟାନେଜମେଣ୍ଟ । କିନ୍ତୁ ନଭେମ୍ବର ୨ରେ ହୋଇଥିବା ଫିଟନେସ୍ ଟେଷ୍ଟରେ ପନ୍ତ ଉତ୍ତୀର୍ଣ୍ଣ ହୋଇପାରିନାହାନ୍ତି ।

• ଦ୍ୱିତୀୟ ସୁଯୋଗ ପାଇଁ ଆଶା ଜାରି

ପନ୍ତଙ୍କ ଫିଟନେସ୍ ନେଇ ବିସିସିଆଇ ତରବରିଆ ନିଷ୍ପତ୍ତି ନେବାକୁ ଚାହୁଁନାହିଁ । ତେଣୁ ଦୁଇ ଦିନ ପରେ ପୁଣିଥରେ ହେବ ତାଙ୍କ ଫିଟନେସ୍ ଟେଷ୍ଟ । ଯଦି ଏଥର ପନ୍ତ ପାସ୍ କରନ୍ତି, ତେବେ ତାଙ୍କୁ ନ୍ୟୁଜିଲାଣ୍ଡ ଗସ୍ତରେ ପଠାଯିବା ସହ ଇଣ୍ଡିଆ-ଏ ପକ୍ଷରୁ ଏକ ଔନପଚାରିକ ଟେଷ୍ଟ ମ୍ୟାଚ୍ ଖେଳିବାର ସୁଯୋଗ ମିଳିପାରେ । ଏହାଦ୍ୱାରା ନ୍ୟୁଜିଲାଣ୍ଡର ପରିବେଶ ଓ ପିଚ୍ ସହ ଖାପ ଖୁଆଇବାକୁ ପନ୍ତଙ୍କୁ ମିଳିବ ସୁଯୋଗ । କିନ୍ତୁ ଫିଟନେସ୍ ଟେଷ୍ଟରେ ପୁଣି ବିଫଳ ହେଲେ ତାଙ୍କୁ ଆଉ ଅପେକ୍ଷା କରିବାକୁ ପଡ଼ିପାରେ ।

Rishabh Pant failed a fitness test at the BCCI Centre of Excellence on Sunday, but will get another chance to prove his fitness for the tour of New Zealand in the next two days Full story: https://t.co/PqujTOfCBI https://t.co/G7aqLjw8zO

— Cricinfo (@cricinfo) November 2, 2026

• ପନ୍ତଙ୍କ ଅନୁପସ୍ଥିତି ଭାରତ ପାଇଁ ବଡ଼ କ୍ଷତି?

ବିଦେଶ ମାଟିରେ ଟେଷ୍ଟ କ୍ରିକେଟରେ ଭାରତର ସଫଳତା ପଛରେ ଋଷଭ ପନ୍ତଙ୍କ ଅବଦାନ ରହିଛି । ତାଙ୍କର ଆକ୍ରମଣାତ୍ମକ ବ୍ୟାଟିଂ ଅନେକ ସମୟରେ ବିପକ୍ଷ ଦଳର ରଣନୀତିକୁ ବିଗାଡ଼ି ଦେଇଛି। ନ୍ୟୁଜିଲାଣ୍ଡରେ ଭାରତୀୟ ବ୍ୟାଟରଙ୍କ ରେକର୍ଡ ସେତେଟା ଭଲ ନଥିବାରୁ ପନ୍ତଙ୍କ ଉପସ୍ଥିତି ଦଳ ପାଇଁ ଗୁରୁତ୍ୱପୂର୍ଣ୍ଣ । ଯଦି ପନ୍ତ ଫିଟ୍ ହୋଇ ସିରିଜ୍‌ରେ ଖେଳନ୍ତି, ତେବେ ଭାରତର ବ୍ୟାଟିଂ ଲାଇନ୍‌ଅପ୍‌କୁ ଅଧିକ ଶକ୍ତି ମିଳିବ । ଏବେ ସମସ୍ତଙ୍କ ନଜର ଦୁଇ ଦିନ ପରେ ହେବାକୁ ଥିବା ପନ୍ତଙ୍କ ଦ୍ୱିତୀୟ ଫିଟନେସ୍ ଟେଷ୍ଟ ଉପରେ । ପନ୍ତ ଫିଟ୍ ହେବେ ନା ନ୍ୟୁଜିଲାଣ୍ଡ ସିରିଜ୍‌ରୁ ଦୂରେଇ ରହିବେ, ତାହା ଉପରେ ଏବେ ଟିମ୍ ଇଣ୍ଡିଆର ନଜର ।

ପଢନ୍ତୁ ଏହି ଖବର: ନମନ ଧୀରଙ୍କ ଗୋଟିଏ ଭୁଲ୍ ପାଇଁ ହାରିଲା ଟିମ୍ ଇଣ୍ଡିଆ; ଶେଷ ଟି୨୦ ଜିତିଲା ନ୍ୟୁଜିଲାଣ୍ଡ

• ଭାରତୀୟ ଟେଷ୍ଟ ଦଳ:

ଶୁଭମନ ଗିଲ୍ (ଅଧିନାୟକ), ଯଶସ୍ୱୀ ଜୈସୱାଲ, କେଏଲ୍ ରାହୁଲ (ଉପଅଧିନାୟକ), ଦେବଦତ୍ତ ପଡିକଲ, ଋଷଭ ପନ୍ତ (ୱିକେଟକିପର), ଧ୍ରୁବ ଜୁରେଲ (ୱିକେଟକିପର), ରବୀନ୍ଦ୍ର ଜାଡେଜା, ଅଂଶୁଲ କମ୍ବୋଜ, ଜସପ୍ରୀତ ବୁମ୍‌ରା, ପ୍ରସିଦ୍ଧ କୃଷ୍ଣା, ଆକାଶଦୀପ, ସାଇ ସୁଦର୍ଶନ, ନୀତିଶ କୁମାର ରେଡ୍ଡୀ, ୱାଶିଂଟନ ସୁନ୍ଦର, କୁଲଦୀପ ଯାଦବ ଓ ମହମ୍ମଦ ସିରାଜ ।

• ଟେଷ୍ଟ ସିରିଜ୍

ପ୍ରଥମ ଟେଷ୍ଟ- ନଭେମ୍ବର ୧୯ରୁ ୨୩ ତାରିଖ- ବେସିନ ରିଜର୍ଭ, ୱେଲିଂଟନ (ଭୋର ୩.୩୦ଟା)
ଦ୍ଵିତୀୟ ଟେଷ୍ଟ- ନଭେମ୍ବର ୨୭ରୁ ଡିସେମ୍ବର ୧- ହେଗଲେ ଓଭଲ, କ୍ରାଇଷ୍ଟଚର୍ଚ (ଭୋର ୩.୩୦)