IND Vs PAK Final / ଏସୀୟ କ୍ରୀଡ଼ାରେ ଭାରତ ଓ ପାକିସ୍ତାନ ମଧ୍ୟରେ ମହାଲଢେଇ; ବର୍ଷା ହେଲେ କାହାକୁ ମିଳିବ ଗୋଲ୍ଡ ମେଡାଲ ?

ଟୋକିଓ: ଏସୀୟ କ୍ରୀଡ଼ା ପୁରୁଷ କ୍ରିକେଟ୍‌ରେ ଆଜି ମହାମୁକାବିଲା । ସ୍ୱର୍ଣ୍ଣ ପଦକ ପାଇଁ ମୁହାଁମୁହିଁ ହେବେ ଚିରପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ। ସେମିଫାଇନାଲ୍‌ରେ ଶ୍ରୀଲଙ୍କାକୁ ବଡ଼ ବ୍ୟବଧାନରେ ହରାଇ ଫାଇନାଲ୍‌ରେ ପ୍ରବେଶ କରିଛି ଶ୍ରେୟସ ଆୟରଙ୍କ ନେତୃତ୍ୱାଧୀନ ଭାରତୀୟ ଦଳ । ଏହି ହାଇଭୋଲ୍ଟେଜ ମ୍ୟାଚ୍ ପାଇଁ କ୍ରୀଡାପ୍ରେମୀଙ୍କ ମଧ୍ୟରେ ପ୍ରବଳ ଉତ୍କଣ୍ଠା ଥିବାବେଳେ ଆସନ୍ତୁ ଜାଣିବା ମ୍ୟାଚ୍ କେତେବେଳେ ଆରମ୍ଭ ହେବ ଓ ବର୍ଷା ହେଲେ କାହାକୁ ମିଳିବ ଗୋଲ୍ଡ ମେଡାଲ ?

• ଭାରତର ପଲ୍ଲା ଭାରି

ସେମିଫାଇନାଲ୍ ମ୍ୟାଚ୍‌ରେ ଈଶାନ କିଶନଙ୍କ ଦମଦାର୍ ଅପରାଜିତ ୮୦ ରନ୍ ଏବଂ ବୋଲରଙ୍କ ଘାତକ ପ୍ରଦର୍ଶନ ବଳରେ ଭାରତ ଶ୍ରୀଲଙ୍କାକୁ ୧୨୪ ରନ୍‌ର ବଡ଼ ବ୍ୟବଧାନରେ ପରାସ୍ତ କରି ଫାଇନାଲ୍‌ରେ ପହଞ୍ଚିଛି। ଅନ୍ୟପକ୍ଷରେ ପାକିସ୍ତାନ ମଧ୍ୟ ବାଂଲାଦେଶକୁ ହରାଇ ସ୍ୱର୍ଣ୍ଣ ମୁକାବିଲାରେ ଅବତୀର୍ଣ୍ଣ ହୋଇଛି। ଟି-ଟ୍ୱେଣ୍ଟି କ୍ରିକେଟ୍‌ରେ ପାକିସ୍ତାନ ବିପକ୍ଷରେ ଭାରତର ରେକର୍ଡ ଅତ୍ୟନ୍ତ ଦୃଢ଼ ରହିଛି। ଉଭୟ ଦଳ ମଧ୍ୟରେ ଖେଳାଯାଇଥିବା ୧୭ଟି ମ୍ୟାଚ୍‌ରୁ ଭାରତ ୧୪ଟି ଜିତିଥିବାବେଳେ ପାକିସ୍ତାନ ମାତ୍ର ୩ଟିରେ ବିଜୟୀ ହୋଇଛି।

Up Next ⏭️ The 𝗚𝗼𝗹𝗱 𝗠𝗲𝗱𝗮𝗹 𝗠𝗮𝘁𝗰𝗵 🏅

🎥 Preps in place and #TeamIndia is raring to go in Nagoya 🇮🇳#AsianGames pic.twitter.com/sWSAGzaVUt

— BCCI (@BCCI) October 3, 2026

• କେତେବେଳେ ଆରମ୍ଭ ହେବ ମ୍ୟାଚ୍ ?

ଭାରତ ବନାମ ପାକିସ୍ତାନ ମହାମୁକାବିଲା ଅକ୍ଟୋବର ୩ ତାରିଖ ଅର୍ଥାତ୍ ଆଜି ଭାରତୀୟ ସମୟ ସକାଳ ୧୦ଟାରୁ ଆରମ୍ଭ ହେବ । ଏହାର ଅଧ ଘଣ୍ଟା ପୂର୍ବରୁ ଅର୍ଥାତ ୯.୩୦ଟାରେ ଟସ୍ ପଡ଼ିବ । ମ୍ୟାଚ୍ ପ୍ରାୟ ଅପରାହ୍ନ ୧ଟା ପର୍ଯ୍ୟନ୍ତ ଚାଲିବ । ଭାରତ ବନାମ ପାକିସ୍ତାନ ମ୍ୟାଚ୍‌କୁ ଯଦି ଆପଣ ଟିଭିରେ ଦେଖିବାକୁ ଚାହୁଁଛନ୍ତି, ତେବେ ସୋନି ସ୍ପୋର୍ଡଟ୍ସ ନେଟୱର୍କ ଓ ସୋନି ଲିଭ୍‌ ଚ୍ୟାନେଲକୁ ଯିବାକୁ ପଡ଼ିବ । ଏଠାରେ କହିରଖୁଛୁ କି, ଏବେ ବ୍ରୋଞ୍ଜ ମେଡାଲ ଲାଗି ଭାରତୀୟ ସମୟ ଭୋର ୫ଟାରୁ ମୁକାବିଲା ଆରମ୍ଭ ହୋଇସାରିଛି । ଏଥିରେ ବାଂଲାଦେଶ ଓ ଶ୍ରୀଲଙ୍କା ମଧ୍ୟରେ ମ୍ୟାଚ୍ ଖେଳାଯାଉଛି ।

• ବର୍ଷା ହେଲେ କଣ ହେବ ?

ଯଦି ବର୍ଷା ଯୋଗୁଁ ମ୍ୟାଚ୍ ସମ୍ପୂର୍ଣ୍ଣ ବାତିଲ ହୁଏ, ତେବେ ପୂର୍ବ ନିୟମ ବଦଳି ଏଥର ଉଭୟ ଦଳକୁ ମିଳିତ ଭାବେ ସ୍ୱର୍ଣ୍ଣ ପଦକ ଦିଆଯିବ । ଏହି ରୋମାଞ୍ଚକର ମ୍ୟାଚ୍ ପାଇଁ ପାଣିପାଗ ସମ୍ପୂର୍ଣ୍ଣ ଅନୁକୂଳ ରହିବ ବୋଲି ଆଶା କରାଯାଉଛି । ଶ୍ରେୟସ ଆୟରଙ୍କ ହାତରେ ଭାରତୀୟ ଟିମର କମାଣ ଥିବାବେଳେ ସାହିବଜାହା ଫରହାନଙ୍କ ହାତରେ ଅଛି ପାକିସ୍ତାନର କମାଣ ।

• ଆଜି କେମିତି ରହିବ ପାଗ ?

ଶନିବାର ଜାପାନର ନିଶିନରେ ପାଗ ଭଲ ରହିବ ବୋଲି ଆଶା କରାଯାଉଛି । ବର୍ଷା ହେବାର ବିଶେଷ ସମ୍ଭାବନା ନାହିଁ ଏବଂ ତାପମାତ୍ରା ୧୬ରୁ ୨୭ ଡିଗ୍ରୀ ସେଲସିୟସ୍ ମଧ୍ୟରେ ରହିବ ବୋଲି ଆଶା କରାଯାଉଛି। ଦିନର ସର୍ବାଧିକ ତାପମାତ୍ରା ପ୍ରାୟ ୨୫ ଡିଗ୍ରୀ ପର୍ଯ୍ୟନ୍ତ ପହଞ୍ଚିପାରେ । ସେମିଫାଇନାଲରେ ଦେଖାଯାଇଥିବା ପରିସ୍ଥିତି ପରି ଫାଇନାଲରେ ପିଚ୍ କିଛି ଟର୍ଣ୍ଣ ଏବଂ ବାଉନ୍ସ ପ୍ରଦାନ କରିବ ବୋଲି ଆଶା କରାଯାଉଛି ।

ପଢନ୍ତୁ ଏହି ଖବର: 

• ପ୍ରଥମ ଥର ଏସିଆନ ଗେମ୍ସରେ ଭାରତ-ପାକ୍ ମୁହାଁମୁହିଁ

ପୁରୁଷ ଏସୀୟ କ୍ରୀଡ଼ା କ୍ରିକେଟରେ ଭାରତ ଏବଂ ପାକିସ୍ତାନ ଏପର୍ଯ୍ୟନ୍ତ ପରସ୍ପରର ସାମ୍ନା କରିନାହାଁନ୍ତି । ତେଣୁ ନିଶିନରେ ଏହି ଫାଇନାଲ୍ ଉଭୟ ଦଳ ପାଇଁ ଏକ ନୂତନ ଅଧ୍ୟାୟ ସୃଷ୍ଟି କରିବ । ଭାରତ ଏବଂ ପାକିସ୍ତାନ ମଧ୍ୟରେ ଟି-୨୦ ଅନ୍ତର୍ଜାତୀୟ ମ୍ୟାଚ୍‌ରେ ଭାରତର ପଲ୍ଲା ସର୍ବଦା ଭାରି ରହିଛି । ଏପର୍ଯ୍ୟନ୍ତ ଉଭୟଙ୍କ ମଧ୍ୟରେ ୧୭ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳାଯାଇଛି, ଯେଉଁଥିରେ ଭାରତ ୧୪ଟିରେ ବିଜୟୀ ହୋଇଛି ଏବଂ ପାକିସ୍ତାନ ତିନୋଟିରେ ବିଜୟୀ ହୋଇଛି । ଗତ ୬ଟି ମ୍ୟାଚ୍‌ରେ ଭାରତ ପାକିସ୍ତାନ ବିପକ୍ଷରେ ଅପରାଜିତ ରହିଛି । ପାକିସ୍ତାନ ଶେଷ ଥର ପାଇଁ ୨୦୨୨ ମସିହାରେ ଭାରତକୁ ଟି-୨୦ରେ ପରାସ୍ତ କରିଥିଲା।