ଆଫଗାନିସ୍ତାନ ବିପକ୍ଷରେ ଆଗାମୀ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍‌ ପୂର୍ବରୁ ଟିମ୍ ଇଣ୍ଡିଆକୁ ଲାଗିଛି ବଡ଼ ଝଟକା । ପୂର୍ବତନ ଅଧିନାୟକ ତଥା ଷ୍ଟାର ବ୍ୟାଟ୍ସମ୍ୟାନ୍‌ ଆଘାତ କାରଣରୁ ସମ୍ପୂର୍ଣ୍ଣ ସିରିଜ୍‌ରୁ ବାଦ୍ ପଡ଼ିଛନ୍ତି । ଏନେଇ ବିସିସିଆଇ ପକ୍ଷରୁ ସାମ୍ବାଦିକ ସମ୍ମିଳନୀରେ କୁହାଯାଇଛି ।

ବିରାଟ କୋହଲିଙ୍କ ସ୍ଥାନରେ ଆଫଗାନିସ୍ତାନ ବିପକ୍ଷ ଦିନିକିଆ ସିରିଜ୍‌ରେ ଯଶସ୍ବୀ ଜୟସ୍ବାଲଙ୍କୁ ଦଳରେ ସାମିଲ କରାଯାଇଛି । BCCI ମୁଖ୍ୟ ଚୟନକର୍ତ୍ତା ଅଜିତ ଅଗରକର ଶନିବାର ଆନୁଷ୍ଠାନିକ ଭାବରେ ଏହା ସ୍ପଷ୍ଟ କରିଛନ୍ତି । IPL ୨୦୨୬ ଫାଇନାଲ୍ ସମୟରେ ବିରାଟ କୋହଲିଙ୍କ ହାମଷ୍ଟ୍ରିଙ୍ଗ୍ ଆଘାତ ହୋଇଥିଲା । ତାଙ୍କୁ ଆଫଗାନିସ୍ତାନ ବିପକ୍ଷରେ ହେବାକୁ ଥିବା ଦିନିକିଆ ସିରିଜ୍‌ରେ ଦଳରେ ସାମିଲ କରାଯାଇଥିଲା । କିନ୍ତୁ ଡାକ୍ତରୀ ଦଳର ରିପୋର୍ଟ ପରେ ତାଙ୍କୁ ସିରିଜ୍‌ରୁ ବାଦ୍‌ ଦେବା ପାଇଁ ନିଷ୍ପତ୍ତି ନିଆଯାଇଛି ।

ତେବେ କେବେ ସୁଦ୍ଧା ବିରାଟ କୋହଲି ସୁସ୍ଥ ହେବେ ସେନେଇ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । କିନ୍ତୁ ଆଶା କରାଯାଉଛି ଯେ ଇଂଲଣ୍ଡ ବିପକ୍ଷରେ ଆଗାମୀ ଦିନିକିଆ ସିରିଜ୍‌ ପୂର୍ବରୁ ସେ ଫିଟ୍‌ ହେବେ ବୋଲି କହିଛନ୍ତି ମୁଖ୍ୟ ଚୟନକର୍ତ୍ତା ଅଜିତ ଅଗରକର ।

ଅଧିକ ପଢ଼ନ୍ତୁ: ବୈଭବଙ୍କ ଟିମ୍ ଇଣ୍ଡିଆ ଏଣ୍ଟ୍ରି ପଛରେ ଦୁଇ ଓଡ଼ିଆ ପୁଅ, ପ୍ରଜ୍ଞାନ ଓ ଶିବ ସୁନ୍ଦରଙ୍କ ବଡ଼ ଭୂମିକା

ଅଜିତ ଅଗରକର କହିଛନ୍ତି, "ବିରାଟଙ୍କ ଆଘାତ ହେବାର ଏକ ସପ୍ତାହ ବିତିନାହିଁ । ଆମେ ଏପର୍ଯ୍ୟନ୍ତ ଫିଜିଓଙ୍କଠାରୁ ସ୍ପଷ୍ଟ ସୁସ୍ଥତା ସମୟସୀମା ପାଇନାହୁଁ । ସେ ଇଂଲଣ୍ଡ ଦିନିକିଆ ସିରିଜ୍ ପାଇଁ ଫିଟ୍ ହୋଇପାରିବେ, କିନ୍ତୁ ବର୍ତ୍ତମାନ ନିଶ୍ଚିତ ଭାବରେ କିଛି କହିହେବ ନାହିଁ ।"

ବିରାଟ କୋହଲିଙ୍କ ଅନୁପସ୍ଥିତି ଭାରତୀୟ ବ୍ୟାଟିଂ କ୍ରମକୁ ଏକ ବଡ଼ ଧକ୍କା ଦେଇଛି । ଏହି ଅଭିଜ୍ଞ ବ୍ୟାଟସମ୍ୟାନ୍ କିଛି ସମୟ ଧରି ଉତ୍କୃଷ୍ଟ ଫର୍ମରେ ଥିଲେ । ଚଳିତ ବର୍ଷ ଜାନୁଆରୀରେ ନ୍ୟୁଜିଲାଣ୍ଡ ବିପକ୍ଷରେ ତାଙ୍କର ଶେଷ ଦିନିକିଆ ସିରିଜ୍‌, ସେ ତିନୋଟି ମ୍ୟାଚରେ ୨୪୦ ରନ୍‌ କରିଥିଲେ । ଏହି ସମୟ ମଧ୍ୟରେ ତାଙ୍କର ହାର ୮୦.୦୦ ଥିଲା ଏବଂ ତାଙ୍କର ଷ୍ଟ୍ରାଇକ୍ ରେଟ୍ ୧୦୫.୨୬ ଥିଲା ।

BCCI Press Conference | On India's squad for the three-match ODI series against Afghanistan, Indian Men's cricket team chief selector Ajit Agarkar says, "Yashasvi (Jaiswal) will be Virat Kohli's replacement." pic.twitter.com/enfBUkVaIj

— ANI (@ANI) June 6, 2026

ସୂଚନା ଅନୁସାରେ, ବିରାଟ କୋହଲି ଏବେ କେବଳ ଦିନିକିଆ କ୍ରିକେଟରେ ଭାରତକୁ ପ୍ରତିନିଧିତ୍ୱ କରୁଛନ୍ତି । ସେ ପୂର୍ବରୁ ଟେଷ୍ଟ ଏବଂ ଟି-୨୦ ଅନ୍ତର୍ଜାତୀୟ କ୍ରିକେଟ୍‌ରୁ ଅବସର ନେଇସାରିଛନ୍ତି । ତାଙ୍କର ଅନୁପସ୍ଥିତି ଭାରତୀୟ ଦଳ ପାଇଁ ଆହୁରି ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ । ଏହି ସମୟରେ, ଯଶସ୍ୱୀ ଜୟସ୍ବାଲଙ୍କ ପାଇଁ ନିଜକୁ ପ୍ରମାଣିତ କରିବାର ଏହା ଏକ ପ୍ରମୁଖ ସୁଯୋଗ ହେବ । ଯଶସ୍ୱୀ ଏପର୍ଯ୍ୟନ୍ତ ଭାରତ ପାଇଁ ଚାରୋଟି ଦିନିକିଆ ଖେଳି ୧୭୧ ରନ କରିଛନ୍ତି । ଯଶସ୍ୱୀ ଗତ ବର୍ଷ ଆହତ ବିରାଟ କୋହଲିଙ୍କ ସ୍ଥାନରେ ଇଂଲଣ୍ଡ ବିପକ୍ଷରେ ତାଙ୍କର ଦିନିକିଆ ଡେବ୍ୟୁ କରିଥିଲେ । ଏବେ, ତାଙ୍କୁ ପୁଣି ଥରେ କୋହଲିଙ୍କ ବିକଳ୍ପ ଭାବରେ ବିବେଚନା କରାଯାଉଛି ।

ଭାରତ ଏବଂ ଆଫଗାନିସ୍ତାନ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍‌ ଜୁନ୍‌ ୧୩ରୁ ଆରମ୍ଭ ହେଉଛି । ସମସ୍ତଙ୍କ ନଜର ଏବେ ଯଶସ୍ୱୀ ଜୟସ୍ବାଲଙ୍କ ଉପରେ ରହିବ ଯେ ସେ ଏହି ବଡ଼ ସୁଯୋଗର ଫାଇଦା ଉଠାଇ ପାରିବେ କି ନାହିଁ ?