Asian Games 2026 / 'ଟ୍ରଫି ଚୋର' ଟ୍ୟାଗ୍ ନା ଭାରତର ଭୟ ? ଏସୀୟ କ୍ରୀଡ଼ା ଫାଇନାଲରୁ ନିଜକୁ ଦୂରେଇଲେ ନକଭି

ଟୋକିଓ: ସାରା କ୍ରିକେଟ୍ ଜଗତର ନଜର ଆଜି ଶନିବାର ଆରମ୍ଭ ହୋଇସାରିଥିବା ଭାରତ ଏବଂ ପାକିସ୍ତାନ ଫାଇନାଲ୍ ମ୍ୟାଚ୍ ଉପରେ ରହିଛି । ଦର୍ଶକଙ୍କ ମନରେ ରହିଥଇଲା "ଟ୍ରଫି ଚୋର" ଭାବରେ ଜଣାଶୁଣା ପାକିସ୍ତାନ କ୍ରିକେଟ୍ ବୋର୍ଡ ସଭାପତି ମୋହସିନ୍ ନକଭି ପୁଣି ଥରେ ପୁରସ୍କାର ସମାରୋହର ଉତ୍ସାହକୁ ନଷ୍ଟ କରିବେ କି ? ଏହାର ଉତ୍ତର ମିଳିସାରିଛି । ଏସୀୟ କ୍ରିକେଟ୍ ପରିଷଦ (ଏସିସି) ସଭାପତି ମୋହସିନ୍ ନକଭି ଏସୀୟ କ୍ରୀଡ଼ା ପାଇଁ ଜାପାନ ଯାତ୍ରା କରିନାହାନ୍ତି । ଫଳରେ ଆଜି ଭାରତ ଓ ପାକିସ୍ତାନ ଫାଇନାଲ୍ ଫାଇଟ୍‌ରେ କୌଣସି "ଟ୍ରଫି ଚୋର" ବିବାଦ ଉପୁଜିବ ନାହିଁ ।

• ମ୍ୟାଚ୍‌କୁ ନେଇ ଏମିତି କହିଲେ ନକଭି

ACC ଶୁକ୍ରବାର ଏକ ବିବୃତ୍ତିରେ ଜାରି କରି କହିଛି, "ଏସିସି ସଭାପତି ମୋହସିନ ନକଭି ଆଇଚି-ନାଗୋୟା ୨୦୨୬ର ଶେଷ ଦିନରେ ଉପସ୍ଥିତ ରହିପାରିବେ ନାହିଁ, କିନ୍ତୁ ସେ ସ୍ୱର୍ଣ୍ଣ ଏବଂ କାଂସ୍ୟ ପଦକ ମ୍ୟାଚ୍ ପୂର୍ବରୁ ସମସ୍ତ ଚାରୋଟି ଦଳକୁ ତାଙ୍କର ଶୁଭେଚ୍ଛା ଜଣାଇଛନ୍ତି ।" ଶ୍ରୀଲଙ୍କା ଏବଂ ବାଂଲାଦେଶ ମଧ୍ୟରେ କାଂସ୍ୟ ପଦକ ପ୍ଲେ-ଅଫ୍ ବଡ଼ ଫାଇନାଲ୍ ପୂର୍ବରୁ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି । ଏସୀୟ କ୍ରୀଡା ୨୦୨୬ର ସରକାରୀ ବିବୃତ୍ତି ଅନୁସାରେ, ମୋହସିନ ନକଭି କହିଛନ୍ତି, "ଏସୀୟ କ୍ରୀଡା ୨୦୨୬ର ସ୍ୱର୍ଣ୍ଣ ଏବଂ କାଂସ୍ୟ ପଦକ ମ୍ୟାଚ୍ ପୂର୍ବରୁ ସମସ୍ତ ଅଂଶଗ୍ରହଣକାରୀଙ୍କୁ ଶୁଭେଚ୍ଛା । କିଛି ଗୁରୁତ୍ୱପୂର୍ଣ୍ଣ ପ୍ରତିଶ୍ରୁତି ଯୋଗୁଁ ମୁଁ ନାଗୋୟା ଆସିପାରିବି ନାହିଁ, କିନ୍ତୁ ମୁଁ ରୋମାଞ୍ଚକର ମ୍ୟାଚ୍‌କୁ ଉତ୍ସାହର ସହିତ ଅପେକ୍ଷା କରିଛି ।"

ପୂର୍ବରୁ, ଗଣମାଧ୍ୟମ ରିପୋର୍ଟରେ କୁହାଯାଇଥିଲା ଯେ ଭାରତୀୟ ମହିଳା ଦଳ ଦ୍ଵାରା ଜାପାନରେ ପଦକ ପ୍ରଦାନ ସମାରୋହରେ ଏସୀୟ କ୍ରୀଡ଼ା ଟ୍ରଫି ଗ୍ରହଣ ନକରିବା ଘଟଣାର ପୁନରାବୃତ୍ତି ହେବ ନାହିଁ । ଭାରତ ଏବଂ ପାକିସ୍ତାନ ମଧ୍ୟରେ ଫାଇନାଲ୍ ପରେ କିଏ ପଦକ ପ୍ରଦାନ କରିବ ସେ ନିଷ୍ପତ୍ତି ଏସିଆ ଅଲିମ୍ପିକ୍ ପରିଷଦ (OCA) ଏବଂ ଆଇଚି-ନାଗୋୟା ଏସୀୟ କ୍ରୀଡ଼ା ଏବଂ ଏସୀୟ ପାରା କ୍ରୀଡ଼ା ଆୟୋଜନ କମିଟି (AINAGOC) ମିଳିତ ଭାବରେ ନେବେ । ଆୟୋଜକମାନେ ଏପରି କୌଣସି ନିଷ୍ପତ୍ତି ନେବେ ନାହିଁ ଯାହା ଭାରତ ପାଇଁ ଅସହଜ ପରିସ୍ଥିତି ସୃଷ୍ଟି କରିବ ।

• ପ୍ରଥମେ ବ୍ୟାଟିଂ କରୁଛି ଭାରତ

ଟସ୍ ଜିତି ପ୍ରଥମେ ଭାରତ ବ୍ୟାଟିଂ କରୁଛି । ବୈଭବ ସୂର୍ଯ୍ୟବଂଶୀ ଏବଂ ଅଭିଷେକ ଶର୍ମା ବ୍ୟାଟିଂ କରିବାକୁ ଆସିଛନ୍ତି । ସେମାନଙ୍କ ଉପରେ ବହୁତ ଆଶା ରହିଛି । ବୈଭବ ପ୍ରଥମ ଥର ପାଇଁ ସିନିୟର ସ୍ତରରେ ପାକିସ୍ତାନର ସାମ୍ନା କରୁଛନ୍ତି । ଦୁହେଁ ସେମାନଙ୍କର ବିସ୍ଫୋରକ ବ୍ୟାଟିଂ ଦ୍ୱାରା ପାକିସ୍ତାନୀ ବୋଲରମାନଙ୍କୁ ଚକମା ଦେବେ ବୋଲି ଆଶା କରାଯାଉଛି । ପାକିସ୍ତାନ ପାଇଁ ସାମ୍ ଆୟୁବ ବୋଲିଂ କରିଛନ୍ତି ।

ପଢନ୍ତୁ ଏହି ଖବର: ଏସୀୟ କ୍ରୀଡ଼ାରେ ଭାରତ ଓ ପାକିସ୍ତାନ ମଧ୍ୟରେ ମହାଲଢେଇ; ବର୍ଷା ହେଲେ କାହାକୁ ମିଳିବ ଗୋଲ୍ଡ ମେଡାଲ ?

• ହାତ ମିଳାଇଲେନି ଶ୍ରେୟସ

ଉଭୟ ଦଳର ଅଧିନାୟକ ଟସ୍ ପାଇଁ ପହଞ୍ଚିଥିଲେ । ଲାଇଭ୍ ଫୁଟେଜରେ ଦୁଇ ଅଧିନାୟକ ହାତ ମିଳାଇ ନଥିବା ଦେଖାଯାଇଥିଲା । ଭାରତ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା।

ଜାଣନ୍ତୁ ଆଜିର ପ୍ଲେଇଙ୍ଗ-୧୧
ଭାରତ: ବୈଭବ ସୂର୍ଯ୍ୟବଂଶୀ, ଅଭିଷେକ ଶର୍ମା, ସଞ୍ଜୁ ସାମସନ୍ (ୱିକେଟ୍ କିପର୍), ଶ୍ରେୟସ ଆୟର (ଅଧିନାୟକ), ଈଶାନ କିଶନ, ତିଲକ ବର୍ମା, ଶିବମ ଦୁବେ, ଅକ୍ଷର ପଟେଲ, ୱାଶିଂଟନ ସୁନ୍ଦର, ରବି ବିଷ୍ଣୋଇ, ଜସପ୍ରୀତ ବୁମରାହ ।

ପାକିସ୍ତାନ: ସାହିବଜାଦା ଫରହାନ (ଅଧିନାୟକ), ମାଜ୍ ସଦାକତ୍‍, ଉସମାନ ଖାନ (ୱିକେଟ୍ କିପର୍), ସାମ୍ ଆୟୁବ, ହସନ୍ ନୱାଜ୍‍, ଅବଦୁଲ୍ ସମଦ, ଅରାଫାତ୍ ମିନହାସ, ଅହମ୍ମଦ ଦାନିୟାଲ, ସାଦ୍ ମସୁଦ୍‍, ଅବରାର ଅହମ୍ମଦ, ସୁଫିୟାନ ମୁକିମ୍ ।