ମହିଳା ଟି-୨୦ ବିଶ୍ବକପ୍‌ରେ ରବିବାର ଖେଳାଯିବ ମହାମୁକାବିଲା । ମୁହାଁମୁହିଁ ହେବେ ଦୁଇ ପାରମ୍ପାରିକ ପ୍ରତୀଦ୍ବନ୍ଦୀ ଭାରତ-ପାକିସ୍ତାନ । ହରମନପ୍ରୀତ କୌରଙ୍କ ନେତୃତ୍ବାଧୀନ ଭାରତୀୟ ଦଳ ଏହି ମ୍ୟାଚ୍‌ରେ ବିଜୟଲାଭ କରି ବିଶ୍ବକପ୍‌ ଅଭିଯାନ ଆରମ୍ଭ କରିବାକୁ ଚେଷ୍ଟା କରିବ । ନିକଟରେ କିଛି ଟୁର୍ଣ୍ଣାମେଣ୍ଟରେ ଯେତେବେଳେ ଭାରତ ଏବଂ ପାକିସ୍ତାନ ଦଳ ପରସ୍ପରର ମୁହାଁମୁହିଁ ହୋଇଛନ୍ତି, ସେତେବେଳେ ହ୍ୟାଣ୍ଡସେକ୍‌କୁ ନେଇ ବିବାଦ ଦେଖିବାକୁ ମିଳିଥିଲା । ଭାରତୀୟ ପୁରୁଷ ଏବଂ ମହିଳା ଦଳ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇବାକୁ ମନା କରିଥିଲେ । ଆଉ ଏବେ ସମସ୍ତଙ୍କ ମନରେ ପ୍ରଶ୍ନ, ରବିବାର ହେବାକୁ ଥିବା ହାଇଭୋଲଟେଜ୍ ମହିଳା ଟି-୨୦ ବିଶ୍ୱକପରେ ଭାରତୀୟ ଖେଳାଳି ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇବେ କି ? ଏହି ପ୍ରଶ୍ନକୁ ନେଇ ବଡ଼ ବୟାନ ଦେଇଛନ୍ତି ଭାରତୀୟ ଅଧିନାୟକ ହରମନପ୍ରୀତ କୌର ।

ମହିଳା ଟି-୨୦ ବିଶ୍ୱକପରେ ଭାରତ-ପାକିସ୍ତାନ ମ୍ୟାଚ୍ ପୂର୍ବରୁ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା । ଭାରତୀୟ ଅଧିନାୟକ ହରମନପ୍ରୀତ କୌରଙ୍କୁ ହ୍ୟାଣ୍ଡସେକ୍‌କୁ ନେଇ ଏକ ପ୍ରଶ୍ନ ପଚରା ଯାଇଥିଲା । ଏହାର ଉତ୍ତରରେ ସେ ସ୍ପଷ୍ଟ ଭାବେ କହିଛନ୍ତି, ସେ କେବଳ କ୍ରିକେଟ୍ ବିଷୟରେ କଥା ହେବାକୁ ଚାହାଁନ୍ତି ଏବଂ ଅନ୍ୟ କୌଣସି ବିଷୟକୁ ନେଇ ଚିନ୍ତିତ ନୁହଁନ୍ତି ।

ଅଧିକ ପଢ଼ନ୍ତୁ: ଆଜି ମହାମୁକାବିଲା, T-20 ବିଶ୍ୱକପ୍‌ରେ ଭାରତ-ପାକିସ୍ତାନ ଟକ୍କର

ହରମନପ୍ରୀତ କୌର କହିଛନ୍ତି, "ଆମେ ଏଠାରେ କ୍ରିକେଟ ଖେଳିବାକୁ ଆସିଛୁ ଏବଂ ଆମେ କେବଳ କ୍ରିକେଟ ବିଷୟରେ କଥା ହେବୁ । ଆମେ ଅନ୍ୟ କିଛି ବିଷୟରେ କଥା ହେବାକୁ ଚାହୁଁନାହୁଁ । ମୁଁ କ୍ରିକେଟ ବ୍ୟତୀତ ଅନ୍ୟ କିଛି ଜାଣିବାକୁ ଚାହୁଁନାହିଁ । ଆମେ ପାକିସ୍ତାନ ବିପକ୍ଷ ମ୍ୟାଚ୍‌କୁ ଏକ ସାଧାରଣ ମ୍ୟାଚ୍‌ ଭଳି ଦେଖୁଛୁ'' ।

ଅଧିନାୟକ ହରମନପ୍ରୀତ କୌର ମଧ୍ୟ ଭାରତ-ପାକିସ୍ତାନ ମ୍ୟାଚ୍‌ର ଚାପକୁ ସ୍ୱୀକାର କରିଛନ୍ତି। ହରମନପ୍ରୀତ କହିଛନ୍ତି ଯେ ଯେତେବେଳେ ଭାରତ-ପାକିସ୍ତାନ ମ୍ୟାଚ୍‌ ହୁଏ, ସବୁବେଳେ ଚାପ ଥାଏ। ଅଧିନାୟକ କହିଛନ୍ତି ଯେ ଟିମ୍ ଇଣ୍ଡିଆ ଏହି ମ୍ୟାଚ୍‌କୁ ଅନ୍ୟ ମ୍ୟାଚ୍‌ ପରି ଖେଳିବ ଏବଂ ସେମାନଙ୍କର ୧୦୦ ପ୍ରତିଶତ ଦେବାକୁ ଚେଷ୍ଟା କରିବ ।

ଭାରତୀୟ ମହିଳା କ୍ରିକେଟ୍ ଦଳ ୨୦୨୫ ODI ବିଶ୍ୱକପ୍‌ ଜିତିବା ପରେ ଏବେ ଭାରତକୁ T20 ବିଶ୍ୱକପ୍‌ରେ ଘରକୁ ଫେରାଇ ଆଣିବାକୁ ଲକ୍ଷ୍ୟ ରଖିଛି ।